GENESIS 24

Si Isaac Ginpaasawahan

1Karon si Abraham tigulang na, sobol sa panuigon; kag ang Ginoo nagpakamaayo kay Abraham sa tanan nga butang. 2Kag si Abraham nagsiling sa iya alagad, ang labing tigulang sang iya balay, nga naggahum sang tanan nga iya, “Ibutang ang imo kamut sa idalum sang akon paa, 3kag pasumpaon ko ikaw tungud sa Ginoo, ang Dios sang langit kag sang duta, nga dili mo pagpa-asaw-an ang akon anak gikan sa babayi nga mga anak sang mga Canaanhon, nga sa tunga nila nagapuyo ako, 4kondi magkadto ka sa akon duta kag sa akon kahimataan, kag magkuha sing asawa nga sa akon anak nga si Isaac.” 5Ang alagad nagsiling sa iya, “Ayhan ang babayi indi buut magsonod sa akon sa sining duta; kinahanglan bala nga dalhon ko liwat ang imo anak sa duta diin naghalin ka?” 6Si Abraham nagsiling sa iya, “Andam ka nga dili mo pag-ibalik ang akon anak didto. 7Ang Ginoo, ang Dios sang langit, nga nagkuha sa akon sa balay sang akon amay kag sa duta nga natawohan ko, kag nga nagpamolong sa akon kag nagsumpa sa akon, ‘Sa imo mga kaliwatan ihatag ko ining duta,’ ipadala niya ang iya manugtunda sa una nimo, kag magkuha ka didto sing asawa nga sa akon anak. 8Apang kon ang babayi indi buut magsonod sa imo, niyan maluwas ka sa sining akon sumpa; lamang dili mo pag-ibalik didto ang akon anak.” 9Gani ang alagad nagbutang sang iya kamut sa idalum sang paa ni Abraham nga iya agalon, kag nagsumpa sa iya nahanungud sining butang.

10Niyan ang alagad nagkuha sing napulo ka camelyo sang iya agalon kag nagtaliwan, nga nagadala sang tanan nga malahalon nga dolot sang iya agalon; kag nagtindug sia, kag nagkadto sa Mesopotamia, sa banwa ni Nahor. 11Kag ginpaluhud niya ang mga camelyo sa gowa sang banwa sa luyo sang bobon sang tubig sa tion sang kahaponon, sa tion nga nagagowa ang mga babayi sa pagsag-ub. 12Kag nagsiling sia, “O Ginoo, ang Dios sang akon agalon nga si Abraham, ginaampo ko sa imo, hatagi ako sing kauswagan karon nga adlaw, kag pakitai sing malig-on nga paghigugma ang akon agalon nga si Abraham. 13Yari karon, nagatindug ako sa luyo sang tuburan sang tubig, kag ang babayi nga mga anak sang mga tawo sang banwa nagagowa sa pagsag-ub. 14Pahanabu-a nga ang dalaga nga sa iya magsiling ako, ‘Ipapanaug ang imo tibud, ginaampo ko, agud nga mag-inum ako,’ kag sia magasiling, ‘Inum ka, kag paimnon ko man ang imo mga camelyo’—mangin-amo sia ang ginpat-ud mo nga sa imo alagad nga si Isaac. Sa sini makilala ko nga nagpakita ka sing malig-on nga paghigugma sa akon agalon.”

15Sang wala pa sia makatapus sa paghambal, yari karon, si Rebeca, nga natawo kay Betuel nga anak ni Milca, asawa ni Nahor, utud ni Abraham, naggowa nga nagapas-an sang iya tibud. 16Kag ang dalaga tama kaanyag nga tolokon, ulay, kag wala pa sia makilala sang lalaki. Nagdulhog sia sa tuburan, kag nagpuno sang iya tibud, kag nagtaklad. 17Niyan ang alagad nagdalagan sa pagsugata sa iya, kag nagsiling, “Ginaampo ko paimna ako sing diotay nga tubig sa imo tibud.” 18Nagsiling sia, “Inum ka, ginoo ko”; kag nagdalidali sia sa pagpapanaug sa iya kamut sang tibud, kag ginpainum niya sia. 19Sang nakatapus sia sa pagpainum sa iya, nagsiling sia, “Magasag-ub ako nga sa imo mga camelyo man, tubtub nga makatapus sila sa pag-inum.” 20Gani nagdalidali sia kag ginbobo ang iya tibud sa palaimnan kag nagdalagan liwat sa bobon sa pagsag-ub, kag nagsag-ub nga sa tanan niya nga camelyo. 21Ang tawo nagtolok sing paungut sa iya nga nagahipus sa pagsayud kon ang Ginoo nagpauswag ukon wala sang iya panlakatan.

22Sang nakatapus pag-inum ang mga camelyo, nagkuha ang tawo sing isa ka singsing nga bulawan nga nagatimbang sing tunga sa siclo, kag duha ka pulsera nga sa iya mga butkon nga nagatimbang sing napulo ka siclo nga bulawan, 23kag nagsiling, “Sugiri ako kon kay sin-o bala ikaw anak. May hulut bala sa balay sang imo amay nga madayonan namon?” 24Nagsiling sia sa iya, “Anak ako ni Betuel nga anak ni Milca, nga gin-anak niya kay Nahor.” 25Labut pa, “May tuman kami nga dagami kag kompay, kag hulut nga dayonan.” 26Ang tawo nagyaub kag nagsimba sa Ginoo, 27kag nagsiling, “Pakamaayohon ang Ginoo, ang Dios sang akon agalon nga si Abraham, nga wala magpabiya sang iya malig-on nga paghigugma kag sang iya pagkatutum sa akon agalon. Nahanungud sa akon, gintuytuyan ako sang Ginoo sa dalanon pakadto sa balay sang mga utud sang akon agalon.”

28Niyan ang dalaga nagdalagan kag nagsugid sa balay sang iya iloy nahanungud sining mga butang. 29Si Rebeca may utud nga lalaki nga ang iya ngalan si Laban; kag si Laban nagdalagan sa gowa pakadto sa tawo, sa tuburan. 30Sang nakita niya ang singsing, kag ang mga pulsera sa mga butkon sang iya utud nga babayi, kag sang nakabati sia sang mga polong ni Rebeca nga iya utud, “Amo ini ang ginpamolong sang tawo sa akon,” nagkadto sia sa tawo; kag yari karon, nagatindug sia sa luyo sang mga camelyo sa tuburan. 31Nagsiling sia, “Sulud ka, O pinakamaayo sang Ginoo; ngaa bala nga nagatindug ka sa gowa? Kay naaman ko ang balay kag ang hulut nga sa mga camelyo.” 32Gani ang tawo nagsulud sa balay; kag ginhukasan niya ang mga camelyo, kag ginhatagan sia sing dagami kag kompay nga sa mga camelyo, kag tubig sa paghinaw sang iya mga tiil kag sang mga tiil sang mga tawo nga nag-upud sa iya. 33Niyan ginbutangan sia sing kalan-on sa atubangan sa pagkaon; apang sia nagsiling, “Indi ako magkaon tubtub nga masugid ko ang akon katuyoan.” Sia nagsiling, “Ihambal.”

34Gani nagsiling sia, “Alagad ako ni Abraham. 35Ang Ginoo nagpakamaayo sing daku sa akon agalon, kag nangindaku sia; ginhatagan niya sia sing mga panong kag kabakahan, pilak kag bulawan, mga alagad nga lalaki kag mga alagad nga babayi, mga camelyo kag mga asno. 36Kag si Sara nga asawa sang akon agalon nag-anak sa iya katigulangon sing lalaki sa akon agalon; kag sa iya ginhatag niya ang tanan nga iya. 37Ginpasumpa ako sang akon agalon, nga nagasiling, ‘Dili ka magkuha sing asawa nga sa akon anak gikan sa babayi nga mga anak sang mga Canaanhon, nga sa ila duta nagapuyo ako; 38kondi magkadto ka sa akon kabaranggayan kag sa akon kahimataan, kag magkuha sing asawa nga sa akon anak.’ 39Nagsiling ako sa akon agalon, ‘Ayhan ang babayi indi buut magsonod sa akon.’ 40Apang nagsiling sia sa akon, ‘Ang Ginoo, nga sa iya atubangan nagalakat ako, magapadala sang iya manugtunda upud sa imo kag magapauswag sang imo dalanon; kag magkuha ka sing asawa nga sa akon anak sa akon kahimataan kag sa akon kabaranggayan; 41niyan maluwas ka sa akon sumpa, kon makaabut ka sa akon kahimataan; kag kon indi nila pag-ihatag sia sa imo, maluwas ka sa akon sumpa.’

42“Nag-abut ako sining adlaw sa tuburan, kag nagsiling, ‘O Ginoo, ang Dios sang akon agalon nga si Abraham, kon karon ginapauswag mo ang akon dalanon nga ginalaktan ko, 43yari karon, nagatindug ako sa luyo sang tuburan sang tubig; pahanabu-a nga ang dalaga nga maggowa sa pagsag-ub, nga sa iya magsiling ako, “Paimna ako, ginaampo ko, sing diotay nga tubig sa imo tibud,” 44kag magsiling sia sa akon, “Inum ka, kag nga sa imo man mga camelyo magasag-ub ako,” mangin-amo sia ang babayi nga ginpat-ud sang Ginoo nga sa anak sang akon agalon.’

45“Sa wala pa ako makatapus sa paghambal sa akon tagiposoon, yari karon, si Rebeca naggowa nga nagapas-an sang iya tibud; kag nagdulhog sia sa tuburan, kag nagsag-ub. Nagsiling ako sa iya, ‘Ginaampo ko paimna ako.’ 46Nagdalidali sia sa pagpapanaug sang iya tibud gikan sa iya abaga, kag nagsiling, ‘Inum ka, kag ang imo mga camelyo paimnon ko man.’ Gani nag-inum ako, kag ginpainum niya ang mga camelyo man. 47Niyan ginpamangkot ko sia, ‘Kay sin-o ka bala anak?’ Sia nagsiling, ‘Anak ni Betuel, anak ni Nahor, nga gin-anak sa iya ni Milca.’ Gani ginbutang ko ang singsing sa iya ilong, kag ang mga pulsera sa iya mga butkon. 48Niyan nagyaub ako kag nagsimba sa Ginoo, kag nagpakamaayo sang Ginoo, ang Dios sang akon agalon nga si Abraham, nga nagtuytuy sa akon sa nagakaigo nga dalanon sa pagkuha sang babayi nga anak sang utud sang akon agalon nga sa iya anak nga lalaki. 49Niyan karon, kon kamo magmatutum kag magmaminatud-on sa akon agalon, sugiro ako; kag kon indi, sugiri ako; agud magliso ako sa too ukon sa wala.”

50Niyan si Laban kag si Betuel nagsabat, “Ang butang nagagikan sa Ginoo; indi kami makapamolong sa imo sing malain ukon maayo. 51Yari karon, si Rebeca yara sa atubangan mo, kuhaa sia kag maglakat, kag ipaasawa sia sa anak sang imo agalon, subong sang napamolong sang Ginoo.”

52Sang nabatian sang alagad ni Abraham ang ila mga polong, nagyaub sia sa duta sa atubangan sang Ginoo. 53Kag nagkuha ang alagad sing mga huluyason nga pilak kag bulawan, kag mga panapton, kag ginhatag sila kay Rebeca; ginhatagan man niya sing bilidhon nga mga inugpuni ang iya utud nga lalaki kag ang iya iloy. 54Kag nagkaon kag nag-inum sia kag ang mga lalaki nga nag-upud sa iya, kag nagpabilin sila sa bug-os nga gab-i. Sang nagbangon sila sang pagkaaga, nagsiling sia, “Papauli-a ako sa akon agalon.” 55Ang iya utud nga lalaki kag ang iya iloy nagsiling, “Papabilina ang dalaga upud sa amon sing pila ka adlaw, sa kubus gid napulo; ugaling magalakat sia.” 56Apang nagsiling sia sa ila, “Indi ninyo ako pag-upangi, sanglit nga ginpauswag sang Ginoo ang akon dalanon; palakta ako agud nga makapauli ako sa akon agalon.” 57Nagsiling sila, “Tawgon namon ang dalaga, kag pamangkoton sia.” 58Kag gintawag nila si Rebeca, kag nagsiling sa iya, “Magaupud ka bala sa sining lalaki?” Nagsiling sia, “Magaupud ako.” 59Gani ginpalakat nila si Rebeca nga ila utud kag ang iya sisiwa, kag ang alagad ni Abraham kag ang iya mga tawo. 60Kag ginpakamaayo nila si Rebeca, kag nagsiling sa iya, “Utud namon, mangin-iloy ka sang mga linibo sang mga linaksa; kag ang imo mga kaliwatan magtag-iya sang gawang sang mga nagadumut sa ila!” 61Niyan nagtindug si Rebeca kag ang iya kadalagahan, kag nagsakay sila sa mga camelyo kag nagsonod sa tawo; sa amo ang alagad nagkuha kay Rebeca, kag naglakat sia.

62Karon si Isaac naghalin gikan sa Beer-lahai-roi, kag nagapuyo sa duta sang Bagatnan. 63Kag naggowa si Isaac sa pagpangamuyo sa latagon sa kahaponon; kag ginbayaw niya ang iya mga mata kag nakakita, kag yari karon, may mga camelyo nga nagapakari. 64Kag si Rebeca nagbayaw sang iya mga mata, kag sang nakita niya si Isaac, nagpanaug sia sa camelyo, 65kag nagsiling sia sa alagad, “Sin-o bala yadtong lalaki, nga nagalakat sa latagon sa pagsugata sa aton?” Ang alagad nagsiling, “Agalon ko sia.” Gani nagkuha sia sang iya takurong kag nanabon sia. 66Kag ang alagad nagsugid kay Isaac sang tanan nga butang nga nahimo niya. 67Niyan si Isaac nagdala sa iya sa layanglayang [sang iya iloy nga si Sara], kag ginkuha niya si Rebeca, kag nangin-asawa niya sia; kag ginhigugma niya sia. Gani si Isaac ginlipay sa tapus sang kamatayon sang iya iloy.

Currently Selected:

GENESIS 24: ABHIL82

Highlight

Copy