HUKOM 3
3
Ang mga Pungsud nga Nabilin sa Pagtilaw sa Israel
1Karon amo ini ang mga pungsud nga ginbilin sang Ginoo, sa pagtilaw sang Israel paagi sa ila, ang kapid-an sang Israel nga wala makaagi sang tanan nga inaway sa Canaan; 2lamang nga ang mga kaliwatan sang katawohan sang Israel makakilala, sa pagtudlo sa ila sang inaway sa kubus gid nga kutub sang una wala makakilala sini. 3Amo ini ang mga pungsud: ang lima ka ginoo sang mga Filistinhon, kag ang tanan nga Canaanhon, kag ang mga Sidonhon, kag ang mga Hevhanon nga nagpuyo sa Bukid nga Libano, kutub sa Bukid nga Baal-hermon tubtub sa salamputan sang Hamat. 4Sila nabilin sa pagtilaw sang Israel paagi sa ila, sa paghibalo kon bala magapamati ang Israel sa mga sogo sang Ginoo, nga iya ginsogo sa ila mga ginikanan paagi kay Moises. 5Gani ang katawohan sang Israel nagpuyo sa tunga sang mga Canaanhon, sang mga Hethanon, sang mga Amornon, sang mga Pereznon, sang mga Hevhanon, kag sang mga Jebusnon; 6kag nagpangasawa sila sang ila mga anak nga babayi, kag ginhatag ang ila mga anak nga babayi sa mga anak nga lalaki nila; kag nag-alagad sa ila mga dios.
Si Otniel Nagaluwas sang Israel gikan kay Cusan-risataim
7Kag ang katawohan sang Israel naghimo sang malaut sa itololok sang Ginoo, kag nalimot sa Ginoo nga ila Dios, kag nag-alagad sa mga Baal kag sa Aserot. 8Busa ang kaakig sang Ginoo nagdabdab batok sa Israel, kag ginbaligya niya sila sa kamut ni Cusan-risataim nga hari sang Mesopotamia; kag nag-alagad ang katawohan sang Israel kay Cusan-risataim sing walo ka tuig. 9Apang sang nagtuaw ang katawohan sang Israel sa Ginoo, ang Ginoo nagbangon sing manluluwas sa katawohan sang Israel, nga nagluwas sa ila, si Otniel nga anak ni Cenaz, manghud ni Caleb. 10Ang Espiritu sang Ginoo nag-abut sa iya, kag naghukom sia sa Israel; naggowa sia sa pagpakig-away, kag gintugyan sang Ginoo sa iya kamut si Cusan-risataim nga hari sang Mesopotamia; kag naglandas ang iya kamut batok kay Cusan-risataim. 11Gani ang duta nagpahuway sing kap-atan ka tuig. Niyan napatay si Otniel nga anak ni Cenaz.
Si Ehud Nagaluwas sang Israel gikan sa Moab
12Kag liwat ang katawohan sang Israel naghimo sang malaut sa itololok sang Ginoo; kag ginpabaskug sang Ginoo si Eglon nga hari sang Moab batok sa Israel, bangud nga nahimo nila ang malaut sa itololok sang Ginoo. 13Gintingub ni Eglon kaupud niya ang mga anak ni Amon kag ni Amalec, kag naglakat sia kag gindaug ang Israel; kag gintag-iyahan ang banwa sang mga palma. 14Kag nag-alagad ang katawohan sang Israel kay Eglon nga hari sang Moab sing napulo kag walo ka tuig.
15Apang sang nagtuaw ang katawohan sang Israel sa Ginoo, ang Ginoo nagbangon sing manluluwas sa ila, si Ehud, nga anak ni Gera, ang Benjaminhon, tawong walis. Ang katawohan sang Israel nagpadala paagi sa iya sing buhis kay Eglon nga hari sang Moab. 16Kag si Ehud naghimo nga sa iya sing espada nga duha sing sulab, isa ka maniko ang kalaba; kag gintaklus niya ini sa idalum sang iya mga panapton sa iya paa nga too. 17Kag ginhatag niya ang buhis kay Eglon nga hari sang Moab. Karon si Eglon tawo nga tama katambok. 18Kag sang nakatapus si Ehud sa pagdolot sang buhis, ginpalakat niya ang mga tawo nga nagdala sang buhis. 19Apang sia iya nagbalik sa mga batong tinigban sa luyo sang Gilgal, kag nagsiling, “O hari, may balita ako nga tago nga sa imo.” Kag si Eglon nagsiling, “Hipus.” Kag naghalin sa iya ang tanan nga nagtindug sa luyo niya. 20Kag nagkadto si Ehud sa iya, kag sia iya naglingkod nga isa lamang sa matugnaw nga hulut nga naibabaw. Kag si Ehud nagsiling, “May balita ako gikan sa Dios nga sa imo.” Kag nagtindug sia gikan sa lingkoran niya. 21Kag ginkuut ni Ehud ang iya kamut nga wala, gingabut ang espada gikan sa iya paa nga too, kag ginbuno ini sa iya lawas; 22kag ang polo man nagsalup upud sa sulab, kay ang tambok nagtabon sa sulab, kay wala niya paggabuta ang espada sa iya lawas; kag naglapus ini sa likod. 23Niyan si Ehud naggowa sa balkon, kag gintakpan sa iya ang ganhaan sang hulut nga naibabaw, kag ginpintalan sila.
24Sang nakagowa na sia, nag-abut ang mga alagad sang hari; kag sang nakita nila ang mga ganhaan sang hulut nga naibabaw nga napintalan, naghunahuna sila, “Nagapahuway sia sa hulut nga matugnaw.” 25Kag naghulat sila tubtub nga ginbakag sila; apang sang wala pa niya pagbuksi ang mga ganhaan sang hulut nga naibabaw, ginkuha nila ang yabi, kag ginbuksan sila; kag didto ang ila ginoo napukan nga patay sa salog.
26Sang nagapalantang sila, si Ehud nagpalagyo, kag nag-agi sa unhan sang mga batong tinigban, kag nagpalagyo pa Seira. 27Sang nag-abut sia, nagpatonog sia sing budyong sa kabakoloran sang Efraim; kag ang katawohan sang Israel nagdulhog kaupud niya gikan sa kabakoloran, kag sia sa una nila. 28Kag nagsiling sia sa ila, “Sonod kamo sa akon; kay gintugyan sang Ginoo sa inyo mga kamut ang inyo mga kaaway nga mga Moabnon.” Gani nagdulhog sila sa olihi niya, kag gin-agaw nila ang mga obogan sang Jordan batok sa mga Moabnon, kag wala magtugut nga magtabok ang bisan sin-ong tawo. 29Kag sa sadtong tion ginpatay nila sa Moab ang napulo ka libo ka lalaki, ang tagsa ka mabakud kag isganan nga lalaki; wala sing bisan isa ka lalaki nga nakapalagyo. 30Gani ang Moab ginsakup sadtong adlaw sa idalum sang kamut sang Israel. Kag ang duta may pahuway nga kawaloan ka tuig.
Si Samgar Nagaluwas sang Israel gikan sa mga Filistinhon
31Sa olihi niya si Samgar nga anaki ni Anat, nagpatay sa mga Filistinhon sing anum ka gatus ka lalaki sa sontok sa baka; kag sia man nagluwas sang Israel.
Currently Selected:
HUKOM 3: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
