MARCOS 16

Ang Pagkabanhaw ni Jesus

(Mat. 28:1-10; Luc. 24:1-12; Juan 20:1-10)

1Kag sang nagligad ang adlaw nga inugpahuway, si Maria Magdalena, kag si Maria nga iloy ni Santiago, kag si Salome, nagbakal sing mga pahumut, agud makakadto sila kag mahaplas si Jesus. 2Kag sa aga pa gid sa nahauna nga adlaw sang semana nagkadto sila sa lulubngan sang nakasubang na ang adlaw. 3Kag nagsinilingay sila, “Sin-o bala ang papaligiron ta sang bato gikan sa ganhaan sang lulubngan?” 4Kag sang ila pagtukhayaw, nakita nila nga napaligid na ang bato; kay tama gid kadaku yadto. 5Kag sang pagsulud sa lulubngan, nakita nila ang pamatan-on nga nagalingkod sa too nayon, nga napanaptan sing malaba nga panapton nga maputi; kag nahangawa sila. 6Kag nagsiling ang pamatan-on sa ila, “Dili kamo magkahangawa; ginapangita ninyo si Jesus nga Nazaretnon, nga nalansang sa cruz. Nabanhaw sia, wala sia diri; tan-awa ang duug nga ginbutangan nila sa iya. 7Apang kadto kamo, sugiri ang iya mga gintoton-an kag si Pedro nga nagauna si Jesus sa inyo sa Galilea;#Mat. 26:32; Mar. 14:28. didto makita ninyo sia, subong sang ginsiling niya sa inyo.” 8Kag naggowa sila kag nagpalagyo gikan sa lulubngan; kay nagkurug kag naorongan sila; kag wala sila magsiling sing bisan ano sa bisan kay sin-o, kay hinadlukan sila.

Si Jesus Nagapahayag kay Maria Magdalena

(Juan 20:11-18)

[9Karon sang nabanhaw sia sing aga pa sa nahauna nga adlaw sang semana, nagpakita sia sing una kay Maria Magdalena, nga ginsobolan niya sing pito ka yawa. 10Naglakat sia kag nagsugid sa mga nakaupud kay Jesus, sang nagakalisud sila kag nagahibi. 11Apang sang pagkabati nila nga buhi sia kag nakita ni Maria, wala sila magtoo sini.

Si Jesus Nagapahayag sa Duha ka Gintoton-an

(Luc. 24:13-35)

12Sa tapus sini nagpahayag sia sa lain nga bayhon sa duha sa ila, sang nagalakat sila pakadto sa kaumhan. 13Kag nagbalik sila kag nagsugid sini sa iban, apang sila wala magtoo sa ila.

Si Jesus Nagapanugyan sa Iya mga Pinadala

(Mat. 28:16-20; Luc. 24:36-49; Juan 20:19-23)

14Sang olihi nagpahayag sia sa napulog isa gid sang naglingkod sila sa pagkaon; kag ginsabdong niya sila sang ila pagkadimatinoohon kag katig-a sing tagiposoon, bangud nga wala sila magtoo sa mga nakakita sa iya sa tapus nga sia nabanhaw. 15Kag nagsiling sia sa ila, “Lakat kamo sa bug-os nga kalibutan kag iwali ang maayong balita sa tanan nga tinuga.#Binu. 1:8. 16Ang nagatoo kag nabautisohan maluwas; apang ang wala nagatoo tagudilian. 17Kag ining mga tanda magaupud sa mga nagatoo; sa akon ngalan magasobol sila sang mga yawa; magapamolong sila sing bag-o nga mga hambal; 18magauyat sila sing mga man-ug, kag kon makainum sila sing makahililo nga butang, indi ini nga mas-a makahalit sa ila; magapandong sila sang ila mga kamut sa mga masakiton; kag magaayo sila.”

Ang Pagkayab ni Jesus

(Luc. 24:50-53; Binu. 1:6-11)

19Busa niyan si Ginoong Jesus, sa tapus nga nakapamolong sia sa ila, ginbayaw sa langit, kag naglingkod sa too sang Dios. 20Kag naglakat sila kag nagpangwali sa bisan diin, samtang ang Ginoo nagpanghikot kaupud nila kag nagpamatuud sang polong paagi sa mga tanda nga nagsonod. Kabay pa.]

Currently Selected:

MARCOS 16: ABHIL82

Highlight

Copy