NEHEMIAS 6
6
Ang mga Himbon sang mga Kasumpong
1Karon sang ginsugid ini kay Sanbalat kag kay Tobias kag kay Gesem nga Arabiahanon kag sa iban sang amon mga kaaway nga napatindug ko ang kuta kag nga walay bulwang nga nabilin sa iya (bisan nga tubtub gid sadtong tion wala ko matakud ang mga takup sa mga gawang), 2si Sanbalat kag si Gesem nagpatawag sa akon, nga nagasiling, “Kari kag magkitaay kita sing tingub sa isa sang mga minoro sa kapatagan sang Ono.” Apang naghunahuna sila sa paghimo sing malaut sa akon. 3Kag nagpadala ako sing mga manugbalita sa ila, nga nagasiling, “Ako nagahimo sing dakung buluhaton sa bagay nga indi ako makadulhog. Ngaa bala mag-untat ang buluhaton samtang ginabayaan ko ini kag magdulhog sa inyo?” 4Kag ginpakadtoan nila ako sing makap-at sono sining bagay kag ginsabat ko sila sono sa among bagay. 5Niyan ginpadala ni Sanbalat ang iya alagad sa akon sa among bagay sa ikalimang tion nga may bukas nga sulat sa iya kamut. 6Sa sini nasulat, “Ginsugid sa mga pungsud, kag si Gasmu nagasiling sini, nga ikaw kag ang mga Judio nagahunahuna sa pagribuk; tungud sining kabangdanan nagapatindug ka sang kuta; kag ikaw buut nga mangin-ila hari, sono sining mga polong. 7Kag ikaw nagtangdo man sing mga manalagna sa pagbantala nahanungud sa imo sa Jerusalem, ‘May hari sa Juda.’ Kag karon isugid ini sa hari sono sining mga polong. Busa kari karon, kag maghinun-anon kita sing tingub.” 8Niyan ginpakadtoan ko sia, nga nagasiling, “Walay among mga butang nga nahimo sono sa ginasiling mo, kondi ginapatopato mo sila gikan sa imo kaugalingon nga tagiposoon.” 9Kay tanan sila buut magpahadluk sa amon, nga nagasiling, “Magaluya ang mga kamut nila sa buluhaton, agud nga indi ini mahimo.” Apang karon, palig-ona ang akon mga kamut, O Dios.
10Karon sang nagkadto ako sa balay ni Semaya nga lalaking anak ni Delaya, nga lalaking anak ni Mehetabel, nga natakpan, nagsiling sia, “Magkitaay kita sa balay sang Dios, sa sulud sang templo, kag takpan naton ang mga ganhaan sang templo; kay magakari sila sa pagpatay sa imo, sa kagab-ihon magakari sila sa pagpatay sa imo.” 11Apang nagsiling ako, “Ang tawo nga subong sa akon magapalagyo bala? Kag sin-o bala dira nga subong sa akon magasulud sa templo sa pagluwas sang iya kabuhi? Indi ako magsulud.” 12Kag ginhangup ko, kag nakita nga ang Dios wala magpadala sa iya, kondi ginmitlang niya ining tagna batok sa akon bangud nga ginsoholan sia ni Tobias kag ni Sanbalat. 13Sa sining kabangdanan ginsoholan sia, agud nga mahadluk ako kag maghimo sing subong kag magpakasala, kag agud nga may butang sila nga inugsugid nga malaut, agud nga mapakahuy-an nila ako. 14Dumduma, O Dios ko, si Tobias kag si Sanbalat sono sa sining ila mga binuhatan, kag si Noadias man nga manalagna nga babayi kag ang iban pa nga mga manalagna nga buut magpahadluk sa akon.
15Gani ang kuta natapus sa ikaduha ka pulo kag lima nga adlaw sang bulan nga Elul, sa kalim-an kag duha ka adlaw. 16Kag sang nakabati sini ang tanan namon nga kaaway, nga ang tanan nga pungsud sa palibut namon nahadluk kag nahuy-an sing tama sa ila kaugalingon nga mga mata; kay ginhantup nila nga ining buluhaton ginhikut sang amon Dios. 17Labut pa sa sadtong mga adlaw ang mga dungganon sang Juda nagpadala sing madamung mga sulat kay Tobias, kag ang mga sulat ni Tobias nag-abut sa ila. 18Kay madamu sa Juda ang nagsumpa sa iya, bangud nga sia lalaking umagad ni Secanias nga lalaking anak ni Ara: kag si Johanan nga iya anak nagpangasawa sang anak ni Mesullam nga lalaking anak ni Berequias. 19Nagpamolong man sila sang iya maayong binuhatan sa atubangan nakon, kag nagsugid sang akon mga polong sa iya. Kag si Tobias nagpadala sing mga sulat sa pagpahadluk sa akon.
Currently Selected:
NEHEMIAS 6: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
