JEREMIAS 48
48
Ang Tagna nahanungud sa Moab
1Nahanungud sang Moab.#Isa. 15:1–16:14; 25:10-12; Ezeq. 25:8-11; Amos 2:1-3; Sof. 2:8-11. Amo ini ang ginasiling sang Ginoo sang mga kasoldadosan, ang Dios sang Israel:
“Kailo ang Nebo, kay ginwagwag ini!
Ginapakahuy-an ang Kiryataim, gin-agaw ini;
ang Misgab ginapakahuy-an kag ginlumpag;
2ang pagdayaw sang Moab wala na.
Sa Hesbon nagpahito sila sing malaut batok sa iya:
‘Kari, utdon naton sia sa pagkapungsud!’
Ikaw man, O Madmena, pahipuson;
ang espada magalagas sa imo.
3“Ang kagahud sang singgit gikan sa Horonaim,
‘Kamingaw kag daku nga kalaglagan!’
4Ang Moab ginalaglag;
ang iya mga magamay nagpabati sing singgit.
5Kay sa taklaran sang Luhit
magataklad sila nga may paghibi nga dalayon;
kay sa dulhogan sang Horonaim
nakabati sila sang kapait sang pagsinggit sang kalaglagan.
6Palagyo! Luwasa ang inyo kabuhi!
Magkaangay sa enebro nga agil-agil sa kamingawan!
7Kay, bangud nga nagsalig ka sa imo mga binuhatan kag sa imo mga bahandi,
ikaw man agawon;
kag si Cemos magakadto sa kabihagan,
ang iya mga sacerdote kag ang iya mga principe sing tingub.
8Ang manuglaglag magaabut sa tagsa ka banwa,
kag wala sing banwa nga makapalagyo;
ang nalupyakan man madula,
kag ang kapatagan malaglag,
sono sa napamolong sang Ginoo.
9“Hatagi sing mga pakpak ang Moab,
agud nga maglupad sia kag magpalagyo;
ang iya kabanwaanan manginmamingaw,
nga wala sing bisan sin-o nga magapuyo sa ila.
10“Pinakamalaut ang nagahimo sang buluhaton sang Ginoo sing mapatumbayaon; kag pinakamalaut ang nagapugung sang iya espada sa dugo.
11“Ang Moab nagpatawhay kutub sang iya pagkapamatan-on
kag nagpahimonong sia sa iya mga lalud;
wala sia mahuwad sa suludlan pa suludlan,
ukon nakakadto sa kabihagan;
busa ang iya lalim nagapabilin sa iya,
kag ang iya baho wala magbalhin.
12“Busa, yari karon, nagaabut ang mga adlaw, nagasiling ang Ginoo, nga ako magapadala sa iya sang mga nagahuwad kag ihuwad nila sia, kag kuhaan nila sing unud ang iya mga suludlan, kag boongon ang ila mga tibud. 13Niyan magakahuya ang Moab sang Cemos, subong nga nahuya ang panimalay sang Israel sang Bet-el nga ila salaligan.
14“Paano bala nga nagasiling kamo, ‘Gamhanan kami nga mga tawo
kag isganan nga mga tawo sa inaway’?
15Ang Moab ginalaglag kag nagataklad sila sa iya kabanwaanan,
kag ang iya pinili nga mga pamatan-on nagadulhog sa palatyan,
nagasiling ang Hari, nga ang iya ngalan amo ang Ginoo sang mga kasoldadosan.
16Ang kalalat-an sang Moab malapit sa pag-abut
kag ang iya kapipit-an nagadalidali gid.
17Tanan kamo nga yara sa palibut niya nagakalisud sa iya,
kag tanan kamo nga nakakilala sang iya ngalan;
isiling, ‘Daw ano nga pagkabali sang cetro nga mabakud,
ang sungkud nga matahum.’
18“O ikaw nga babayi nga anak nga nagapuyo sa Dibon,
panaug ka gikan sa imo himaya,
kag maglingkod sa kauhaw!
Kay ang manuglaglag sang Moab nagataklad batok sa imo;
ginlaglag niya ang imo mga pamakud.
19O pumuluyo sang Aroer,
tindug ka sa dalanon, kag magbantay!
Pamangkot sa lalaki nga nagapalagyo kag sa babayi nga nagalikaw;
isiling, ‘Ano bala ang nahimo?’
20Ginpakahuy-an ang Moab, kay ginlumpag sia;
maghaya kag maghibi!
Isugid ninyo ini sa Arnon,
nga ang Moab ginlaglag.
21“Nag-abut ang paghukom sa mapatag nga duta, sa Holon, kag sa Jaza, kag sa Mefaat, 22kag sa Dibon, kag sa Nebo, kag sa Bet-diblataim, 23kag sa Kiryataim, kag sa Bet-gamul, kag sa Bet-meon, 24kag sa Keryot, kag sa Bozra, kag sa tanan nga kabanwaanan sang duta sang Moab, malayo ukon malapit, 25Ang sungay sang Moab ginpungal, kag ang iya butkon ginbali, nagasiling ang Ginoo.
26“Hoboga ninyo sia; kay nagpakadaku sia batok sa Ginoo; kag ang Moab magatubog sa iya suka, kag sia man manginkaladlawan. 27Kay wala bala magmanginkaladlawan ang Israel sa imo? Nakit-an bala sia sa tunga sang mga makawat, kay sa masunsun nga nagapamolong ka nahanungud sa iya nagalongolongo ka sang olo?
28“O kamo nga mga pumuluyo sang Moab,
bayai ang kabanwaanan, kag magpuyo sa mga igang!
Manginkaangay kamo sang alimokon nga nagapugad
sa bibi sang kadadalman.
29Nabatian namon ang bugal sang Moab—
nga bugalon gid sia—
ang iya pagkamatinaastaason, ang iya bugal, kag ang iya pagkamadakudakuon,
kag ang pagpalabilabi sang iya tagiposoon.
30Ako nakakilala sang iya kasingkal, nagasiling ang Ginoo;
nga wala ini sing pulus,
ang iya mga ukag wala sing kapuslanan.
31Busa magahaya ako tungud sa Moab;
magasinggit ako nahanungud sang bug-os nga Moab;
tungud sang mga tawo sang Kir-heres magakalisud ako.
32Labi pa sa paghibi ni Jazer magahibi ako tungud sa imo,
O uvas sang Sibma!
Ang imo mga sanga nagtabok sa dagat,
naglambut gid sila tubtub sa dagat sang Jazer;
sa imo mga bunga sa tingadlaw kag sa imo patubas sang uvas
nagatupa ang manuglaglag.
33Ang kasadya kag ang kalipay ginkuha
sa latagon nga mabungahon sa duta sang Moab;
ginpauntat ko ang alak sa mga linasan sang uvas;
walay na magalinas nga may pagsinggit;
ang pagsinggit indi na pagsinggit sang kalipay.
34“Kutub sa pagsinggit sang Hesbon tubtub sa Eleale; tubtub sa Jahaz nagmitlang sila sang ila tingug, kutub sa Zoar tubtub sa Horonaim kag sa Eglat-selisia. Kay ang mga tubig sang Nimrim man manginmamingaw. 35Labut pa pauntaton ko sa Moab, nagasiling ang Ginoo, ang nagahalad sa mataas nga duug kag ang nagasonog sing incienso sa iya mga dios. 36Busa ang akon tagiposoon nagatonog kaangay sa mga lantoy tungud sang Moab, kag ang akon tagiposoon nagatonog kaangay sa mga lantoy tungud sa mga tawo sang Kir-heres; busa ang kabuganaan nga iya naagum nawala.
37“Kay ang tagsa ka olo upaw kag ang tagsa ka bungut naguruban; sa tanan nga kamut mga pinilas, kag sa mga hawak panapton nga sako. 38Sa tanan nga atop sang Moab kag sa iya mga dalan may panalabiton sa bisan diin; kay ginboong ko ang Moab kaangay sang suludlan nga wala gid sing nahamuut, nagasiling ang Ginoo. 39Daw ano nga nalumpag ini! Daw ano nga paghaya nila! Daw ano nga pagtalikod sang Moab sa kahuya! Gani ang Moab manginkaladlawan kag kakugmat sa tanan nga yara sa iya palibut.”
40Kay amo ini ang ginasiling sang Ginoo:
“Yari karon, magalupad sila subong sang aguila,
kag magahumlad sang iya mga pakpak batok sa Moab;
41ang Ceryot naagaw
kag ang mga pamakud nakuha.
Ang tagiposoon sang gamhanan nga mga tawo sang Moab sa sadto nga adlaw
manginsubong sang tagiposoon sang babayi sa iya mga kasakit;
42ang Moab laglagon kag indi na manginkatawohan,
bangud nga nagpakadaku sia sang iya kaugalingon batok sa Ginoo.
43Ang kahadluk, ang boho, kag ang siod
yara sa imo, O pumuluyo sang Moab!
nagasiling ang Ginoo.
44Ang nagapalagyo sa kahadluk
maholog sa boho,
kag ang nagagowa sa boho
masiod sia.
Kay dalhon ko ining mga butang sa Moab
sa tuig nga pagsilot sa ila,
nagasiling ang Ginoo
45“Ang mga nagapalagyo nagatindug nga walay kusug
sa idalum sang landong sang Hesbon;
kay ang isa ka kalayo magagowa sa Hesbon,
ang dabdab gikan sa tunga sang Sihon;
ini naglamon sang pamusud sang Moab,
sang alipudwan sang mga manugpagubut.
46Kailo sa imo, O Moab!
Ang katawohan ni Cemos natapus;
kay ang imo mga anak nga lalaki ginadala nga bihag,
kag ang imo mga anak nga babayi ginadala sa kabihagan.
47Apang pahaulian ko ang kabihagan sang Moab
sa olihing mga adlaw, nagasiling ang Ginoo.”
Tubtub diri ang paghukom sa Moab.
Currently Selected:
JEREMIAS 48: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
