Крар 14

Кани шегьерда

1Кани шегьерда Павелни Барнаба чпиз адет хьанвайвал синагугдиз фена. Ана абуру Исадикай суьгьбетар авуна. Гзаф кьадар чувудрини муькуьбурукай тирбуру Исадихъ иман авуна. 2Амма Исадихъ иман ийиз кӀанзавачир чувудри маса халкьарикай тирбурун арада футфа туна, абур иманийриз акси акъвазарна. 3ЯтӀани Павелни Барнаба ана гзаф вахтунда амукьна. Абуру Реббидикай викӀегьвилелди вязер ийизвай. Реббиди, лагьайтӀа, абурув аламатар ва керемат-ишараяр къалуриз тунай. Гьа идалди Аллагьди Вичин берекатдикай абуру лугьузвай гафар тестикьарзавай. 4Шегьерэгьлияр кьве пай хьана. Садбуру чувудрин, муькуьбуруни илчийрин пад кьуна. 5Чувудрини маса халкьарикай тирбуру чпин кьилевайбурни галаз илчийриз кар кьун патал, абуруз къван гуда лагьана, гаф-чӀал сад авуна. 6Амма илчийриз абурун къастуникай хабар хьана. Абур ЛуькӀанат уьлкведа авай ЛуьстӀра ва Дербе лугьудай шегьерризни абурун патарив гвай чкайриз катна. 7Ана абуру Исадин гьакъиндай Шад Хабар гузвай.

ЛуьстӀрада ва Дербеда

8ЛуьстӀрада кӀвачер кӀакӀанвай#14:8 КӀакӀун – кӀвачер чеб чпин ихтиярда амачир, абур инсандиз муьтӀуьгъ тушир гьал. са кас авай. Ам хайи чӀавалай набут#14:8 Набут – бедендин са ва я са шумуд пай, месела, гъил, кӀвач сагъ тушир кас. тир, адавай уьмуьрда гьич къекъвез хьайиди тушир. 9Павела ихтилат ийизвайла, а касди адаз яб гузвай. Павелаз акуна хьи, и набут касдихъ вич сагъ хъийидайвилин иман ава.

10– Къарагъ, кӀвачел акъваз! – ван алаз лагьана ада набут касдиз.

Амни къудгъунна къарагъна къекъвез эгечӀна. 11Павела авур аламат акур инсанри ЛуькӀанатдин чӀалал гьарайиз хьана:

– Чи патав инсанрин кӀалубда аваз аллагьар атанва!

12Барнабадиз абуру Зевс лагьана тӀвар гана, Павелазни – Гьермес#14:12 Зевс ва Гьермес – къадим юнанрин аллагьар. Зевс – виридалай кьилинди, Гьермес – гуз-къачунинни чӀалан устадвилин., вучиз лагьайтӀа, рахунрин кьенерар Павелан гъиле авай. 13Шегьердин къерехда Зевсан ибадатхана авай. Ана къуллугъзавай касди, халкьдихъ галаз Павелазни Барнабадиз къурбанд авун патал, жунгаварни цуькверин кӀунчӀар шегьердин варарив гъана. 14Барнабадизни Павелаз и кардикай хабар хьайила, абуру, чпел алай пекер кукӀварна, халкьдин арадиз гьахьна, гьараяр авуна:

15– Акъваз, я стхаяр, куьне вуч ийизва? Чунни куьн хьтинбур я! Чна квез чан алай Аллагьдикай Шад Хабар гъанва. Бутар гадарна, чан алай Аллагьдиз килиг! Чилни цав, гьуьлер ва анра авай кьван затӀар халкь авурди Гьам я. 16Къадим вахтара Ада гьар са халкьдиз вичиз кӀандайвал уьмуьр тухудай ихтияр ганайтӀани, 17Вичи ийизвай мергьеметдин краралди Ада Вичикай вахт-вахтунда хабарни гузвай. Ада цавай квез марф ва бегьер ракъурзавай, квез недай суьрсет гузвай ва куь рикӀерни шадвилив ацӀурзавай.

18И гафар лагьанатӀани, абуру чпиз къурбандар гъиз кӀанзавай халкь гужа-гуж акъвазарна.

19Гьа иниз АнтӀиах ва Кани шегьеррай чувудар атана, абуру инсанар чпин патаз гъана ва Павелаз къван гуз эгечӀна. Абуруз ам кьейиди хьиз хьайила, абуру галчӀурна тухвана ам шегьердин къерехдиз гадарна. 20Тилмизар атана адал алтӀушна. Павел къарагъна шегьердиз хъфена. Пакагьан юкъуз ам Барнабадихъ галаз Дербедиз рекье гьатна.

Суьриядин АнтӀиахдиз хтун

21И шегьерда Шад Хабар чукӀурна, гзаф инсанар имандал гъайидалай кьулухъ абур элкъвена ЛуьстӀра шегьердиз, анай Канидиз ва АнтӀиахдиз хтана. 22Хьайи чкайра абуру тилмизрин руьгь мягькемарзавай ва абуруз Аллагьдихъ иман ийиз амукьунихъ эверзавай. Абуру гьакӀ Аллагьдин Пачагьлугъдиз акъатун патал чна гзаф азиятарни чӀугуна кӀанда лугьузвай. 23Павелани Барнабади иманийрин гьар са кӀватӀалдин кьиле жедайбур тайинарна. Дуьаярни авуна, сивни хвейи абуру иманийрин кӀватӀалар чпи Вичихъ иман ийизвай Аллагьдал аманат авуна. 24Илчияр Писидатдай яна Памфилдиз атана, 25Пергида Аллагьдин Гафуникай хабар гайидалай кьулухъ абур Аталидиз фена. 26Исятда тамамарнавай кӀвалахар кьилиз акъудун патал чеб Аллагьдин берекатдал аманатна, абур са мус ятӀани АнтӀиахдай экъечӀнай. Гила абур гимида аваз элкъвена гьа АнтӀиахдиз хъфена. 27Иниз хтана, иманийрин кӀватӀалда авайбур кӀватӀна, Павелани Барнабади, чпин куьмекдалди Аллагьди авур кӀвалахрикай рахаз-рахаз, чпи чувудрикай туширбуруз имандин рак гьикӀ ахъайнатӀа ихтилат авуна. 28Тилмизарни галаз абур ана гзаф вахтунда амукьна.

Currently Selected:

Крар 14: ЛезПК

Highlight

Copy