MGA PANALABITON 3
3
Paglaum sang Kaumpawan paagi sa Kalooy sang Dios
1Ako ang tawo nga nakakita sing kapipit-an
paagi sa bilogon sang iya kasingkal;
2gintuytuyan niya ako kag ginpalakat
sa kadudulman kag indi sa kapawa;
3sa pagkamatuud batok sa akon ginaliso niya ang iya kamut
sa liwat kag liwat sa bug-os nga adlaw.
4Ang akon unud kag ang akon panit ginpatigulang niya,
ginboong niya ang akon mga tul-an;
5nagpatindug sia batok sa akon kag ginlibutan ako
sing kapaitan lag kasaktan;
6ginpapuyo niya ako sa madulum nga mga duug
subong sang mga napatay sing dugay na.
7Gindingdingan niya ako palibut agud nga indi ako makagowa;
ginpabug-at niya ang akon mga talikala;
8bisan magsinggit ako kag magpanawag sing tabang,
gintakpan niya ang akon pangamuyo;
9gindingdingan niya ang akon mga dalanon sing mga bato nga binasbasan,
ginpatiko niya ang akon mga banas.
10Sia subong sa akon sang oso nga nagapuut,
subong sang leon sa natago nga mga duug;
11ginpatalang niya ang akon mga dalanon kag ginkusnit ako;
ginpamingaw niya ako;
12ginbingat niya ang iya pana kag ginbutang ako
nga iligoon sang baslay.
13Ginpalapus niya sa akon mga tagimislon
ang mga olongan sang iya baslayan;
14nangin-ululigaon ako sa bug-os ko nga katawohan,
kalantahon nila sa bug-os nga adlaw.
15Ginpuno niya ako sing kapaitan,
ginbusug niya ako sing ajenjo.
16Ginbingaw niya ang akon mga ngipon sang magamay nga mga bato,
gintampokan niya ako sing mga abo;
17ginpahilayo mo ang akon kalag sa paghidait,
nalimtan ko ang kauswagan;
18kag nagsiling ako, “Nawala ang akon kusug,
kag ang akon ginapaabut sa Ginoo.”
19Dumduma ang akon kapipit-an kag ang akon pagkamakalolooy,
ang ajenjo kag ang apdo!
20Ang akon kalag nagadumdum pa sa ila
kag nagaantus sa sulud nakon.
21Ini ginadumdum ko sa akon hunahuna,
busa may paglaum ako:
22Ini gikan sa malig-on nga paghigugma sang Ginoo nga wala kita pagpapasa,
bangud nga ang iya mga kalooy wala nagauntat;
23bag-o sila agaaga;
daku ang imo pagkatutum.
24“Ang Ginoo ang akon bahin,” nagasiling ang akon kalag,
“busa magalaum ako sa iya.”
25Maayo ang Ginoo sa mga nagahulat sa iya,
sa kalag nga nagapangita sa iya.
26Maayo nga ang tawo maglaum kag maghulat sing hipus
sang kaluwasan sang Ginoo.
27Maayo sa tawo nga magdala
sang gota sa iya pagkapamatan-on.
28Maglingkod sia sing isa lamang kag maghipus
bangud nga ginpapas-an niya ini sa iya;
29ibutang niya ang iya baba sa yab-ok—
basi pa nga may paglaum;
30itaya niya ang iya pisngi sa nagatampa sa iya,
manginpuno sia sing kahuluy-an.
31Kay ang Ginoo indi
magsikway sing dayon,
32kay, bisan nagapakalisud sia, apang may kalooy sia
sono sa kadam-an sang iya malig-on nga paghigugma;
33kay wala sia nagapapiot sing kinabubut-on
ukon nagapakalisud sang mga anak sang mga tawo.
34Sa paglinas
sang tanan nga binilanggo sang duta,
35sa pagpatalang sang matarung sang tawo
sa atubangan sang nawung sang Labing Mataas,
36sa pagpatalang sa tawo sa iya kasaba,
ang Ginoo wala nagapakamaayo.
37Sin-o bala ang nagasiling kag ini nahanabu,
kon ang Ginoo wala nagasogo sini?
38Wala bala nagagowa sa baba sang Labing Mataas
ang malaut kag ang maayo?
39Ngaa bala ang tawo nga buhi nagayamo,
ang tawo, tungud sa pagsilot sang iya mga sala?
40Usisaon naton kag tungkaron ang aton mga dalanon,
kag magbalik sa Ginoo!
41Bayawon naton ang aton tagiposoon upud sa aton mga kamut
sa Dios sa mga langit:
42“Naglalis kami kag nagbato,
wala ka magpatawad.
43“Nagputus ka sang kaakig kag naglagas sa amon,
nagpatay ka kag wala ka magkaawa;
44nagpanabon ka sing panganud
sa bagay nga wala sing pangamuyo nga makalapus.
45Ginhimo mo kami nga sagbut kag higku
sa tunga sang mga katawohan.
46“Ang tanan namon nga kaaway
nagnganga sang ila baba batok sa amon;
47ang kahadluk kag ang boho nag-abut sa amon,
ang kawagwagan kag ang kalaglagan;
48ang akon mga mata nagailig sing mga kasulgan sang tubig
tungud sang kalaglagan sang babayi nga anak sang akon katawohan.
49“Ang akon mga mata nagaula kag wala nagauntat,
sa wala gid sing pal-at,
50tubtub nga ang Ginoo kutub sa mga langit
magtamud kag maglantaw;
51ang akon mga mata nagatublag sang akon kalag
bangud sang tanan nga babayi nga mga anak sang akon banwa.
52“Ginlagas nila ako sing tama kaangay sang pispis
sila nga akon mga kaaway sa wala sing kabangdanan;
53gin-utas nila ang akon kabuhi sa bilanggoan nga madulum
kag naghaboy sing bato sa akon;
54ang mga tubig naglapaw sa akon olo;
nagsiling ako, ‘Nautas na ako.’
55“Nagpanawag ako sa imo ngalan, O Ginoo,
gikan sa naidalum gid nga bilanggoan nga madulum;
56nabatian mo ang akon tingug,
‘Indi paglipdi ang imo idulungug sa akon pagginhawa sa akon pagtuaw!’
57Nagpalapit ka sa adlaw nga nagpanawag ako sa imo;
nagsiling ka, ‘Dili magkahadluk!’
58“O Ginoo, gin-apinan mo ang mga kasaba sang akon kalag,
gintubus mo ang akon kabuhi.
59O Ginoo, nakita mo ang akon sayup;
hukmi ang akon kasaba.
60Nakita mo ang bug-os nila nga pagtimalus,
ang tanan nila nga pahito batok sa akon.
61“Nabatian mo ang ila mga pagpakahuya, O Ginoo,
ang tanan nila nga mga pahito batok sa akon.
62Ang mga bibig sang mga nagtindug batok sa akon kag ang ila kalantahon
nagabatok sa akon sa bug-os nga adlaw.
63Toloka ang ila paglingkod kag ang ila pagtindug;
ako ang ila kalantahon.
64“Tumbasan mo sila, O Ginoo,
sono sa binuhatan sang ila mga kamut.
65Hatagan mo sila sing katig-a sang tagiposoon;
ang imo pagkamalaut manginsa ila.
66Lagson mo sila sa imo kaakig kag laglagon sila
gikan sa idalum sang mga langit sang Ginoo.”
Currently Selected:
MGA PANALABITON 3: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
