MIQUEAS 4
4
Ang Bug-os nga Paghari sang Ginoo
(Isa. 2:1-4)
1Apang sa olihi nga mga adlaw mahanabu
nga ang bukid sang balay sang Ginoo
patindugon sa putokputokan sang mga bukid,
kag bayawon ini labaw sa kabakoloran;
kag ang mga katawohan magaduguk sa iya,
2kag ang madamu nga pungsud magakadto, kag magasiling:
“Kari kamo, kag magtukad kita sa bukid sang Ginoo,
sa balay sang Dios ni Jacob;
kag tudloan kita niya sang iya mga dalanon
kag magalakat kita sa iya mga banas.”
Kay gikan sa Sion magagowa ang kasogoan,
kag ang polong sang Ginoo gikan sa Jerusalem.
3Magahukom sia sa tunga sang madamu nga mga katawohan,
kag magatapat nahanungud sa mabakud nga mga pungsud sa malayo;
kag salsalon nila nga mga punta sang arado ang ila mga espada,
kag mga galab nga inughagbas ang ila mga bangkaw;#Joel 3:10.
ang pungsud indi na magbayaw sing espada batok sa pungsud,
kag indi na sila magtoon sang inaway;
4kondi magalingkod sila ang tagsa ka tawo sa idalum
sang iya uvas kag sa idalum sang iya higuera,#Zac. 3:10.
kag wala na sing magapahadluk sa ila;
kay ang baba sang Ginoo sang mga kasoldadosan nagpamolong sini.
5Kay ang tanan nga katawohan magalakat ang tagsatagsa sa ngalan sang iya dios,
kag kita magalakat sa ngalan sang Ginoo nga aton Dios
sa gihapon kag sa gihapon.
Ang Pagtubus sang Israel gikan sa Kabihagan
6Sa sadtong adlaw, nagasiling ang Ginoo,
tingbon ko ang piang kag tiponon ko ang sinikway,
kag ang ginpapiotan ko;
7kag himoon ko ang piang nga nabilin;
kag ang sinobol sa malayo, nga mabakud nga pungsud;
kag ang Ginoo magahari sa ila sa Bukid nga Sion
kutub karon tubtub gid sa gihapon.
8Kag ikaw, O torre sang panong,
ang bakolod sang babayi nga anak sang Sion,
sa imo magaabut ini,
ang una nga pagbulut-an magaabut,
ang ginharian sang babayi nga anak sang Jerusalem.
9Karon ngaa bala nagasinggit ka sing mabaskug?
Wala bala sing hari sa imo?
Nawala bala ang imo manuglaygay,
nga gindakup ka sang kasakit subong sang babayi nga ginasakitan?
10Pagsakitan ka, kag magpangabudlay sa pag-anak, O babayi nga anak sang Sion,
kaangay sang babayi nga ginasakitan;#Bug. 12:2.
kay karon magagowa ka sa banwa
kag magapuyo sa latagon,
magakadto ka tubtub gid sa Babilonia.
Didto sagupon ka,
didto tubson ka sang Ginoo
sa kamut sang imo mga kaaway.
11Karon ang madamu nga mga pungsud
nagatingub batok sa imo,
nga nagasiling,
“Pagdagtaan sia,
kag magtan-aw ang amon mga mata sang amon handum sa Sion.”
12Apang sila wala makahibalo
sang mga hunahuna sang Ginoo,
ukon makahangup sila sang iya laygay,
kay natipon niya sila subong sang mga linaylay sa linasan.
13Tindug kag maglinas,
O babayi nga anak sang Sion,
kay himoon ko nga salsalon ang imo sungay
kag himoon ko nga saway ang imo mga koko;
tuktukon mo ang madamu nga katawohan,
kag ipahanungud ko sa Ginoo ang ila daug,
ang ila pagkabutang sa Ginoo sang bug-os nga duta.
Currently Selected:
MIQUEAS 4: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
