GENESIS 41

Si Jose Nagapatpat sang Damgo ni Faraon

1Sa tapus ang bug-os nga duha ka tuig, nagdamgo si Faraon nga nagatindug sia sa ubay sang Nilo, 2kag yari karon, gikan sa Nilo may nagtakas nga pito ka baka, matahum kag matambok, kag naghalab sila sa katabun-akan. 3Kag yari karon, ang iban nga pito ka baka nagtakas gikan sa Nilo sa olihi nila, malaw-ay kag kagalkal, kag nagtindug sa luyo sang nahauna nga mga baka sa pangpang sang Nilo. 4Kag ang mga baka nga malaw-ay kag kagalkal nagkaon sang pito ka baka nga matahum kag matambok. Kag nagmata si Faraon. 5Kag nagtolog sia kag nagdamgo sa ikaduha; kag yari karon, ang pito ka uhay, matinggas kag maayo, nag-ulhut sa isa ka dagami. 6Kag yari karon, ang pito ka uhay, kupus kag ginpakigas sang salatan, nag-ulhut sa olihi nila. 7Kag ang pito ka uhay nga kupus naghalunhon sang pito ka uhay nga matinggas kag matimsog. Kag nagmata si Faraon, kag yari karon, damgo yadto. 8Gani sa pagkaaga natublag ang iya espiritu; kag nagpadala sia kag ginpatawag ang tanan nga salamangkero sang Egipto kag ang tanan nga mangin-alamon nga tawo didto; kag ginsugid ni Faraon sa ila ang iya damgo, apang wala sing bisan sin-o nga makapatpat sa ila kay Faraon.

9Niyan ang puno nga manugtagay nagsiling kay Faraon, “Nadumduman ko ang akon mga sayup sining adlaw. 10Sang si Faraon nagsingkal sa iya mga alagad, kag ginbilanggo ako kag ang puno nga manugtinapay sa balay sang pangolo sang bantay, 11nagdamgo kami sa isa ka gab-i, sia kag ako, ang tagsatagsa may damgo sono sa iya kahologan. 12Yadto didto kaupud namon ang pamatan-on nga Hebreo, alagad sang pangolo sang bantay; kag sang ginsugid namon sa iya, ginpatpat niya sa amon ang amon mga damgo, ginpatpat niya sa tagsa ka tawo sono sa iya damgo. 13Kag sono sa ginpatpat niya sa amon, amo ang nahanabu; gin-uli ako sa akon palangakuan, kag ginpabitay ang puno nga manugtinapay.”

14Niyan ginpakadtoan ni Faraon kag ginpatawag si Jose, kag ginpagowa nila sia sing dalidali gikan sa bilanggoan nga madulum; kag sang namarbas sia kag nag-ilis sang iya bayo, nagkadto sia kay Faraon. 15Kag si Faraon nagsiling kay Jose, “Nagdamgo ako sing isa ka damgo, kag wala sing bisan sin-o nga makapatpat sini; kag nakabati ako nga ginsiling nahanungud sa imo nga kon makabati ka sing damgo makapatpat ka sini.” 16Si Jose nagsabat kay Faraon, “Wala ini sa akon; ang Dios magahatag kay Faraon sing sabat sang paghidait.” 17Niyan si Faraon nagsiling kay Jose, “Sa akon damgo, yari karon, nagtindug ako sa pangpang sang Nilo; 18kag gikan sa Nilo may nagtakas nga pito ka baka, matambok kag matahum, kag naghalab sila sa katabun-akan; 19kag ang iban nga pito ka baka nagtakas sa olihi nila, huyus kag tama kalaw-ay kag kagalkal, nga wala ako sing nakita nga kaangay sa kalaw-ayon sa bug-os nga duta sang Egipto. 20Kag ang mga baka nga kagalkal kag malaw-ay nagkaon sang pito nga nahaunang mga baka nga matambok, 21apang sang nakaon nila sila indi makilala nga nakaon nila sila, kay sila malaw-ay pa, subong sang una. Niyan nagmata ako. 22Nakita ko man sa akon damgo ang pito ka uhay nga nagaulhut sa isa ka dagami, matimsog kag maayo; 23kag ang pito ka uhay, laya, kupus, kag ginpakigas sang salatan, nag-ulhut sa olihi nila, 24kag ang kupus nga mga uhay naghalunhon sang pito ka uhay nga maayo. Kag ginsugid ko ini sa mga salamangkero, apang wala sing bisan sin-o nga makapahayag sini sa akon.”

25Niyan si Jose nagsiling kay Faraon, “Ang damgo ni Faraon isa; ang Dios nagpahayag kay Faraon sang buut na niya himoon. 26Ang pito ka baka nga maayo pito ka tuig, kag ang pito ka uhay nga maayo pito ka tuig; ang damgo isa. 27Ang pito ka baka nga kagalkal kag malaw-ay nga nagtakas sa olihi nila pito ka tuig, kag ang pito ka uhay man nga wala sing sulud nga ginpakigas sang salatan manginpito ka tuig nga tiggulutum. 28Ina amo ang butang nga ginsugid ko kay Faraon, ang buut na himoon sang Dios ginpakita niya kay Faraon. 29Magaabut ang pito ka tuig sang dakung kabuganaan sa bug-os nga duta sang Egipto, 30apang magaabut sa olihi nila ang pito ka tuig nga tiggulutum, kag ang bug-os nga kabuganaan malipatan sa duta sang Egipto; upuron sang tiggulutum ang duta, 31kag ang kabuganaan indi makilala sa duta bangud sang tiggulutum nga magasonod, kay ini magatama gid. 32Kag ang pagduha sang damgo ni Faraon nagakahologan nga ang butang ginpat-ud sang Dios, kag ang Dios magapahanabu sini sa madali. 33Busa karon magpangita si Faraon sing lalaki nga mahinalongon kag maalam, kag padumalahon sia sa duta sang Egipto. 34Si Faraon magpadayon sa pagtangdo sing mga manugtatap sa duta, kag pagkuha sang ikalima nga bahin sang patubas sang duta sa Egipto sa pito ka tuig nga bugana. 35Kag magtipon sila sang tanan nga kalan-on sa sining maayo nga mga tuig nga nagaabut, kag magsuput sing uyas sa idalum sang kamut ni Faraon nga kalan-on sa kabanwaanan, kag ipatago ini sa ila. 36Ina nga kalan-on mangintigana sa duta batok sa pito ka tuig nga tiggulutum, nga magaabut sa duta sang Egipto, agud nga ang duta indi malaglag sang tiggulutum.”

Si Jose Ginhimo nga Manugdumala sang Egipto

37Ining butang daw maayo kay Faraon kag sa tanan niya nga alagad. 38Kag si Faraon nagsiling sa iya mga alagad, “Makakita bala kita sing isa nga subong sini, lalaki nga yara sa iya ang Espiritu sang Dios?” 39Gani si Faraon nagsiling kay Jose, “Sa bagay nga ang Dios nagpakita sa imo sini tanan, wala sing bisan sin-o nga mahinalongon kag maalam subong sa imo; 40magadumala ka sang akon balay,#Binu. 7:10. kag sono sa imo polong gahuman ang bug-os ko nga katawohan; lamang sa akon harianon nga lingkoran magalabi pa ako kadaku sa imo.” 41Kag si Faraon nagsiling kay Jose, “Tan-awa, ginabutang ko ikaw sa bug-os nga duta sang Egipto.” 42Niyan si Faraon naghukas sa iya kamut sang iya singsing nga inugpat-in kag ginsuksuk ini sa kamut ni Jose, kag ginpapanaputan sia sing mga panapton nga lino nga manipis, kag ginbutangan sing kolintas nga bulawan sa iya liog; 43kag ginpasakay niya sia sa iya ikaduha nga kangga; kag nagsinggit sila sa una niya, “Luhud!” Sa amo ginpadumala niya sia sa bug-os nga duta sang Egipto. 44Labut pa si Faraon nagsiling kay Jose, “Ako si Faraon, kag sa wala ikaw wala sing bisan sin-o nga makabayaw sang iya kamut ukon sang iya tiil sa bug-os nga duta sang Egipto.” 45Kag si Faraon naghingalan kay Jose nga Zafenat-panea; kag ginpaasawa sa iya si Asenat, ang anak ni Potifera nga sacerdote sa On. Gani si Jose naggowa sa paglibut sa duta sang Egipto.

46Si Jose katloan ka tuig sang pagsulud niya sa pag-alagdan ni Faraon nga hari sang Egipto. Kag si Jose naghalin sa atubangan ni Faraon, kag naglibut sa bug-os gid nga duta sang Egipto. 47Sa pito ka tuig nga bugana ang duta nagpatubas sing mabuganaon, 48kag gintipon niya ang tanan nga kalan-on sa pito ka tuig nga may kabuganaan sa duta sang Egipto, kag ginsuput ang kalan-on sa kabanwaanan; ginsuput niya sa tagsa ka banwa ang kalan-on gikan sa kaumhan palibut sini. 49Kag si Jose nagsuput sing uyas sing tama kadamu subong sang balas sang dagat, tubtub nga gin-untatan niya sa pagsukub, kay indi masukub.

50Si Jose nangin-amay sang duha ka anak nga lalaki sa wala pa mag-abut ang tuig sang tiggulutum, nga gin-anak sa iya ni Asenat, ang anak ni Potifera nga sacerdote sa On. 51Ginhingalanan ni Jose ang panganay Manases,#41:51 Kon sayoron Nagapalipat. “Kay ang Dios,” siling niya, “nagpalipat sa akon sang tanan ko nga kabudlayan kag sang bug-os nga panimalay sang akon amay.” 52Ginhingalanan niya ang ikaduha Efraim,#41:52 Kon sayoron mabungahon. “Kay ang Dios naghimo sa akon nga mabungahon sa duta sang akon kapipit-an.”

53Ang pito ka tuig sang kabuganaan nga didto sa duta sang Egipto natapus; 54kag ang pito ka tuig sang tiggulutum nagsugud sa pag-abut,#Binu. 7:11. sono sa nasiling ni Jose. May tiggulutum sa bug-os nga kadutaan; apang sa bug-os nga duta sang Egipto may kalan-on. 55Sang nasubuk ang bug-os nga duta sang Egipto, ang katawohan nagsinggit kay Faraon sing kalan-on; kag si Faraon nagsiling sa tanan nga Egiptohanon, “Kadto kamo kay Jose; himoa ang iya isiling sa inyo.#Juan 2:5. 56Gani sang nagtalaptap ang tiggulutum sa bug-os nga duta, ginbuksan ni Jose ang tanan nga tambobo, kag nagpadalawat sa mga Egiptohanon, kay ang tiggulutum matama sa duta sang Egipto.” 57Labut pa, ang tanan nga kadutaan nag-abut sa Egipto sa pagdalawat sing uyas kay Jose, bangud nga ang tiggulutum sa tanan nga duta matama.

Currently Selected:

GENESIS 41: ABHIL82

Highlight

Copy