JOSUE 6
6
Ang Paglaglag sang Jerico
1Karon ang Jerico natakpan sing malig-on bangud sang katawohan sang Israel; wala gid sing naggowa, kag wala gid sing nagsulud. 2Kag ang Ginoo nagsiling kay Josue, “Tan-awa, nahatag ko sa imo kamut ang Jerico, kag ang iya hari kag ang isganan nga mga lalaki. 3Libuton ninyo ang banwa, tanan nga lalaki sa pag-ayawan nga nagalibut sang banwa sing makaisa. Amo ini ang himoon mo sa anum ka adlaw. 4Kag pito ka sacerdote magdala sing pito ka budyong nga sungay sang carnero sa atubangan sang kaban; kag sa ikapitong adlaw libuton ninyo sing makapito ang banwa, kag ang mga sacerdote magapatonog sang mga budyong. 5Kag kon patunggon nila sing malawig ang sungay sang carnero, kon mabatian ninyo ang tonog sang budyong, niyan ang bug-os nga katawohan magsinggit sa mabaskug nga tingug; kag ang kuta sang banwa mapukan sing haplak, kag ang katawohan magasaka ang tagsa ka tawo patadlong sa atubang niya.” 6Gani gintawag ni Josue nga anak ni Nun ang mga sacerdote kag nagsiling sa ila, “Dalha ang kaban sang katipan, kag ang pito ka sacerdote magdala sing pito ka budyong nga mga sungay sang carnero sa atubangan sang kaban sang Ginoo.” 7Kag nagsiling sia sa katawohan, “Agi kamo; libuton ang banwa, kag ang mga tawo nga lupit sa hinganiban mag-una sa kaban sang Ginoo.” 8Kag sang si Josue nakapamolong sa katawohan, ang pito ka sacerdote nga nagadala sang pito ka budyong nga mga sungay sang carnero sa atubangan sang Ginoo nag-una, nga nagpatonog sang mga budyong, lakip ang kaban sang katipan sang Ginoo nga nagsonod sa ila. 9Kag ang mga tawo nga lupit sa hinganiban nag-una sa mga sacerdote nga nagpatonog sang mga budyong, kag ang naolihi nagsonod sa kaban, ang mga sacerdote nagapatonog sang mga budyong sa nagalakat sila. 10Apang si Josue nagsogo sa katawohan, “Dili kamo magsinggit kag dili magpabati sang inyo tingug, kag wala gid sing polong nga maggowa sa inyo baba, tubtub sa adlaw nga magsogo ako sa inyo sa pagsinggit; niyan magsinggit kamo.” 11Gani ginhimo niya nga ang kaban sang Ginoo malibut sa banwa, nga nagalibut sing makaisa; kag nagsulud sila sa dologan, kag nagpabilin sa dologan.
12Niyan si Josue nagbangon sing aga pa, kag ang mga sacerdote nagdala sang kaban sang Ginoo. 13Kag ang pito ka sacerdote nga nagadala sang pito ka budyong nga mga sungay sang carnero sa atubangan sang kaban sang Ginoo nagpadayon sa paglakat, nga nagpatonog sang mga budyong; kag ang mga lalaki nga lupit sing hinganiban nag-una sa ila, kag ang naolihi nagsonod sa kaban sang Ginoo, ang mga sacerdote nagpatonog sang mga budyong sa nagalakat sila. 14Kag sa ikaduhang adlaw ginlibut nila liwat ang banwa sing makaisa, kag nagpauli sa dologan. Amo ini ang ginhimo nila sa anum ka adlaw.
15Sa ikapitong adlaw nagbangon sila sing aga pa gid sa pagpamanagbanag sang adlaw, kag naglibut sang banwa sa among bagay sing makapito: lamang sa sadtong adlaw ginlibut nila ang banwa sing makapito. 16Kag sa ikapito, sang nagpatonog sang mga budyong ang mga sacerdote, si Josue nagsiling sa katawohan, “Singgit kamo; kay ginhatag sa inyo sang Ginoo ang banwa. 17Kag ang banwa ipahanungud sa Ginoo, kag ang tanan nga yara sa sini; lamang si Rahab nga makihilawason magakabuhi, kag tanan nga yara sa balay kaupud niya, bangud nga gintago niya ang mga manugbalita nga ginpadala naton. 18Apang kamo, maglihi gid kamo sa napahanungud nga butang, basi nga sang napahanungud ninyo ini magkuha kamo sa napahanungud nga butang kag mahimo ninyo nga pinakamalaut ang dologan sang Israel, kag matublag ini. 19Apang ang tanan nga pilak kag bulawan, kag gamit nga saway kag salsalon, balaan sa Ginoo; isulud sila sa bahandi sa Ginoo.” 20Gani ang katawohan nagsinggit, kag ang mga sacerdote nagpatonog sang mga budyong. Sang nakabati ang katawohan sang tonog sang budyong, ang katawohan nagsinggit sa mabaskug nga pagsinggit, kag ang kuta napukan sing haplak,#Heb. 11:30. sa bagay nga ang katawohan nagsaka pasulud sa banwa, ang tagsa ka tawo patadlong sa atubangan niya, kag gin-agaw nila ang banwa. 21Niyan ginlaglag nila sing bug-os ang tanan nga yara sa banwa, lalaki kag babayi, pamatan-on kag tigulang, baka, carnero, kag asno, sa sulab sang espada.
22Kag si Josue nagsiling sa duha ka tawo nga naglampitaw sang duta, “Sulud kamo sa balay sang babayi nga makihilawason, kag ipagowa ninyo gikan didto ang babayi, kag ang bug-os nga iya, subong sang inyo ginsumpa sa iya.” 23Gani ang pamatan-on nga mga lalaki nga mga lampitaw nagsulud, kag gindala sa gowa si Rahab, kag ang iya amay kag ang iya iloy kag ang iya kauturan kag ang tanan nga iya; ang bug-os niyang kahimataan gindala nila sa gowa, kag ginbutang sila sa gowa sang dologan sang Israel. 24Kag ginsonog nila sa kalayo ang banwa, kag ang tanan nga yara sa iya; lamang ginsulud nila sa bahandi sang balay sang Ginoo ang pilak kag ang bulawan, kag ang mga gamit nga saway kag salsalon. 25Apang ginluwas nga buhi ni Josue si Rahab nga makihilawason, kag ang panimalay sang iya amay, kag ang tanan nga iya; kag nagpuyo sia sa tunga sang Israel tubtub sining adlaw, bangud nga gintago niya ang mga manugbalita nga ginpadala ni Josue sa paglampitaw sang Jerico.#Heb. 11:31.
26Sadtong tion ginpasumpa sila ni Josue, nga nagasiling, “Pinakamalaut sa atubangan sang Ginoo ang tawo nga nagabangon kag nagatukud sining banwa nga Jerico:
Sa kadulaan sang iya panganay magabutang sia sang sadsaran sini,
kag sa kadulaan sang iya kamanghuran magapatindug sia sang mga gawang sini.”#1 Hari 16:34.
27Gani ang Ginoo nag-upud kay Josue; kag ang iya kadungganan nagguub sa bug-os nga duta.
Currently Selected:
JOSUE 6: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
