AMBAHANON 5
5
1Nagsulud ako sa akon katamnan, utud ko, kinasal ko,
gintipon ko ang akon mira pati sang akon pahumut,
ginkaon ko ang akon uludlan pati sang akon dugus,
gin-inum ko ang akon alak pati sang akon gatas.
Magkaon, O mga abyan, kag mag-inum:
mag-inum sing bugana, O hinigugma!
Ang Kalisdanan bangud sa Pagbulagay
2Nagkatolog ako, apang ang akon tagiposoon nagmata.
Tingug ini sang akon hinigugma nga nagapanuktuk,
“Buksi ako, utud ko, hinigugma ko,
alimokon ko, putli ko;
ang akon olo napuno sing ton-og,
ang akon mga bunghay sang mga tolo sang kagab-ihon.”
3Nauba ko ang akon panapton,
paano bala ang pagsuklub ko sini?
Ginhinawan ko ang akon tiil,
paano bala ang pagdagta ko sa ila?
4Ang akon hinigugma naggulo sang iya kamut sa boho sang ganhaan,
kag ang akon tagiposoon natandug tungud sa iya.
5Nagbangon ako sa pagbukas sa akon hinigugma,
kag ang akon mga kamut nagtolo sing mira,
ang akon mga tudlo sing mira nga lasaw,
sa mga uluyatan sang pintal.
6Ginbuksan ko sa akon hinigugma,
apang ang akon hinigugma naghalin kag wala na.
Ang kalag ko napunaw sang nagpamolong sia.
Ginpangita ko sia, apang wala ko sia makita;
gintawag ko sia, apang wala sia magsabat sa akon.
7Ang mga bantay nakakita sa akon,
sang naglibut sila sa banwa;
ginbunal nila ako, ginpilasan nila ako,
nagkuha sa akon sang akon takurung,
yadtong mga bantay sang mga kuta.
8Ginapasumpa ko kamo, O babayi nga mga anak sang Jerusalem,
kon makita ninyo ang akon hinigugma,
nga sugiran ninyo sia
nga nagamasakit ako sa gugma.
Ang Nobya Nagadayaw sang Nobyo
9Ano bala ang imo hinigugma labi sa iban nga hinigugma,
O ikaw nga magayon gid sa tanan nga babayi?
Ano bala ang imo hinigugma labi sa iban nga hinigugma,
nga ginapasumpa mo kami sing subong?
10Ang akon hinigugma maputi kag mapulapula,
ali gid sa isa ka laksa.
11Ang iya olo subong sang bulawan nga bus-og gid;
ang iya mga bunghay madabung.
maitum subong sang uwak.
12Ang iya mga mata kaangay sang mga alimokon
sa luyo sang mga sapa sang tubig,
nga nahugasan sing gatas,
nga napahamtang sing nagakaigo.
13Ang iya mga pisngi subong sang higdaan sang mga pahumut,
subong sang mga tinumpok sang mga mahumut nga mga gamhon.
Ang iya mga bibig subong sang mga lirio,
nga nagatolo sing mira nga lasaw.
14Ang iya mga kamut subong sang mga singsing nga bulawan,
nga may tampuk nga berilo.
Ang iya lawas subong sang tiposo,
nga nahalupan sing mga zafiro.
15Ang iya mga paa subong sang mga haligi nga marmol,
nga natanum sa mga palatungan nga bulawan nga bus-og.
Ang iya dagway kaangay sang Libano,
nga labaw gid subong sang mga cedro.
16Ang iya baba katam-is gid,
kag hiligugmaon sia sing bug-os.
Amo ini ang akon hinigugma kag amo ini ang akon abyan,
O babayi nga mga anak sang Jerusalem.
Currently Selected:
AMBAHANON 5: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
