ISAIAS 13
13
Ang Lulan sang Babilonia
1Ang lulan sang Babilonia#Isa. 47:1-15; Jer. 50:1–51:64. nga nakita ni Isaias nga anak nga lalaki ni Amoz.
2Patindug kamo sing hayahay sa ibabaw sang mahawan nga bukid,
baskuga ang tingug sa ila;
ibalabad ang kamut nga magsulud sila
sa mga gawang sang mga dungganon.
3Ginsogo ko ang akon mga pinakabalaan,
gintawag ko ang akon gamhanan nga mga tawo tungud sa akon kaakig,
bisan ang akon mga bugalon nga malipayon.
4Ang kagahud sang kadam-an sa kabukiran
subong sang daku nga katawohan!
Ang kagahud sang kagubut sang mga ginharian,
sang mga pungsud nga nagtipon sing tingub!
Ang Ginoo sang mga kasoldadosan nagalista
sang kasoldadosan nga sa inaway.
5Nagaabut sila gikan sa malayo nga duta,
sa ukbung gid sang langit,
ang Ginoo kag ang mga hinganiban sang iya kaalipungut,
sa paglaglag sang bug-os nga duta.
6Haya kamo, kay malapit na ang adlaw sang Ginoo;
magaabut ini subong nga kalaglagan gikan sa Makaako!#Joel 1:15.
7Busa magaluya ang tanan nga kamut,
kag matunaw ang tagsa ka tagiposoon,
8kag magakahangawa sila.
Dakpon sila sang mga kasakit kag mga kasubo;
manginsa kasakit sila subong sang babayi nga ginasakitan.
Magatolokay sila nga may katingala;
ang ila mga nawung mga nawung sang dabdab.
9Yari karon, ang adlaw sang Ginoo nagaabut,
nga mapintas, nga may kasingkal kag mabangis nga kaakig,
sa pagpamingaw sang duta
kag sa paglaglag sang mga makasasala sini sa iya.
10Kay ang kabitoonan sang langit kag ang mga pinonsok sini
indi na maghatag sang ila kapawa;
ang adlaw pagadulman sa iya pagbutlak
kag ang bulan indi na magsilak sang iya kapawa.#Mat. 24:29; Mar. 13:24-25; Luc. 21:25; Bug. 6:12-13; 8:12.
11Silotan ko ang kalibutan tungud sang kalautan,
ang mga malauton tungud sang ila kalautan;
kag pauntaton ko ang pagpahabok sang mga bugalon,
kag paubson ko ang pagpalabilabi sang mga makakulugmat.
12Himoon ko nga ang tawo magahina pa sa bulawan nga bus-og,
kag ang tawo sang sa ulay nga bulawan sang Ofir.
13Busa pakurugon ko ang kalangitan,
kag uyugon ang duta gikan sa iya duug,
sa kasingkal sang Ginoo sang mga kasoldadosan
sa adlaw sang iya mabangis nga kaakig.
14Kag subong sang gasela nga ginlagas,
ukon subong sang carnero nga wala ginatipon sang tawo,
magapauli ang tagsa ka tawo sa iya kaugalingon nga katawohan,
kag ang tagsa ka tawo magapalagyo sa iya kaugalingon nga duta.
15Ang tagsatagsa nga makita palapsan,
kag ang tagsatagsa nga madakpan mapukan sa espada.
16Ang ila mga lapsag man dugmokon
sa atubangan sang ila mga mata;
ang ila mga balay atihon
kag luguson ang ila mga asawa.
17Yari karon, painiton ko batok sa ila ang mga Midiahanon,
nga indi magsapak sang pilak
kag indi sila magkalipay sa bulawan.
18Kag ang ila mga pana magalaglag sang mga pamatan-on;
indi sila maawa sa bunga sang tiyan;
ang ila mata indi malooy sa kabataan.
19Kag ang Babilonia, ang himaya sang mga ginharian,
ang katahum sang bugal sang mga Caldeanhon,
manginsubong sang Sodoma kag Gomorra
sang ginlaglag sila sang Dios.#Gen. 19:24.
20Indi na ini pagtawohan
ukon pagpuy-an kutub sa kaliwatan pa kaliwatan;
ang Arabianhon indi magpatindug sing layanglayang didto,
ang mga manugpahalab sang carnero indi magpaluko sang ila mga panong didto.
21Kondi ang talonon nga mga sapat sang desierto magaluko didto,
kag ang ila mga balay mapuno sang masulub-on nga mga sapat;#Bug. 18:2.
ang mga avestrus magapuyo didto,
kag magalumpatlumpat didto ang mga kanding nga talonon.
22Kag ang mga lobo magauwang sa ila mga castilyo,
kag ang mga chacal sa ila mga palacio nga matahum;
ang iya tion malapit sa pag-abut
kag ang iya mga adlaw indi maglawig.
Currently Selected:
ISAIAS 13: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
