HUKOM 5
5
Ang Ambahanon ni Debora kag ni Barak
1Niyan sa sadtong adlaw nag-amba si Debora kag si Barak nga anak ni Abinoam:
2“Tungud nga ang mga pangolo nagpangolo sa Israel,
tungud nga ang katawohan nagdolot sang ila kaugalingon sing kinabubut-on,
pakamaayoha ninyo ang Ginoo!
3“Pamati, O kamo nga mga hari; dungga, O kamo nga mga principe;
ako magaamba sa Ginoo,
magaamba ako sing pagdayaw sa Ginoo, ang Dios sang Israel.
4“Ginoo, sang paggowa mo gikan sa Seir,
sang paglakat mo gikan sa latagon sang Edom,
ang duta nagkurug,
kag ang mga langit naholog,
hoo, ang mga gal-um nagholog sing tubig.
5Ang mga bukid nag-uyug sa atubangan sang Ginoo,
ang Sinai sa unhan sa atubangan sang Ginoo, ang Dios sang Israel.#Ex. 19:18.
6“Sa mga adlaw ni Samgar, anak ni Anat,
sa mga adlaw ni Jael, ang mga dalan nga daku wala maagihi
kag ang mga manlalakat naglatas sa mga banas.
7Ang mga manuggahum nag-untat sa Israel, nag-untat sila
tubtub nga ikaw, Debora, nagtindug,
nagtindug subong nga iloy sa Israel.
8Sang nagpili sila sing mga diosdios nga bag-o,
niyan may inaway sa mga gawang.
May nakit-an bala nga taming ukon bangkaw
sa tunga sang kap-atan ka libo sa Israel?
9Ang akon tagiposoon yara sa mga pangolo-puud sang Israel
nga nagdolot sang ila kaugalingon sing kinabubut-on sa tunga sang katawohan.
Pakamaayoha ang Ginoo.
10“Magsugid sini, kamo nga nagasakay sa maputi nga mga asno,
kamo nga nagalingkod sa malahalon nga mga alfombra
kag kamo nga nagalakat sa dalanon.
11Malayo sa kagahud sang mga manugpana sa mga duug nga salag-uban sing tubig,
didto suliton nila ang matarung nga mga binuhatan sang Ginoo,
ang matarung nga mga binuhatan sang iya paggahum sa Israel.
“Niyan ang katawohan sang Ginoo nagdulhog sa mga gawang.
12“Bangon, bangon, Debora!
Bangon, bangon, mitlang sing ambahanon!
Tindug, Barak, kag dalha ang imo mga bihag,
O anak ni Abinoam.
13Niyan nagdulhog ang nabilin sang mga dungganon;
ang katawohan sang Ginoo nagdulhog tungud sa akon batok sa gamhanan.
14Gikan sa Efraim nagdulhog sila nga ang ila gamut sa Amalec,
sa olihi mo, Benjamin, sa tunga sang imo mga katawohan;
gikan sa Maquir nagdulhog ang mga punoan,
kag gikan sa Zabulon ang mga nagadala sang baston sang pangolo;
15ang mga principe sang Isacar upud kay Debora,
kag si Isacar matutum kay Barak;
pasulud sa nalupyakan nagdinaguso sila sa iya tiilan.
Sa mga iligan sang tubig ni Ruben
may dalagkung mga pagtapat sang tagiposoon.
16Ngaa bala naglingkod ka sa tunga sang mga toril sang carnero,
sa pagpamati sang mga panglantoy sa mga panong?
Sa mga iligan sang tubig ni Ruben
may dalagkung mga pangusisa sang tagiposoon.
17Si Galaad nagpabilin sa tabok sang Jordan;
kag si Dan, ngaa bala nagpabilin sia sa mga sakayan?
Si Aser naglingkod sing malinong sa dungkaan sang dagat,
nagpabilin sa ubay sang iya mga sapa.
18Ang Zabulon katawohan nga nagpakatalagman sang ila kabuhi tubtub sa kamatayon;
si Neftali man, sa mataas nga mga duug sang latagon.
19“Ang mga hari nag-abut, sila nag-away;
niyan nag-away ang mga hari sang Canaan,
sa Taanac, sa ubay sang mga tubig sang Meguido;
wala sila magkuha sing daug nga cuarta.
20Gikan sa langit nagpakig-away ang mga bitoon,
gikan sa ila sa mga alagyan nagpakig-away sila batok kay Sisera.
21Ang suba nga Cison nag-anud sa ila,
yadto nga dumaan nga suba, ang suba nga Cison.
O kalag ko, lakat nga may kusug!
22“Niyan nagalapaklapak ang mga koko sang kabayo
tungud sa mga pagpaso, mga pagpaso sang iya mga makusug.
23“Pakamalauta ninyo ang Meroz, nagsiling ang manugtunda sang Ginoo,
pakamalauta ninyo sing mapait ang iya mga pumuluyo,
bangud nga wala sila magbulig sa Ginoo,
sa pagbulig sa Ginoo batok sa gamhanan.
24“Pakabulahanon labaw sa mga babayi si Jael,
ang asawa ni Heber nga Cenhanon,
pakabulahanon sia labaw sa mga babayi sa layanglayang.
25Nangayo si Sisera sing tubig kag ginhatagan niya sia sing gatas,
gindalhan niya sia sing latab sa harianon nga pinggan.
26Ang iya kamut nagkaput sa palpal sang layanglayang
kag ang iya too sa palo sang mga panday;
ginpalpag niya si Sisera sang palo,
ginpalpag niya lapus sa iya olo,
ginpadutlan niya kag ginpalapsan ang iya mga dungandungan.
27Sa iya tiilan nagduko sia, napukan sia, naghigda sia;
sa iya tiilan nagduko sia, napukan sia;
diin nagduko sia, didto sia napukan nga patay.
28“Gikan sa galawahan naglantaw sia, kag nagtiabaw,
sa lipud sang balatibat nagtiabaw ang iloy ni Sisera:
‘Ngaa bala nagdugay ang iya kangga sa pag-abut?
Ngaa bala nagalantang ang mga aliling sang iya mga kangga?’
29Ang iya maalam nga mga babayi nga halangdon nagsabat sa iya,
hoo, nagsabat sia sa iya kaugalingon,
30‘Wala bala sila makakita kag wala bala sila makabahinbahin sang inagaw?—
Isa ka dalaga ukon duha ka dalaga sa tagsa ka lalaki;
sa kay Sisera ang inagaw nga mga panapton nga linugum,
ang inagaw nga linugum nga mga panapton nga nabordahan,
nga linugum nga mga panapton nga nabordahan sa pihak kag pihak sa mga liog sang inagaw?’
31“Gani magmawala ang tanan mo nga kaaway, O Ginoo!
Apang ang mga nagahigugma sa iya manginsubong sang adlaw sa nagapadayon sia sa iya gahum.”
Kag ang duta may pahuway nga kap-atan ka tuig.
Currently Selected:
HUKOM 5: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society