JEREMIAS 46
46
Mga Tagna nahanungud sa Egipto
1Ang polong sang Ginoo nga nag-abut kay Jeremias nga manalagna nahanungud sa mga pungsud.
2Nahanungud sa Egipto. Nahanungud sang hangaway ni Faraon-necao nga hari sang Egipto,#Isa. 19:1-25; Ezeq. 29:1–32:32. nga yara sa ubay sang suba nga Eufrates sa Carquemis nga ginsamad ni Nabucodonosor nga hari sa Babilonia sang ikap-at nga tuig ni Joaquim nga anak ni Josias, hari sang Juda:
3“Amana ninyo ang kalasag kag ang taming,
kag magpalapit sa inaway!
4Takdi ang mga kabayo;
magsakay, kamo nga mga manugkabayo!
Magbato kamo nga may inyo nga mga pandong,
pahininga ang mga bangkaw,
isuklub ang mga limbutong!
5Ngaa bala nakita ko ini?
Nahangawa sila
kag nagtalikod.
Ang ila mga gamhanan ginlutus,
kag nagpalagyo sing madasig;
wala magbalikid—
ang kakugmat yara sa tagsa ka luyo!
nagasiling ang Ginoo.
6Dili pagpapalagyoha ang madasig,
ukon pagpalikawa ang gamhanan nga tawo;
sa aminhan sa ubay sang suba nga Eufrates
nagkasandad sila kag napukan.
7“Sin-o bala ini, nga nagataas kaangay sang Nilo,
nga ang iya mga tubig nagatumbotumbo kaangay sang mga suba?
8Ang Egipto nagataas kaangay sang Nilo,
ang iya mga tubig nagatumbotumbo sila kaangay sang mga suba.
Nagasiling sia, Magataas ako, tabonan ko ang duta,
laglagon ko ang mga banwa kag ang iya mga pumuluyo.
9Taklad, kamo nga mga kabayo,
kag magkasingkal, kamo nga mga kangga!
Palakta ang mga tawo nga gamhanan:
ang Cus kag ang Put nga nagauyat sang taming,
ang Ludim, nga nagauyat kag nagabingat sang pana.
10Kay yadto nga adlaw amo ang adlaw sang Ginoong Dios sang mga kasoldadosan,
adlaw sang pagtimalus,
agud nga matimalusan niya sia sang iya mga kasumpung,
Ang espada magahalunhon kag mabusug,
kag magainum sa dugo nila.
Kay ang Ginoong Dios sang mga kasoldadosan may halad
sa duta sang aminhan sa ubay sang suba nga Eufrates.
11Taklad ka sa Galaad, kag magkuha sing balsamo,
O ulay nga anak sang Egipto!
Wala sing pulus nga maggamit ka sing madamu nga mga bolong;
wala sing pag-ayo nga sa imo.
12Ang mga pungsud nakabati sang imo kahuluy-an,
kag ang duta puno sang imo singgit;
kay ang gamhanan nga tawo nakasunggo batok sa gamhanan;
napukan sila nga duha sing tingub.
13Ang polong nga ginpamolong sang Ginoo kay Jeremias nga manalagna kon paano nga si Nabucodonosor nga hari sang Babilonia magaabut kag magasamad sang duta sang Egipto:#Jer. 43:10-13.
14“Ipahayag ninyo sa Egipto, kag ibantala sa Migdol;
ibantala sa Memphis kag sa Tafnes;
Isiling, ‘Magtindug kag mag-aman ka,
kay ang espada naghalunhon sa palibut mo.’
15Ngaa bala ginsilhig ang imo mga makusug?
Ngaa bala wala sila magtindug?
Bangud nga ang Ginoo nagtabog sa ila.
16Ginpasandad niya ang madamu kag napukan sila,
kag nagsinilingay sila,
‘Tindug, kag magbalik kita sa aton kaugalingon nga katawohan
kag sa duta nga aton natawohan,
gikan sa espada nga nagapigus.’
17Tawga ninyo ang ngalan ni Faraon nga hari sang Egipto,
‘Isa ka kagahud lamang nga nagapaligad sang tion nga tinangdo.’
18“Sa nagakabuhi ako, nagasiling ang Hari,
nga ang iya ngalan ang Ginoo sang mga kasoldadosan,
kaangay sang Tabor sa tunga sang kabukiran,
kag kaangay sang Carmelo sa ubay sang dagat, sa amo magakari sia.
19O ikaw nga anak nga babayi nga nagapuyo sa Egipto,
panghimos ka sa pagkadto sa kabihagan!
Kay ang Memphis manginkamingawan,
masonog, nga wala sing pumuluyo.
20“Ang Egipto magayon gid nga bakiya,
apang ang kalaglagan gikan sa aminhan nag-abut sa iya.
21Ang iya man nga mga tawo nga sinoholan sa tunga niya
kaangay sang mga tinday nga baka sang palatambokan;
kay sila man nagabalik kag nagapalagyo sing tingub,
wala sila magbato;
kay nagaabut sa ila ang adlaw sang ila kalalat-an,
ang tion sang pagsilot sa ila.
22“Ang iya kagahud magaagi kaangay sang man-ug;
kay magalakat sila nga may hangaway,
kag magaabut batok sa iya nga mga may wasay,
subong sang mga manugpulud sang kahoy.
23Pudlon nila ang iya talon,
nagasiling ang Ginoo,
bisan indi ini masughut,
bangud nga madamu pa sila sa mga apan;
sila dimaisip.
24Ang babayi nga anak sang Egipto pakahuy-an,
itugyan sia sa kamut sang katawohan sang aminhan.”
25Ang Ginoo sang mga kasoldadosan, ang Dios sang Israel, nagasiling: “Yari karon, silotan ko si Amon sang No, kag si Faraon, kag ang Egipto pati ang iya mga dios kag ang iya mga hari, bisan si Faraon kag ang mga nagasalig sa iya. 26Itugyan ko sila sa kamut sang mga nagatinguha sang ila kabuhi, sa kamut ni Nabucodonosor nga hari sang Babilonia kag sa kamut sang iya mga alagad. Ugaling puy-an ini subong sang sa mga adlaw nga dumaan, nagasiling ang Ginoo.
27“Apang dili ka magkahadluk, O Jacob nga alagad nakon,
ukon magkahangawa, O Israel;
kay yari karon, luwason ko ikaw gikan sa malayo,
kag ang imo kaliwat gikan sa duta sang ila kabihagan.
Si Jacob magabalik kag manginmalinong kag matawhay,
kag wala gid sing magapahadluk sa iya.
28Dili ka mahadluk, O Jacob nga akon alagad,
nagasiling ang Ginoo,
kay nagaupud ako sa imo.
Tapuson ko sing bug-os ang tanan nga pungsud
diin ginsobol ko ikaw,
apang dili ko ikaw pagtapuson sing bug-os.
Tudloan ko ikaw sa talaksan,
kag dili nga mas-a bayaan ikaw nga dimasilotan.”
Currently Selected:
JEREMIAS 46: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
