AMBAHANON 2
2
1Ako amo ang bulak sang Saron,
ang lirio sang mga nalupyakan.
2Subong sang lirio sa tunga sang mga tunuk,
amo ini ang akon hinigugma sa tunga sang mga anak nga babayi.
Ang Panamgohanon sang Nobya
3Subong sang mansanas nga kahoy sa tunga sang mga kahoy,
amo ini ang akon hinigugma sa tunga sang mga anak nga lalaki.
Naglingkod ako sa idalum sang iya landong sa daku nga kalipay,
kag ang iya bunga matam-is sa akon idilimdim.
4Gindala niya ako sa balay sang sinalosalo,
kag ang iya hayahay sa ibabaw ko amo ang gugma.
5Sakdaga ako sing mga pasas,
paumpawi ako sing mga mansanas;
kay nagamasakit ako gikan sa gugma.
6Ang iya kamut nga wala sa idalum sang akon olo,
kag ang iya kamut nga too nagahakus sa akon!
7Ginapasumpa ko kamo, O mga anak nga babayi sang Jerusalem,
tungud sa mga gasela ukon sa mga usa nga babayi sang latagon,
nga dili ninyo pagtublagon ang akon hinigugma,
tubtub sa luyag niya.
8Ang tingug sang akon hinigugma!
Yari karon, nagapakari sia,
nga nagalumpatlumpat sa kabukiran,
nga nagatumbotumbo sa kabakoloran.
9Ang akon hinigugma kaangay sang gasela,
ukon sang bataon nga usa.
Yari karon, nagatindug sia
sa likod sang amon dingding,
nga nagatolok sia sa sulud sang mga talambuan,
nga nagalingling sia sa balatibat.
10Ang akon hinigugma nagpamolong kag nagsiling sa akon:
“Tindug ka, hinigugma ko, magayon ko,
kag magkari;
11kay yari karon, ang tigtulugnaw nagligad na,
ang ulan naghulaw kag nagtaliwan na.
12Ang mga bulak nagapahayag sa duta,
ang tion sang paghinuni sang mga pispis nagaabut,
ang tingug sang tukmo
mabatian sa aton duta.
13Ang higuera nagapaluto sang iya hilaw nga mga higos,
kag ang mga uvas nagapamulak;
nagapangamyon sila.
Tindug ka, hinigugma ko, magayon ko,
kag magkari.
14O alimokon ko, nga yara sa mga litik sang igang,
sa palanagoan sang pil-as,
patan-awa ako sang imo nawung,
papamati-a ako sang imo tingug,
kay matam-is ang imo tingug,
kag maayoayo ang imo nawung.
15Kuhaa sa amon ang mga ido nga talonon,
ang magamay nga mga ido nga talonon,
nga nagasamad sang mga ulubasan,
kay ang amon mga ulubasan nagapamulak.”
16Ang akon hinigugma akon kag ako iya,
nagapahalab sia sang iya panong sa tunga sang mga lirio.
17Tubtub nga ang adlaw magbugnaw
kag ang mga landong magpalagyo,
balik ka, hinigugma ko, magpakaangay ka sa gasela,
ukon sa bataon sang mga usa sa kabukiran sang Bether.
Currently Selected:
AMBAHANON 2: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
