AMBAHANON 6
6
Ang Tingub nga Kalipay sang Nobya kag Nobyo
1Diin bala magkadto ang imo hinigugma,
O ikaw nga magayon gid sa tanan nga babayi?
Diin bala magliso sia nga imo hinigugma,
agud nga mapangita naton sia upud sa imo?
2Ang akon hinigugma nagdulhog sa iya katamnan,
sa mga higdaan sang mga pahumut,
sa pagpahalab sang iya panong sa mga katamnan,
kag sa pagtipon sing mga lirio.
3Iya ako sang akon hinigugma kag ang akon hinigugma akon;
nagapahalab sia sang iya panong sa mga lirio.
4Magayon ka, O hinigugma ko, subong sang Tirsa,
maayoayo subong sang Jerusalem,
makakulugmat subong sang hangaway nga may mga hayahay.
5Ipalayo sa akon ang imo mga mata,
kag gindaug ako nila—
Ang imo bohok subong sang panong sang mga kanding,
nga nagaloko sa kilid sang Galaad.
6Ang imo mga ngipon kaangay sang panong sang mga oveja,
nga nagatakas gikan sa pagpanghugas,
nga ang tagsatagsa may kapid,
wala sing napatyan sa ila.
7Ang imo mga pisngi kaangay sang isa ka bilog nga granada
sa lipud sang imo takurung.
8May kan-uman ka hara kag kawaloan ka babayi,
kag mga ulay nga dimaisip.
9Ang akon alimokon, ang akon putli, isa lamang,
bugtong sia sang iya iloy,
pinili sia sang nag-anak sa iya.
Ang babayi nga mga anak nakakita sa iya kag nagtawag sa iya nga bulahan;
sang mga hara kag sang mga babayi man,
kag nagdayaw sila sa iya.
10“Sin-o bala sia nga nagalantaw subong sang kaagahon,
nga magayon subong sang bulan, matin-aw subong sang adlaw,
makakulugmat subong sang hangaway nga may mga hayahay?”
11Nagdulhog ako sa katamnan sang mga nuez,
sa pagtan-aw sang lab-as nga mga tanum sang nalupyakan,
sa pagtan-aw kon ang uvas nagpanalingsing,
kon ang mga granada nagpamulak.
12Sa wala ko mahibaloi, ang akon kalag nagpahamtang sa akon
sa mga kangga sang akon katawohan nga harianon.
13Balik, balik, O Sulamnon,
balik, balik, agud nga magtolok kami sa imo.
Ngaa bala nga matan-aw kamo sa Sulamnon,
subong sang sa saut sang Mahanaim?
Currently Selected:
AMBAHANON 6: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
