GENESIS 42

Ang mga Lalaking Utud ni Jose Nagadulhog sa Egipto tungud sa Uyas

1Sang nakita ni Jacob nga may uyas sa Egipto, nagsiling sia sa iya mga lalaking anak, “Ngaa bala nga nagatolokay kamo?” 2Kag nagsiling sia, “Yari karon, nabatian ko nga may uyas sa Egipto; dulhog kamo kag dalawat sing uyas nga sa aton gikan didto, agud nga mabuhi kita, kag indi mapatay.”#Binu. 7:12. 3Gani nagdulhog ang napulo ka lalaking utud ni Jose sa pagdalawat sing uyas sa Egipto. 4Apang si Jacob wala magpadala kay Benjamin, utud ni Jose, upud sa iya mga lalaking utud, kay nahadluk sia nga basi may malain nga mahanabu sa iya. 5Sa amo ang mga lalaking anak ni Israel nag-abut sa pagdalawat upud sa iban nga nag-abut, kay may tiggulutum sa duta sang Canaan.

6Karon si Jose pangolo-puud sang duta; sia ang nagpadalawat sa tanan nga tawo sang duta. Kag nag-abut ang mga lalaking utud ni Jose, kag nagyaub sila sa iya sa duta. 7Nakita ni Jose ang iya mga lalaking utud, kag nakilala sila, apang nagpakadumuloong sia sa ila kag nagpamolong sing matigdas sa ila. Nagsiling sia, “Diin bala kamo maghalin?” Nagsiling sila, “Gikan sa duta sang Canaan, sa pagdalawat sing kalan-on.” 8Sa amo nakilala ni Jose ang iya mga lalaking utud, apang sila wala makakilala sa iya. 9Kag nadumduman ni Jose ang mga damgo nga gindamgo niya nahanungud sa ila;#Gen. 37:5-10. kag nagsiling sia sa ila, “Mga lampitaw kamo, sa pagtan-aw sang kapigaw sang duta nagkari kamo.” 10Nagsiling sila sa iya, “Indi, ginoo ko, kondi ang imo mga alagad nagkari sa pagdalawat sing kalan-on. 11Kami tanan mga anak sang isa ka tawo, mga tawo kami nga maminatud-on, ang imo mga alagad indi mga lampitaw.” 12Nagsiling sia sa ila, “Indi, kondi sa pagtan-aw sang kapigaw sang duta nagkari kamo.” 13Kag nagsiling sila, “Kami, nga imo mga alagad, napulog duha ka mag-utud, mga anak sang isa ka tawo sa duta sang Canaan; kag yari karon, ang kamanghuran yadto sa sining adlaw sa amon amay, kag ang isa wala na.” 14Apang si Jose nagsiling sa ila, “Amo ina ang ginsiling ko sa inyo, kamo mga lampitaw. 15Sa sini pamatud-an kamo: tungud sa kabuhi ni Faraon, indi kamo makahalin diri kon indi ang inyo utud nga kamanghuran magkari diri. 16Ipadala ang isa sa inyo, kag ipakuha sa iya ang inyo utud, samtang kamo nagapabilin sa bilanggoan, agud mapamatud-an ang inyo mga polong, kon may kamatooran sa inyo; ukon kon indi, tungud sa kabuhi ni Faraon, kamo matuud nga mga lampitaw.” 17Kag ginbilanggo sila nga tanan sing tingub sing tatlo ka adlaw.

18Si Jose nagsiling sa ila sang ikatlo nga adlaw, “Himoa ninyo ini kag mabuhi kamo, kay nahadluk ako sa Dios: 19kon maminatud-on kamo nga mga tawo, magpabilin sa inyo bilanggoan ang isa sang inyo mga utud, kag ang iban maglakat kag magdala sing uyas sa tiggulutum sang inyo mga panimalay, 20kag dalha ang inyo kamanghuran nga utud sa akon; sa amo mapamatud-an ang inyo mga polong, kag indi kamo mapatay.” Kag ginhimo nila ini. 21Niyan nagsinilingay sila, “Sa pagkamatuud nakasala kita nahanungud sa aton utud, nga nakita naton ang kalisdanan sang iya kalag, sang nagpakilooy sia sa aton kag indi kita magpamati; busa nag-abut sa aton ining kalisdanan.” 22Kag si Ruben nagsabat sa ila, “Wala bala ako magpamolong sa inyo nga dili kamo magpakasala batok sa bata?#Gen. 37:21-22. Apang indi kamo magpamati. Gani karon ang iya dugo ginakinahanglan.” 23Wala sila makahibalo nga si Jose nakahangup sa ila, kay may manugpatpat sa tunga nila. 24Niyan nagtalikod sia sa ila kag naghibi; kag nag-atubang sa ila kag nagpamolong sa ila. Kag ginkuha niya si Simeon sa tunga nila kag gingapus sia sa atubangan sang mga mata nila. 25Kag nagsogo si Jose nga pun-on ang ila mga suludlan sing uyas, kag iuli ang cuarta sang tagsa ka tawo sa iya sako, kag hatagan sila sing balon sa dalanon. Amo ini ang ginhimo sa ila.

26Niyan ginpakolohan nila ang ila mga asno sing uyas, kag nagtaliwan didto. 27Kag sang binukad sang isa sa ila ang iya sako sa pagpakaon sang iya asno sa dalayonan, nakita niya ang iya cuarta sa baba sang iya sako; 28kag nagsiling sia sa iya mga utud, “Gin-uli ang akon cuarta; yari sa akon sako!” Sa sini ginkulbaan ang ila tagiposoon, kag nag-atubangay sila nga nagakurug, nga nagasiling, “Ano bala ining nahimo sang Dios sa aton?”

29Sang nag-abut sila kay Jacob nga ila amay sa duta sang Canaan, ginsugid sa iya ang tanan nga nahanabu sa ila, nga nagasiling, 30“Ang lalaki, ang ginoo sang duta, nagpamolong sing matigdas sa amon, kag nagkabig sa amon nga mga lampitaw sang duta. 31Apang kami nagsiling sa iya ‘Maminatud-on kami nga mga tawo, indi kami mga lampitaw; 32napulog duha kami ka mag-utud, mga anak sang amon amay; ang isa wala na, kag ang kamanghuran yadto sa sining adlaw sa amon amay sa duta sang Canaan.’ 33Niyan ang lalaki, ang ginoo sang duta, nagsiling sa amon, ‘Sa sini makilala ko nga kamo mga tawo nga maminatud-on: ibilin sa akon ang isa sang inyo mga utud, kag dala kamo sing uyas sa tiggulutum sang inyo mga panimalay, kag lakat kamo. 34Dalha sa akon ang inyo kamanghuran nga utud; niyan mahibaloan ko nga kamo indi mga lampitaw kondi mga tawo nga maminatud-on, kag itugyan ko sa inyo ang inyo utud, kag magapatikang kamo sa duta.’”

35Sang ginbobo nila ang ila mga sako, yari karon, ang napuyosan nga cuarta sang tagsa ka tawo yara sa iya sako; kag sang nakita nila kag sang ila amay ang ila mga napuyosan nga cuarta, ginhadlukan sila. 36Kag ang ila amay nga si Jacob nagsiling sa ila, “Ginpakawalaan ninyo ako sang akon kabataan: si Jose wala na, kag si Simeon wala na, kag karon si Benjamin kuhaon ninyo; tanan ini nag-abut sa akon.” 37Niyan si Ruben nagpamolong sa iya amay, “Patya ang akon duha ka anak nga lalaki kon indi ko sia mabalik sa imo; itugyan sia sa akon kamut, kag iuli ko sia sa imo.” 38Apang nagsiling sia, “Indi magdulhog ang akon anak upud sa inyo, kag ang iya utud patay na, kag sia lamang ang nabilin. Kon matabu ang malain sa iya sa dalanon, papanaugon ninyo ang akon mga uban nga may kasubo sa Sheol.”

Currently Selected:

GENESIS 42: ABHIL82

Highlight

Copy