Крар 13

Павелан сад лагьай сиягьат

Барнабани Шаул къуллугъ ийиз ракъурун

1АнтӀиахда авай иманийрин кӀватӀалда пайгъамбарарни муаллимар авай. Абур Барнаба, Нигер лакӀаб алай Суьмен, киринейви ЛукӀис, Гьируд бегдин некӀедин стха Манаил ва Шаул тир. 2Садра, абуру Реббидиз ибадат ийиз сив хуьзвайла, Пак Руьгьди абуруз лагьана:

– За тапшуругъ яз гайи кар кьилиз акъудун патал Барнабани Шаул Зи ихтиярда тур.

3Сив хвена, дуьа авуна, Барнабадинни Шаулан кьилерилай гъилер эцигна, абур тайинарнавай рекье туна.

Куьприда Шад Хабар чукӀурун

4 Пак Руьгьди ракъурай а кьве илчи Селукейдиз, анайни гимида аваз Куьпридиз фена. 5Абур Саламис шегьердиз атана. Ина абуру чувудрин синагугра Аллагьдин Гаф инсанрал агакьарзавай. Ана абурухъ галаз Ягьяни авай, ада абуруз куьмекзавай. 6Абур къураматдин и кьиляй а кьилиз яна, атана Пафасдиз акъатна. Ана абурал суьгьуьрчи ва тапан пайгъамбар Бар-Иса тӀвар алай чувуд гьалтна. 7Ам Римдин гьаким, акьул авай инсан Серкъи Павелан итимрикай тир. Гьакимди Барнабадизни Шаулаз вичин патав эверна, адаз Аллагьдин Гафуниз яб гуз кӀанзавай. 8Амма вичиз юнан чӀалал Элим лугьудай Суьгьуьрчиди, гьаким имандикай къерех хьун патал, Барнабадизни Шаулаз гьар жуьредин манийвилер ийизвай. 9Инал Пак Руьгьдив ацӀанвай Шаула (адал Павел лугьудай тӀварни алай) Элимадиз атӀумна килигна, 10лагьана:

– Гьей, иблисдин хва, гьар са гьахъ-михьивилин душман! Вун тапаррайни гьиллейрай ацӀанва. Вун идалай кьулухъни Аллагьдин дуьз рекьер чӀуриз алахъдани? 11Аллагьдин къуват ви хура акъвазда. Вун буьркьуь жеда, са кьадар вахтунда ваз рагъ ахквадач.

Элимадиз гьасятда вич мичӀивили кьурди хьиз хьана. Ам вич гъил кьуна тухудай са касдихъ къекъвез хьана. 12И кар акур гьаким Реббидин Гафунихъ авай гьайбатди гьейранарна, ада Аллагьдихъ иман авуна.

Писидатдин АнтӀиахда

13Павелни адахъ галайбур Пафасдай гимида аваз Памфилда авай Пергидиз рекье гьатна. Абур аниз агакьайла, Ягьяди абур туна, вич Ярусалимдиз хтана. 14Амайбур Пергидай Писидатдин АнтӀиах шегьердиз атана. Киш юкъуз абур синагугдиз фена ацукьна. 15Ина Къанундайни пайгъамбаррин ктабрай чӀукар кӀелайдалай кьулухъ синагугдин кьиле авайбуру абуруз икӀ лугьун патал ксар ракъурна:

– Стхаяр, инал кӀватӀ хьанвайбурук руьгь кутадай ихтилатар квехъ аватӀа, рахух.

16Павела, къарагъна, гъилелди секин хьухь ишара авуна, лагьана:

– Исраилвияр ва Аллагьдихъай кичӀе маса ксар, захъ яб акала!

17Исраилдин халкьдин Аллагьди Вичиз вири халкьарикай чи халкьдин чӀехи бубаяр хкяна. Чувудар Мисрида къурабаяр тирла, Ада чи халкьдин кьадар артухарна, ахпа Ада Вичин Къуватдалди ам Мисридай ахкъудна. 18Аллагьди та яхцӀур йисан къене кьурумда къекъуьрай чи халкьди эхна. 19Ада Къенанда авай ирид халкь тергна, абурун чилер Исраилдин халкьдив вугана. 20Гьа икӀ 450 кьван йисар алатна. Ахпа Аллагьди чи халкьдиз гьакимар гана. Эхиримжи гьаким Смаил тир. 21Гьа чӀавуз халкьди вичиз пачагь це лугьуз Аллагьдивай тӀалабна. Аллагьди абуруз Бунъямин тайифадикай тир Къишан хва Шаул пачагьвиле гана. Шаула яхцӀур йисуз пачагьвал авуна. 22Шаул пачагьвиляй акъудна, адан чкадал Аллагьди Давуд пачагь ацукьарна, адакай Аллагьди лагьана: «Ишаян хва Давуд Зи рикӀиз чими я. Ада Заз кӀандай вуч хьайитӀани кьилиз акъудда»#1-Пачагьар 13:14..

23Аллагьди Вичи гаф гайивал, Исраил хиласун патал Давудан несилрикай тир Иса ракъурна. 24Иса къведалди Ягьяди Исраилдин вири халкьдиз Аллагьдин рекьел ша ва цик акахьун къачу лугьуз вязер-несигьатар авунай. 25Вичи тайинарнавай кӀвалах кьилиз акъудайла, Ягьяди лугьудай: «Куьне зун вуж я лагьана фикирзава? Зун Месигь туш. Ам залай гуьгъуьниз къведа. Зун Адан кӀвачин къапарин чӀулар ахъа авунизни лайих туш».

26Стхаяр, Ибрагьиман эвледар ва Аллагьдихъай кичӀезвай масадбур! Хилас хьуникай тир и хабар чаз ракъурнавайди я! 27Ярусалимдин агьалийризни абурун кьилевайбуруз Иса вуж ятӀа чир хьанач. Чувудрин гьакимри Адаз кар атӀана. Идалди чувудри гьар Киш юкъуз чпин синагугра кӀелзавай пайгъамбаррин гафар кьилиз акъудна. 28Исадин хиве тун патал кьиникьиз акъудуниз лайих гьич са тахсирни жагъаначтӀани, абуру ПилатӀавай Адаз кьинин жаза гун тӀалабна. 29Адан кьилел къведай крарикай кхьенвай гафар абуру кьилиз акъудайдалай кьулухъ, Адан мейит хашунилай алудна кучукна. 30Амма Аллагьди Адал чан хкана. 31Виликра Галилейдай Ярусалимдиз физ-хкведай рекье Адахъ галаз хьайибуруз Иса хейлин вахтунда акваз хьана. Исятда абур чи халкьдиз а агьвалатдин шагьидар я.

32-33Аллагьди чи бубайриз гайи гаф чун патал кьилиз акъудун яз, Ада Исадал кьейидалай кьулухъ чан хкана. Гила чна квез и крарикай Шад Хабар гузва.

Кьвед лагьай Забурдин манида кхьенвайвал:

«Къенин йикъалай Вун Зи Хва,

Зунни Ви Буба я!» # Забур 2:7.

34И гафаралди Аллагьди Вичи Исадал, кьейидалай кьулухъ Ам члаф тежедайвал, чан хкайдакай лугьузва:

«Давуд пачагьдиз хиве кьур

пак ва дегиш тежедай нуьсретар

За гуда квез» # Яшай 55:3. .

35Гьа и кардикай Каламдин маса чкадани кхьенва:

«Жуван муъмин кас тадач сура члафиз!» # Забур 15:10.

36Давуда вичин девирда Аллагьдиз къуллугъзавай ва Адан къастар кьилиз акъудзавай. Давуд рагьметдиз фена. Ам вичин бубайрин патав динжарна. Адан беден члаф хьана. 37Амма Аллагьди чан хкай Адан Беден члаф хьуникай хилас хьана!

38Гьа икӀ, стхаяр, заз квез чир хьана кӀанзава хьи, Аллагьди Исадин куьмекдалди куь гунагьрилай гъил къахчунвайдакай квез малумарзава. Мусадин Къанундалди куьн гьахъ-михьивилиз акъудиз хьанач. 39Исадихъ иман ийизвайбур вири гьахъ-михьивилиз акъуднава. 40Мукъаят хьухь, пайгъамбарри лагьай гафар куь кьилелни татурай гьа:

41 «Килиг гьа, кьама ял авайбур!

За куь йикъара ахьтин крар ийида хьи,

квез абурукай са ни ятӀани лагьанайтӀани,

куьн са чӀавузни чӀалахъ жедачир.

Гила килигиз, мягьтел хьухь, куьн терг жеда!» # Гьабакьукь 1:5.

42Павелни Барнаба синагугдай экъечӀна хъфидайла, ана ахъаяй агьвалатрикай мад ихтилатар хъийиз гуьгъуьнин Киш юкъузни иниз атун абуруз теклифна. 43КӀватӀ хьанвайбур чкӀайдалай кьулухъ гзаф кьадар чувудар ва абурун дин кьабулнавай масабур Павеланни Барнабадин гуьгъуьна аваз фена. Павелани Барнабади, чпихъ галаз къвезвайбуруз суьгьбетар ийиз, Аллагьдин берекатдикай къерех жемир лугьуз абур алакьарзавай.

44Къведай Киш юкъуз шегьерда авай кьван саки вири агьалияр Реббидин Гафунихъ яб акализ синагугдиз кӀватӀ хьана. 45Икьван гзаф халкь акурла, чувудар пехил хьана. Абуру Павелак хкуьриз, адан ихтилатриз аксивал ийизвай. 46Гьа инал Павелани Барнабади абуруз викӀегьдаказ лагьана:

– Аллагьдин Гаф сифте квев агакьарна кӀанзавайди тир. Амма куьне Аллагьдин Гаф кваз кьазвач. Яни куьне куьн эбеди уьмуьрдиз лайих яз гьисабзавач. Гьавиляй чун масабурун патав фида. 47Аллагьди чаз ихьтин весият ийизва:

«За вакай маса халкьариз экв авунва,

Вуна дуьньядин а кьилел кьван къведалди

авай халкьар хиласда» # Яшай 49:6. .

ИкӀ лугьуналди, Ада чаз маса халкьарикай тирбурун патав фин эмирна. 48И гафар абурун япарихъ галукьайла, абуру Реббидиз шадвилелди шукурар ийиз хьана. Эбеди уьмуьр ганвай кьванбур вири Аллагьдин Гафунихъ агъуна. 49Реббидин Гаф гьа чкаяр тирвал чкӀана. 50Амма чувудри шегьердин вилик-кьилик квай итимрикни Аллагьдиз ибадат ийизвай вилик-кьилик квай папарик футфа кутуна. Абуру Павелни Барнаба хура туна ва и чкайрай катуниз мажбурна. 51Илчийри, шегьерэгьлийрилай нарази тирвилин лишан яз, чпин кӀвачерал ацукьнавай руг юзурна. Ахпа абур Кани шегьердиз хъфена. 52И чкайра авай тилмизар Пак Руьгьдивни чӀехи шадвилив ацӀанвай.

Currently Selected:

Крар 13: ЛезПК

Highlight

Copy