MARCOS 15

Si Jesus sa atubangan ni Pilato

(Mat. 27:1-2, 11-14; Luc. 23:1-5; Juan 18:28-38)

1Kag sa gilayon sa kaagahon ang puno nga mga sacerdote kaupud sang mga tigulang kag sang mga escriba, kag ang bug-os nga corte nagsinapul; kag gingapus nila si Jesus kag gindala sia kag gintugyan sia kay Pilato. 2Kag si Pilato nagpamangkot sa iya, “Ikaw bala ang Hari sang mga Judio?” Kag nagsabat sia, “Ginasiling mo.” 3Kag ang puno nga mga sacerdote nagsumbung sa iya sa madamung butang. 4Kag si Pilato liwat nagpamangkot sa iya, “Wala ka bala sing isabat? Tan-awa daw ano kadamung butang ang ginasumbung nila batok sa imo.” 5Apang si Jesus wala na magsabat sing bisan ano, sa bagay nga natingala si Pilato.

Si Jesus Ginahukman nga Patyon

(Mat. 27:15-31; Luc. 23:13-25; Juan 18:38–19:16)

6Karon sa piesta may kinabatasan sia sa pagbuhi sing isa ka binilanggo sa ila nga ila pangayoon sa iya. 7Kag may isa nga gintawag si Barrabas, nga gingapus kaupud sang mga naghimo sing isa ka ribok, mga tawo nga sa ribok nakapamatay. 8Kag ang kadam-an nagsaka kag nagsugud sa pagpangayo kay Pilato nga himoon sa ila ang sono sa iya kinabatasan. 9Kag si Pilato nagsabat sa ila, “Luyag bala ninyo nga buhian ko sa inyo ang Hari sang mga Judio?” 10Kay nahantupan niya nga bangud sa kahisa ang puno nga mga sacerdote nagtugyan sa iya. 11Apang ang puno nga mga sacerdote nagsugyot sang kadam-an nga sa baylo pagbuhian niya si Barrabas sa ila. 12Kag si Pilato liwat nagsabat sa ila, “Busa ano bala ang himoon ko sa ginatawag ninyo nga Hari sang mga Judio?” 13Kag nagsinggit sila liwat, “Ilansang sia sa cruz.” 14Kag si Pilato nagsiling sa ila, “Ngaa, ano bala nga kalautan ang nahimo niya?” Apang nagsinggit sila sing tama pa gid, “Ilansang sia sa cruz.” 15Gani si Pilato nga nagahandum sa pagpahamuut sa kadam-an, ginbuhian niya si Barrabas sa ila; kag gintugyan si Jesus, sang napabunal niya sia, nga ilansang sa cruz.

16Kag ang mga soldado nagdala sa iya sa palacio (nga amo, ang Pretorio); kag gintawag nila sing tingub ang bug-os nga kabon. 17Kag ginpanaptan sia nila sing purpura, kag sang nakasalapid sila sing purungpurung nga tunukon ginsuklub nila ini sa iya. 18Kag nagsugud sila sa pag-abiabi sa iya, “Mabuhi, Hari sang mga Judio!” 19Kag ginbunal nila sia sa olo sang tabun-ak, kag ginduplaan, kag sang nagluhud sila nagyaub sa iya. 20Kag sang nauligyat nila sia, gin-ubahan sia sang purpura, kag ginsul-uban sia sang iya mga panapton. Kag gindol-ong nila sia sa gowa nga ilansang sia sa cruz.

Ang Paglansang kay Jesus

(Mat. 27:32-54; Luc. 23:26-49; Juan 19:17-30)

21Kag ginpilit nila ang isa nga nagligad, si Simon nga taga-Cireneo, nga naghalin sa kaumhan, ang amay ni Alejandro kag ni Rufo,#Roma 16:13. sa pagpas-an sang cruz ni Jesus. 22Kag gindala nila sia sa duug nga Golgota (kon sayoron ang duug nga daw bagol). 23Kag gintunghol nila sa iya ang alak nga nasimbogan sing mirra; apang wala sia magbaton sini. 24Kag ginlansang nila sia sa cruz, kag ginbahinbahin ang iya mga panapton sa ila, nga ginpapalaran ini,#Sal. 22:18. kon ano sini ang makuha sang tagsatagsa. 25Kag ikatlong takna yadto, sang ginlansang nila sia sa cruz. 26Kag ang sinulat nga sumbung sa iya nasulat sa ibabaw, “Ang Hari sang mga Judio.” 27Kag dungan sa iya ginlansang nila ang duha ka buyong, ang isa sa too niya kag ang isa sa iya wala. [ 28Kag ang kasulatan natuman nga nagasiling, “Naisipan sia kaupud sang mga malinapason.”]#Isa. 53:12. 29Kag ang mga nagligad nagbuyayaw sa iya, nga nagalungolungo sang ila mga olo,#Sal. 22:7; 109:25. kag nagasiling, “Ha! Ikaw nga buut magguba sang templo kag magpatindug sini sa tatlo ka adlaw,#Mar. 14:58; Juan 2:19. 30luwasa ang imo kaugalingon, kag panaug sa cruz!” 31Sa among bagay ang puno nga mga sacerdote man nga nagauligyat sa iya sa tunga nila kaupud sang mga escriba nagsiling, “Ang iban ginluwas niya; ang iya kaugalingon indi niya maluwas. 32Papanauga karon sa cruz ang Cristo, ang Hari sang Israel, agud nga makita naton kag magtoo.” Ang mga nalansang sa cruz dungan sa iya nagpasipala man sa iya.

33Kag sang nag-abut ang ikan-um nga takna, may kadudulman sa bug-os nga duta tubtub sa ikasiam nga takna. 34Kag sa ikasiam nga takna si Jesus nagsinggit sa mabaskug nga tingug, “Eloi, Eloi, lama sabactani?” kon sayoron, “Dios ko, Dios ko, ngaa bala ginpatumbayaan mo ako?”#Sal. 22:1. 35Kag ang iban sang mga nagtindug didto sang pagkabati nila sini nagsiling, “Yari karon, nagatawag sia kay Elias.” 36Kag nagdalagan ang isa kag, sang napasalupsupan ang esponja sing langgaw, gintakud ini sa tabun-ak kag ginpainum#Sal. 69:21. kay Jesus, nga nagasiling, “Pabayai ninyo, tan-awon ta kon makari si Elias sa pagkuha sa iya.” 37Kag si Jesus nagsinggit sa daku nga tingug, kag nahunus ang iya ginhawa. 38Kag ang kumbung#Ex. 26:31-33. sang templo napihak, kutub sa ibabaw tubtub sa idalum. 39Kag ang capitan nga nagtindug didto sa atubangan niya, sang nakakita nga nahunus ang iya ginhawa, nagsiling sia, “Matuud gid nga ining tawo Anak sang Dios!”

Ang mga Babayi sa Luyo sang Cruz

(Mat. 27:55-56)

40May didto man nga mga babayi nga nagatalan-aw sa malayo, sa tunga nila si Maria Magdalena, kag si Maria nga iloy ni Santiago nga bataon pa kag ni Jose, kag si Salome, 41nga, sang didto sia sa Galilea, nagsonod sa iya, kag nag-alagad sa iya;#Luc. 8:2-3. kag madamu pa nga iban nga babayi nga nagkadto kaupud niya sa Jerusalem.

Ang Paglubung kay Jesus

(Mat. 27:57-61; Luc. 23:50-56; Juan 19:38-42)

42Kag sang kahaponon na, bangud nga yadto adlaw sang Pag-aman, nga amo, ang adlaw nga una sa adlaw nga inugpahuway, 43si Jose nga taga-Arimatea, dungganon nga tumalapu sang corte, nga naghulat man sang ginharian sang Dios, nangahas sa pag-atubang kay Pilato, kag ginpangayo ang lawas ni Jesus. 44Kag si Pilato nabolong kon napatay na sia; kag sang napatawag niya sa iya ang capitan, nagpamangkot sia sa iya kon dugay na sia nga napatay. 45Kag sang nahibaloan niya sa capitan nga patay na sia gintugut niya ang bangkay kay Jose. 46Kag nagbakal sia sing panapton nga lino, kag sang nakuha niya si Jesus, ginsamburan sia sang panapton nga lino, kag ginbutang sia sa lulubngan nga ginguab sa igang; kag ginpaligid niya ang bato sa ganhaan sang lulubngan. 47Si Maria Magdalena kag si Maria nga iloy ni Jose nakakita kon diin sia ginbutang.

Currently Selected:

MARCOS 15: ABHIL82

Highlight

Copy