NEHEMIAS 2

Si Nehemias Ginpadala sa Jerusalem

1Sa bulan nga Nisan, sa ikaduha ka pulo nga tuig ni Hari Artajerjes, sang yara ang alak sa atubangan niya, ginkuha ko ang alak, kag ginhatag ini sa hari. Karon wala ako anay magkasubu sa iya atubangan. 2Kag nagsiling sa akon ang hari, “Ngaa bala masubu ang imo nawung, sa ginatan-aw nga indi ka masakit? Ini indi liwan kondi kasubu sang tagiposoon.” Niyan nagkahadluk ako sing tama gid. 3Nagsiling ako sa hari, “Ang hari magkabuhi sa gihapon! Ngaa bala nga indi magmasubu ang akon nawung, nga ang banwa, ang duug sang mga lulubngan sang akon mga ginikanan, nahapay, kag ang iya mga gawang naupud sang kalayo?”#2 Hari 25:8-10; 2 Cron. 36:19; Jer. 52:12-14. 4Niyan nagsiling sa akon ang hari, “Ano bala ang ginapangayo mo?” Gani nagpangamuyo ako sa Dios sang langit. 5Kag nagsiling ako sa hari, “Kon nahamut-an sang hari, kag kon nakapahamuut ang imo alagad sa itololok mo, nga ipadala mo ako sa Juda, sa banwa sang mga lulubngan sang akon mga ginikanan, agud nga mapatindug ko ini.” 6Kag ang hari nagsiling sa akon (ang hara man nagalingkod sa luyo niya), “Tubtub bala san-o ang imo pagpanlakatan, kag san-o ka bala mabalik?” Gani nahamuut ang hari nga ipadala ako; kag nagpat-ud ako sa iya sing tion. 7Labut pa nagsiling ako sa hari, “Kon nahamut-an sang hari, hatagan ako sing mga sulat nga sa mga pangolo-puud sa Tabok sang Suba, agud nga tugutan nila ako sa pag-agi tubtub nga mag-abut ako sa Juda; 8kag sulat kay Asaf, nga bantay sang kakahoyan sang hari, agud nga hatagan niya ako sing tablon nga himoon nga mga balayan sang mga gawang sang castilyo nga nahanungud sa balay, kag sa kuta sang banwa, kag sa balay nga masudlan ko.” Kag gintugutan ako sang hari, sono sa maayong kamut sang Ginoo sa ibabaw nakon.

9Niyan nag-abut ako sa mga pangolo-puud sa Tabok sang Suba, kag ginhatag sa ila ang mga sulat sang hari. Karon ang hari nagpadala upud sa akon sing mga pangolo sang hangaway kag mga manugkabayo. 10Apang sang nabatian ini ni Sanbalat nga Horonhon kag ni Tobias nga alagad, ang Amonhon, nagkalisud sila sing lakas tungud nga may nag-abut nga tawo sa pagpaninguha sang kaayohan sang mga anak sang Israel.

Si Nehemias Nagapaisug sa Katawohan sa Pagtukud Liwat sang mga Kuta

11Gani nag-abut ako sa Jerusalem kag nagpabilin didto sing tatlo ka adlaw. 12Niyan nagbangon ako sang gab-i, ako kag pila sang mga tawo upud sa akon; kag wala ako magsugid sa bisan kay sin-ong tawo sang ginbutang sang Dios sa akon tagiposoon nga himoon tungud sa Jerusalem. Wala sing sapat nga upud sa akon luwas sang sapat nga akon ginsakyan. 13Naggowa ako sa kagab-ihon sa Gawang sang Nalupyakan nayon sa Bobon sang Chacal kag nayon sa Gawang sang Ipot, kag ginlantaw ang kuta sang Jerusalem nga nagkalumpag kag ang iya mga gawang gin-upud sang kalayo. 14Niyan nagpadayon ako sa Gawang sang Tuburan kag sa Ponong sang Hari; apang wala sing duug nga agihan sang sapat nga akon nasakyan. 15Niyan nagtaklad ako sa ubay sang sapa sa kagab-ihon kag ginlantaw ang kuta; kag nagbalik ako kag nagsulud sa Gawang sang Nalupyakan, kag nagpauli. 16Kag wala makahibalo ang mga manuggahum kon diin ako magkadto ukon sang akon ginhimo; kag wala ko pa masugid ini sa mga Judio, sa mga sacerdote, sa mga dungganon, sa mga manuggahum, kag sa iban nga magahimo sang buluhaton.

17Niyan nagsiling ako sa ila, “Ginatan-aw ninyo ang malaut nga kahimtangan nga nasudlan naton, kon paano nga ang Jerusalem nahapay kag ang iya mga gawang nasonog sang kalayo. Kari, patindugon naton ang kuta sang Jerusalem, agud nga indi na kita manginkahuluy-an.” 18Kag ginsugiran ko sila sang kamut sang akon Dios nga maayo sa ibabaw nakon, kag subong man sang mga polong sang hari nga napamolong niya sa akon. Kag nagsiling sila, “Magtindug kita kag magpatindug.” Gani ginpabaskug nila ang ila mga kamut tungud sa maayong buluhaton. 19Apang sang pagkabati sini ni Sanbalat nga Horonhon kag ni Tobias nga alagad, ang Amonhon, kag ni Gesem nga Arabiahanon ginkadlawan nila kami kag gintamay kami kag nagsiling, “Ano bala ining butang nga ginahimo ninyo? Magaribuk bala kamo batok sa hari?” 20Niyan ginsabat ko sila, “Ang Dios sang langit magapauswag sa amon, kag kami nga iya mga alagad magatindug kag magpatindug; apang kamo wala sing bahin ukon kinamatarung ukon handumanan sa Jerusalem.

Currently Selected:

NEHEMIAS 2: ABHIL82

Highlight

Copy