JEREMIAS 14
14
Ang Balita nahanungud sa Tingadlaw
1Ang polong sang Ginoo nga nag-abut kay Jeremias nahanungud sang malawig nga tingadlaw:
2“Nagakalisud ang Juda,
kag ang iya mga gawang nagakag-as;
nagalingkod sila sa duta nga nagalalaw,
kag ang pagtuaw sang Jerusalem nagasaka.
3Ang ila mga dungganon nagpadala sang ila mga magamay sa mga tubig;
nagakadto sila sa mga tangke,
wala makakita sing tubig,
nagapauli sila nga walay sulud ang ila mga suludlan;
nahuy-an sila kag ginlibogan
kag nagapanabon sang ila mga olo.
4Bangud nga nagpanglitik ang duta,
kay walay ulan sa duta,
ang mga manug-arado nahuy-an,
nagpanabon sila sang ila mga olo.
5Bisan ang mga usa man nga babayi sa latagon nagaanak kag nagabiya sang iya tinday
bangud nga walay hilamon.
6Ang mga asno nga talonon nagatindug sa hublas nga mga kataasan,
nagahakalhakal sila tungud sa hangin kaangay sang mga chacal;
nagadulum ang ila mga mata
bangud nga walay hilamon.
7“Bisan ang amon mga kalautan nagapamatuud batok sa amon,
O Ginoo, panghikot ka tungud sa imo ngalan;
kay ang amon mga pagtalikod madamu,
nakasala kami batok sa imo.
8O ikaw nga lalauman sang Israel,
ang Manluluwas niya sa tion sang kalisdanan,
ngaa bala nga magmanginsubong ka sang manlulugayaw sa duta,
subong sang manlalakat nga nagahapit sa pagpabilin sa isa ka gab-i?
9Ngaa bala manginsubong ka sang tawong nakayasan,
subong sang gamhanan nga tawo nga indi makaluwas?
Apang ikaw yari sa tunga namon, O Ginoo,
kag ginatawag kami sa imo ngalan;
dili kami pagbayai.”
10Amo ini ang ginasiling sang Ginoo sa sining katawohan:
“Bisan pa man naluyag sila sa paglagaw,
wala nila pagpunggi ang ila mga tiil;
busa ang Ginoo wala nagabaton sa ila,
karon dumdumon niya ang kalautan nila
kag silotan ang ila mga sala.”
11Nagsiling sa akon ang Ginoo: “Dili ka magpangamuyo tungud sining katawohan sa kaayohan nila. 12Kon magpuasa sila, indi ako magpamati sang ila pagtuaw, kag kon magdolot sila sing halad-nga-sinonog kag halad-nga-kalan-on, indi ko sila pagbatonon; kondi papason ko sila sa espada, sa tiggulutum, kag sa kamatay.”
13Niyan ako nagsiling, “Ah, Ginoong Dios, yari karon, ang mga manalagna nagasiling sa ila, ‘Indi kamo makakita sang espada, ukon may tiggulutum kamo, kondi hatagan ko kamo sing malig-on nga paghidait sa sining duug.’” 14Niyan nagsiling sa akon ang Ginoo: “Ang mga manalagna nagatagna sing kabutigan sa akon ngalan; wala ko pag-ipadala sila, ukon ginsogo sila ukon nagpamolong ako sa ila. Nagatagna sila sa inyo sing binutig nga palanan-awon, pagpamakot nga walay pulus, kag limbong sang ila tagiposoon. 15Busa amo ini ang ginasiling sang Ginoo nahanungud sa mga manalagna nga nagatagna sa akon ngalan, bisan wala ko sila pag-ipadala, apang nagasiling sila, ‘Ang espada kag ang tiggulutum indi mag-abut sa sining duta’: Sa espada kag sa tiggulutum papason yadtong mga manalagna. 16Kag ang katawohan nga ginatagnaan nila ipilak sa mga dalan sang Jerusalem, bangud sang tiggulutum kag sang espada, nga wala gid sing magalubung sa ila—sila, ang ila mga asawa, ang ila mga anak nga lalaki, kag ang ila mga anak nga babayi. Kay iula ko sa ibabaw nila ang pagkamalaut nila.
17“Magsiling ka sa ila sining polong:
‘Mag-ilig sa akon mga mata ang mga luha sa gab-i kag adlaw,
kag indi sila mag-untat,
kay ang ulay nga babaying anak sang akon katawohan naboong sa dakung pagkaboong,
sa tama gid nga pilas.
18Kon maggowa ako sa latagon,
yari karon, ang mga pinatay sa espada!
Kag kon magsulud ako sa banwa,
yari karon, ang mga nagabalatian sa tiggulutum!
Kay ang manalagna kag ang sacerdote nagalagaw sa duta,
kag walay ihibalo.’”
19Ginsikway mo bala sing bug-os ang Juda?
Nagakangil-ad bala ang imo kalag sa Sion?
Ngaa bala ginpilas mo kami
kag walay pag-ayo nga sa amon?
Naghulat kami sang paghidait, apang walay kaayohan nga nag-abut;
sang tion sang pag-ayo, apang yari karon, kahangawa.
20Ginakilala namon, O Ginoo, ang amon pagkamalaut,
kag ang kalautan sang amon mga ginikanan;
kay sa imo nakasala kami.
21Dili kami pagkangil-ari, tungud sa imo ngalan;
dili pagkahuy-i ang trono sang imo himaya;
dumduma kag dili pagbungkaga ang imo katipan sa amon.
22May dira bala sa tunga sang mga kadayawan sang mga pungsud nga makapaulan?
Ukon makahatag bala sing mga talithi ang mga langit?
Indi bala ikaw sia, O Ginoo nga amon Dios?
Sa imo nagahulat kami,
kay ikaw nagahimo sini tanan nga butang.
Currently Selected:
JEREMIAS 14: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
