JEREMIAS 5
5
Ang mga Sala sang Jerusalem kag Juda
1Dalagan kamo pakadto-pakari sa mga dalan sang Jerusalem,
tan-awa karon kag kilalaha!
Pangitaa sa iya masangkad nga mga duug
kon makakita kamo sing tawo,
kon may yara nga nagahimo sing matarung
kag nagapangita sing kamatooran;
kag ako magapatawad sa iya.
2Bisan nagasiling sila, “Sa nagakabuhi ang Ginoo,”
sa pagkamatuud nagasumpa sila sing dimatuud.
3O Ginoo, wala bala nagatolok ang imo mga mata sa kamatooran?
Ginsakit mo sila,
apang wala sila magkalisud;
ginpapas mo sila,
apang nagdumili sila sa pagbaton sing pagtudlo.
Ginpatig-a nila ang ila mga nawung labi pa sa igang;
nagdumili sila sa pagbalik.
4Niyan nagsiling ako, “Ini sila makalolooy,
mga buangbuang sila;
kay wala sila makakilala sang dalanon sang Ginoo,
ukon sang kasogoan sang ila Dios.
5Makadto ako sa dalagkung mga tawo,
kag magpamolong sa ila;
kay nakakilala sila sang dalanon sang Ginoo,
sang kasogoan sang ila Dios.”
Apang ini sila sing tingub nagbali sang gota,
nagbugras sang mga gapus.
6Busa ang leon gikan sa talon magapatay sa ila,
ang lobo sang mga kahaponon magalaglag sa ila.
Ang leopardo magapuut batok sa ila kabanwaanan,
ang tagsatagsa nga nagagowa gikan didto kusniton;
bangud nga madamu ang ila mga paglalis,
ang ila mga pagtalikod nagadugang.
7“Paano bala ang pagpatawad ko sa imo?
Ang imo mga anak nagbiya sa akon,
kag nagsumpa paagi sa ila nga indi mga dios.
Sang nabusug ko sila,
nagpanglahi sila
kag sa mga balay sang makihilawason nga mga babayi nagtipon sila sa pinanongpanong.
8Subong sila sang sinagud nga mga kabayo nga layaw,
ang tagsatagsa nagahirihiri sa asawa sang iya isigkatawo.
9Indi bala ako magduaw tungud sining mga butang?
nagasiling ang Ginoo;
kag indi bala magtimalus ang akon kalag
sa subong sining pungsud?
10“Sakaa ninyo ang iya mga kuta kag laglagon,
apang dili pagtapuson sing bug-os;
kuhaa ang iya mga sanga,
kay indi sila iya sang Ginoo.
11Kay ang panimalay sang Israel kag ang panimalay sang Juda
nagmabudhion gid sa akon,
nagasiling ang Ginoo.
12Ginpanghiwala nila ang Ginoo,
kag nagsiling, ‘Indi ini sia;
indi mag-abut sa aton ang malaut,
kag indi kita makakita sing espada ukon tiggulutum.
13Ang mga manalagna manginhangin;
wala sa ila ang polong.
Amo ini ang himoon sa ila!’”
14Busa amo ini ang ginasiling sang Ginoo, ang Dios sang mga kasoldadosan:
“Bangud nga naghambal kamo sini nga polong,
yari karon, ang akon mga polong sa imo baba himoon ko nga kalayo,
kag ini nga katawohan kahoy, kag ini magalamon sa ila.
15Yari karon, dalhon ko sa inyo
ang isa ka pungsud gikan sa malayo, O panimalay sang Israel,
nagasiling ang Ginoo.
Ini gamhanan nga pungsud,
dumaan ini nga pungsud,
pungsud nga ang iya hambal wala mo mahibaloi,
kag indi ka makahangup sang ila ginasiling.
16Ang ila baslayan bukas nga lulubngan,
sila tanan gamhanan nga tawo.
17Kaonon nila ang imo patubas kag ang imo kalan-on;
nga kalan-on sang imo mga anak nga lalaki kag sang imo mga anak nga babayi;
kaonon nila ang imo kabakahan;
kaonon nila ang imo uvas kag ang imo mga higuera;
ang imo napamakuran mga banwa nga ginasaligan mo
saksakon nila sang espada.
18“Apang bisan pa sa sadto nga mga adlaw, nagasiling ang Ginoo, indi ko kamo pagtapuson sing bug-os. 19Kag mahanabu, kon magsiling kamo, ‘Ngaa bala nga ang Ginoo nga aton Dios nag-himo sini tanan nga butang sa aton?’ niyan isiling mo sa ila, ‘Kaangay sang inyo pagbiya sa akon kag pag-alagad sa mga dios nga dumuloong sa inyo duta, sa amo magaalagad kamo sa mga dumuloong sa duta nga indi inyo.’”
20Ipahayag ninyo ini sa panimalay ni Jacob,
ibantala ini sa Juda.
21“Pamatii ini karon, O buangbuang nga katawohan kag wala sing paghangup;
nga may mga mata, apang indi makakita,
nga may mga idulungug, apang indi makabati.
22Wala bala kamo mahadluk sa akon? nagasiling ang Ginoo;
Indi bala kamo magkurug sa akon atubangan?
Ako nagbutang sang balas nga dulunan sang dagat,
tungud sa dayon nga mando nga indi ini makalakbay;
bisan ang mga balud sini nagapaibabaw, apang indi sila makalandas,
bisan nagadaguhub sila, apang indi sila makalakbay sini.#Job 38:8-11.
23Apang ini nga katawohan may tagiposoon nga masinumpungon kag mabinatoon;
nagsumpung sila kag nagtaliwan.
24Wala sila nagasiling sa ila tagiposoon,
‘Magkahadluk kita karon sa Ginoo nga aton Dios,
nga nagahatag sing ulan sa iya panag-on,
sang nahauna kag sang naolihi,
kag nagatipig sa aton
sang pinat-ud nga mga semana sang pag-ani.’
25Ang inyo mga kalautan nagpapalayo sini nga mga butang,
kag ang inyo mga sala nagpugung sang maayo gikan sa inyo.
26Kay sa akon katawohan may malauton nga mga tawo nga makita;
nagapuut sila subong sang pagpuut sang mga manugpamispis.
Nagabutang sila sing tiglapak;
nagadakup sila sing mga tawo.
27Subong sang hawla nga puno sang mga pispis,
sa amo ang ila mga balay puno sang limbong;
busa nangindalagku sila kag nagmanggaranon,
28nagtambok sila kag naghining sila.
Nagalabaw sila sa mga buhat sang pagpakamalaut;
wala sila nagaapin sang katarungan
sang katarungan sang ilo, agud nga mag-uswag sila,
kag ang kinamatarung sang nawad-an wala nila ginahukmi.
29Wala bala ako nagasilot sa ila tungud sini nga mga butang?
nagasiling ang Ginoo,
indi bala magtimalus ang akon kalag
sa subong sini nga pungsud?”
30Ang makatilingala kag makakulugmat nga butang
nahanabu sa duta:
31ang mga manalagna nagatagna sing dimatuud,
kag ang mga sacerdote nagagahum tungud sa ila paagi;
ang akon katawohan naluyag nga manginsubong sini,
kag ano bala ang himoon ninyo sa katapusan sini?
Currently Selected:
JEREMIAS 5: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
