AMBAHANON 3
3
1Sa kagab-ihon sa akon higdaan
ginpangita ko sia nga ginahigugma sang akon kalag;
ginpangita ko sia, apang wala ko sia makita.
2“Magabangon ako karon kag magalibut sa banwa,
sa mga dalan kag sa malapad nga mga dalanon;
pangitaon ko sia nga ginahigugma sang akon kalag.”
Ginpangita ko sia, apang wala ko sia makita.
3Ang mga manugbantay nakakita sa akon,
sa nagalibut sila sa banwa.
“Nakita bala ninyo sia nga ginahigugma sang akon kalag?”
4Halus lamang nakaligad ako sa ila,
sang nakita ko sia nga ginahigugma sang akon kalag.
Ginkaptan ko sia, kag indi sia pagbuhian
tubtub nga napasulud ko sia sa balay sang akon iloy
kag sa sulud sang hulut sang nagpanamkon sa akon.
5Ginapasumpa ko kamo, O babayi nga mga anak sang Jerusalem,
paagi sa mga gasela ukon sa mga usa nga babayi sang latagon,
nga dili ninyo pagtublagon, ukon pagpukawon ang akon hinigugma,
tubtub sa luyag niya.
6Sin-o bala ini nga nagataklad gikan sa kamingawan,
kaangay sang mga haligi nga aso,
nga napahumutan sing mira kag incienso,
sang tanan nga polbos sang mga manugbaligya?
7Yari karon, ini talabon ni Salomon!
Kan-uman ka gamhanan nga mga tawo ang sa palibut sini
gikan sa gamhanan nga mga tawo sang Israel,
8sila tanan nagakaput sing espada
kag batid sa inaway,
ang tagsa ka tawo yara ang iya espada sa iya paa,
bangud sang kahadluk sa kagab-ihon.
9Si Hari Salomon naghimo nga sa iya sing talabon
nga sa kahoy sang Libano.
10Ginhimo niya sa pilak ang mga haligi sini,
ang panalgan sini bulawan, ang lingkoran sini purpura;
ang tunga sini ginhalupan sing gugma
gikan sa babayi nga mga anak sang Jerusalem.
11Gowa, O kamo nga babaying mga anak sang Sion, kag tan-awa si Hari Salomon,
nga may purungpurung nga ginpurungpurung sa iya sang iya iloy
sa adlaw sang pagpakasal niya,
sa adlaw sang kasadya sang iya tagiposoon.
Currently Selected:
AMBAHANON 3: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
