ZACARIAS 10
10
Ang Ginoo Nagatubus sang Iya Katawohan
1Pangayo kamo sa Ginoo sing ulan sa tion sang olihi nga ulan,
sa Ginoo nga nagahimo sing mga kilat,
nga hatagan niya sila sing nagabonok nga ulan,
sa tagsatagsa sing hilamon sa latagon.
2Kay ang mga terafim nagpamolong sa wala sing pulus,
kag ang mga manugpakot nakakita sing kabutigan;
nagsugid sila sing dimatuud nga mga damgo,
kag nagalipay sila sa wala sing pulus.
Busa nagalakat ang katawohan sa ila dalanon kaangay sang mga carnero;
ginapiotan sila bangud nga wala sing manugpahalab.
3“Nagdabdab ang akon kaakig batok sa mga manugpahalab,
kag silotan ko ang mga kanding nga lalaki;
kay ang Ginoo sang mga kasoldadosan nagduaw sa iya panong, ang panimalay sang Juda,
kag himoon sila subong sang iya ali nga kabayo sa inaway.
4Sa iya magagowa ang bato sang pamag-ang,
sa iya ang lansang,
sa iya ang pana sa inaway,
sa iya ang tagsa ka manugdumala sing tingub.
5Manginsubong sila sang gamhanan nga mga tawo,
nga nagatapak sang ila mga kaaway sa lunang sang mga alagyan sa inaway;
magaaway sila bangud nga ang Ginoo nagaupud sa ila,
kag ang mga manugsakay sa mga kabayo maorongan.
6“Palig-onon ko ang panimalay sang Juda,
kag luwason ko ang panimalay ni Jose.
Pabalikon ko sila kay nalooy ako sa ila,
kag sila manginsubong sang wala ko masobol sila;
kay Ako amo ang Ginoo nga ila Dios kag magapamati ako sa ila.
7Niyan ang mga sa Efraim manginkaangay sang gamhanan nga tawo,
kag ang ila tagiposoon magakasadya subong sang sa alak.
Ang ila mga anak makakita sini kag magakasadya,
ang ila mga tagiposoon magakalipay sa Ginoo.
8“Ako magapanagutsut tungud sa ila kag tiponon sila,
kay gintubus ko sila,
kag magadugang sila subong sang una.
9Kon isab-ug ko sila sa tunga sang mga katawohan,
walay sapayan dumdumon nila ako sa malayo nga kadutaan,
kag magakabuhi sila upud sang ila mga anak kag magabalik.
10Pabalikon ko sila liwat man gikan sa duta sang Egipto,
kag tiponon sila gikan sa Asiria;
kag pasudlon ko sila sa duta sang Galaad kag Libano,
tubtub nga wala sing duug nga makita tungud sa ila.
11Magaagi sia sa dagat sang kapipit-an,
kag magahampak sang mga balud sa dagat,
kag magamala ang bug-os nga kadadalman sang Nilo.
Ang bugal sang Asiria paubson,
kag ang cetro sang Egipto magataliwan.
12Palig-onon ko sila sa Ginoo
kag magalakat sila paibabaw kag paubus sa iya ngalan,”
nagasiling ang Ginoo.
Currently Selected:
ZACARIAS 10: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
