ZACARIAS 11
11
1Buksi ang imo mga ganhaan, O Libano,
agud nga ang kalayo makalamon sang imo mga cedro!
2Maghaya, O abeto, kay napukan ang cedro,
bangud nga ang mga ali nalaglag!
Maghaya, O kamo nga mga roble sang Basan,
kay ang mabakud nga talon natup-ay!
3Ang tingug sang hinaya sang mga manugpahalab,
kay ang ila himaya nalaglag!
Ang tingug sang pagngurub sang magamay nga mga leon,
kay ang bugal sang Jordan nawagwag!
Ang Palaanggiran nahanungud sang Manugpahalab nga Buangbuang
4Amo ini ang ginsiling sang Ginoo nga akon Dios: “Pahalba ang panong nga ilihawon. 5Ginaihaw sila sang ila mga tag-iya kag nagapakawala sila sing sala; kag ang mga nagabaligya sa ila nagasiling, ‘Pagpakamaayohon ang Ginoo, kay manggaranon ako’; kag ang ila mga manugpahalab wala nagakaawa sa ila. 6Kay indi na ako magkaawa sa mga pumuluyo sang duta, nagasiling ang Ginoo. Yari karon, ako magatugyan sang mga tawo ang tagsatagsa sa kamut sang iya isigkatawo, kag sa kamut sang iya hari; kag samaron nila ang duta, kag ako indi magluwas sa ila gikan sa ila kamut.”
7Gani ginpahalab ko ang panong nga ilihawon nga mga makalolooy gid sang panong. Kag nagkuha ako nga sa akon sing duha ka sungkod; ang isa ginhingalanan ko Katahum, ang isa ginhingalanan ko nga Bugkos. Kag ginpahalab ko ang panong. 8Ginpapas ko ang tatlo ka manugpahalab sa isa ka bulan. Kay ang akon kalag natak-an sa ila, kag ang kalag nila man nangil-ad sa akon. 9Niyan nagsiling ako, “Indi na ako magpahalab sa inyo. Ang mapatay, pakamatya; ang palapason, ipapapas; kag ang mga mabilin magkan-anay sang unud sang isa kag isa.” 10Kag ginkuha ko ang akon sungkod nga Katahum, kag gin-utud, agud nga mabungkag ko ang akon katipan nga ginhimo ko sa tanan nga mga katawohan. 11Gani gin-utud ini sa sadtong adlaw, kag sa sini ang makalolooy sang panong, nga nagpamati sa akon, nakahibalo nga yadto polong sang Ginoo. 12Niyan nagsiling ako sa ila, “Kon ginapakamaayo ninyo, hatagi ako sang akon sohol; kag kon indi, pabayai.” Gani nagtimbang sila nga sa akon sohol sing katloan ka bilog nga pilak. 13Niyan nagsiling sa akon ang Ginoo, “Ipilak ini sa maninihon”—ang maayo nga bili nga ginpabili nila sa akon. Gani ginkuha ko ang katloan ka bilog nga pilak kag ginpilak sila sa maninihon sa balay sang Ginoo.#Mat. 27:9-10. 14Niyan gin-utud ko ang akon isa pa ka sungkud nga Bugkos, agud nga mabungkag ko ang paghiliutud sa tunga sang Juda kag Israel.
15Niyan nagsiling sa akon ang Ginoo, “Kuha ka liwat sang mga gamit sang manugpahalab nga buangbuang. 16Kay yari karon, magabangon ako sing manugpahalab sa duta nga indi magtatap sang mga nawala, ukon magpangita sang nagdalangdalang, ukon magbolong sang nabali, ukon magpahalab sang maayo, kondi kaonon niya ang unud sang matambok, kag magapihak sang ila mga koko.
17Kailo ang manugpahalab nga wala sing pulus,
nga nagabiya sang panong!
Ang espada manginsa iya butkon
sa iya mata nga too!
Ang iya butkon maitus gid,
ang iya mata nga too magadulum sing bug-os!”
Currently Selected:
ZACARIAS 11: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
