HUKOM 4
4
Si Debora kag si Barak Nagadaug kay Sisera
1Kag liwat ang katawohan sang Israel naghimo sang malaut sa itololok sang Ginoo, sang patay na si Ehud. 2Kag ginbaligya sila sang Ginoo sa kamut ni Jabin nga hari sang Canaan, nga naghari sa Hazor; ang kapitan sang iya kasoldadosan si Sisera, nga nagpuyo sa Haroset sang mga Gentil. 3Niyan ang katawohan sang Israel nagtuaw sa Ginoo; kay sia may siam ka gatus ka kangga nga salsalon, kag ginpigus niya ang katawohan sang Israel sing lakas sa duha ka pulo ka tuig.
4Karon si Debora, manalagna nga babayi, ang asawa ni Lapidot, naghukom sia sadtong tion sang Israel. 5Naglingkod sia sa idalum sang palma ni Debora sa hulut sang Rama kag Bet-el sa kabakoloran sang Efraim; kag ang katawohan sang Israel nagtaklad pakadto sa iya nga paghukman. 6Nagpadala sia kag nagpatawag kay Barak nga anak ni Abinoam gikan sa Cades-neftali, kag nagsiling sa iya, “Wala bala nagasogo ang Ginoo, ang Dios sang Israel, ‘Lakat, magpalapit sa Bukid nga Tabor, kag dala ka kaupud nimo sing napulo ka libo ka lalaki sa mga anak sang Neftali kag sa mga anak sang Zabulon? 7Kag buyukon ko sa imo sa suba nga Kision, si Sisera, ang pangolo sang hangaway ni Jabin, pati sang iya mga kangga kag sang iya kadam-an; kag itugyan ko sia sa imo kamut.’” 8Si Barak nagsiling sa iya, “Kon ikaw mag-upud sa akon, niyan ako magalakat; apang kon indi ka mag-upud sa akon, indi ako maglakat.” 9Kag nagsiling sia, “Magaupud ako sa imo sa pagkamatuud; wala sing sapayan, indi manginsa kadungganan mo ang imo paglakat, kay ibaligya sang Ginoo si Sisera sa kamut sang babayi.” Niyan nagtindug si Debora, kag nag-upud kay Barak pa Cades. 10Kag ginpatawag sing tingub ni Barak ang Zabulon kag ang Neftali sa Cades; kag nagtaklad sa olihi niya ang napulo ka libo ka lalaki; kag si Debora nagtaklad kaupud niya.
11Karon si Heber nga Cenhanon nagbulag sa mga Cenhanon, sa anak ni Hobab nga bayaw ni Moises, kag nagpatindug sang iya layanglayang tubtub sa terebinto sa Saananim, nga yara sa luyo sang Cades.
12Sang ginsugid nila kay Sisera nga si Barak nga anak ni Abinoam nagtaklad sa Bukid nga Tabor, 13gintipon ni Sisera ang tanan niya nga kangga, siam ka gatus ka kangga nga salsalon, kag ang bug-os nga katawohan kaupud niya, kutub sa Haroset sang mga Gentil tubtub sa suba nga Cison. 14Kag si Debora nagsiling kay Barak, “Tindug ka! Kay amo ini ang adlaw nga si Sisera gintugyan sang Ginoo sa imo kamut. Wala bala maggowa ang Ginoo sa una nimo?” Gani si Barak nagdulhog sa Bukid nga Tabor pati ang napulo ka libo ka lalaki sa olihi niya. 15Kag gindaug sang Ginoo si Sisera kag ang tanan niyang kangga kag ang bug-os niyang kasoldadosan sa sulab sang espada sa atubangan ni Barak; kag si Sisera nagpanaug sa iya kangga kag nagpalagyo nga nagatiil. 16Apang ginlagas ni Barak ang mga kangga kag ang kasoldadosan tubtub sa Haroset sang mga Gentil, kag ang bug-os nga kasoldadosan ni Sisera napukan sa sulab sang espada; wala sing lalaki nga nabilin.
17Apang si Sisera nagpalagyo nga nagatiil sa layanglayang ni Jael, nga asawa ni Heber nga Cenhanon; kay may paghidait sa tunga ni Jabin nga hari sang Hazor kag sang panimalay ni Heber nga Cenhanon. 18Kag si Jael naggowa sa pagsugata kay Sisera, kag nagsiling sa iya, “Sulud ka, ginoo ko, sulud sa akon; dili magkahadluk.” Gani nagsulud sia sa iya layanglayang, kag gintabonan niya sia sing habol. 19Kag nagsiling sia kay Jael, “Ginaampo ko sa imo, paimna ako sing diotay nga tubig; kay ginauhaw ako.” Gani binuksan ni Jael ang isa ka suludlan nga panit nga may gatas kag ginpainum sia kag gintabonan sia. 20Kag nagsiling sia sa iya, “Tindug ka sa ganhaan sang layanglayang, kag kon ang bisan sin-o mag-abut kag mamangkot sa imo, ‘May lalaki bala diri?’ magsiling ka, Wala.” 21Apang si Jael nga asawa ni Heber nagkuha sing palpal sang layanglayang, kag nagkuha sing palo, kag nagkadto sing hinay sa iya kag ginpadulut ang palpal sa iya mga dungandungan, kag naglapus ini sa duta, kay hamook ang tolog niya. Gani nalipong sia kag napatay. 22Kag yari karon, sang si Barak naglagas kay Sisera, si Jael naggowa sa pagsugata sa iya, kag nagsiling sa iya, “Kari, kag ipakita ko sa imo ang lalaki nga imo ginapangita.” Gani nagsulud sia sa iya layanglayang; kag didto si Sisera nagahigda nga patay, nga may palpal nga nagaungut sa iya mga dungandungan.
23Gani sa sadtong adlaw ginpasakup sang Dios si Jabin nga hari sang Canaan sa atubangan sang katawohan sang Israel. 24Kag ang kamut sang katawohan sang Israel naglandas sing labi kag labi pa batok kay Jabin nga hari sang Canaan, tubtub nga nalaglag nila si Jabin nga hari sang Canaan.
Currently Selected:
HUKOM 4: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society