ESDRAS 4

Ang mga Kasumpong Nagapauntat sang Buluhaton

1Karon sang nakabati ang mga kasumpung sang Juda kag Benjamin nga ang mga anak sang kabihagan nagapatindug sing templo sa Ginoo, ang Dios sang Israel, 2niyan nagpalapit sila kay Zorobabel kag sa mga pangolo sang mga kabaranggayan kag nagsiling sa ila, “Tuguti kami nga magpatindug upud sa inyo; kay nagapangita kami sa inyo Dios subong sang ginahimo ninyo, kag nagahalad kami sa iya kutub sang mga adlaw ni Esar-hadon nga hari sang Asiria nga nagpataklad sa amon diri.#2 Hari 17:24-41. 3Apang si Zorobabel, si Jesua, kag ang iban nga mga pangolo sang mga kabaranggayan sang Israel nagsiling sa ila, “Wala kamo sing labut sa amon sa pagpatindug sing balay sa amon Dios; kondi kami amon sing tingub magapatindug sa Ginoo, ang Dios sang Israel, sono sa ginsogo sa amon ni Hari Ciro nga hari sang Persia.”

4Niyan ang katawohan sang duta nagpaluya sang mga kamut sang katawohan sang Juda, kag nagtublag sa ila sa pagpatindug, 5kag nagsohol sing mga manuglaygay batok sa ila sa paglaglag sang ila tinutuyo, sa tanan nga adlaw ni Ciro nga hari sang Persia, bisan tubtub sa paghari ni Dario nga hari sang Persia.

6Kag sa paghari ni Asuero,#Est. 1:1. sa pamuno sang iya paghari, nagsulat sila sing sumbung batok sa mga pumuluyo sa Juda kag sa Jerusalem.

7Kag sa mga adlaw ni Artajerjes si Bislam kag si Mitridates kag si Tabeel kag ang iban sang iya kaupdanan nagsulat kay Artajerjes nga hari sang Persia; ang sulat nasulat sa Sirianhon nga paagi kag napahamtang sa Sirianhon nga hambal. 8Si Rehum nga pangolo nga harianon kag si Simsai nga escriba nagsulat sing sulat batok sa Jerusalem kay Artajerjes nga hari sa sining bagay— 9niyan nagsulat si Rehum nga pangolo nga harianon, si Simsai nga escriba, kag ang iban sang ila kaupdanan, ang mga Dinahanon, kag ang mga Afarsacnon, ang mga Tarpelinhon, ang mga Afarsinhon, ang mga Arquebinhon, ang mga Babiloniahanon, ang mga Susanhon, ang mga Dehanhon, ang mga Elamnon, 10kag ang iban sang mga pungsud nga ginbihag sang daku kag dungganon nga Osnapar kag ginpahamtang sa banwa sang Samaria kag sa iban sang duta sa Tabok sang Suba, kag iban pa. 11Amo ini ang huwad sang sulat nga ila ginpadala—“Kay Artajerjes nga hari: Ang imo mga alagad, mga tawo sa Tabok sang Suba, nagapadala sing pag-abiabi. 12Kag karon mahibaloan sang hari nga ang mga Judio nga nagtaklad gikan sa imo nag-abut sa amon sa Jerusalem. Nagpatindug sila sang banwa nga malalison kag malain; ginahingapus nila ang mga kuta kag ginakaayo ang mga sadsaran. 13Mahibaloan karon sang hari nga, kon ining banwa mapatindug kag ang mga kuta matapus, indi sila magbayad sing buhis, alcabala, ukon balayran, kag sa katapusan makadaut ini sa mga hari. 14Karon bangud nga nagakaon kami sang asin sang palacio kag indi nagakaigo sa amon nga magtan-aw sang kahuluy-an sang hari, busa nagapadala kami kag nagapamatuud sa hari, 15nga usisaon sa tolon-an sang mga sinulat sang imo mga ginikanan. Makita mo sa tolon-an sang mga sinulat kag mahibaloan nga ining banwa mabinatoon nga banwa, nga makadaut sa mga hari kag sa mga puud, kag nga naghikut sila sing pagluib sa sulud sang amo sa dumaan nga tion. Sa among kabangdanan ining banwa ginlaglag. 16Nagapamatuud kami sa hari nga, kon ining banwa mapatindug kag ang mga kuta matapus, tungud sini nga paagi manginwalay bahin ka sa Tabok sang Suba.”

17Ang hari nagpadala sing sabat: “Kay Rehum nga pangolong harianon kag kay Simsai nga escriba kag sa iban sang ila mga kaupdanan nga nagapuyo sa Samaria kag sa iban sang duta sa Tabok sang Suba, paghidait, Kag karon 18ang sulat nga ginpadala ninyo sa amon ginbasa sing maathag sa atubangan ko. 19Kag nagmando ako, kag nagpangusisa, kag nasapwan nga ining banwa sa dumaan nga tion nagbato sa mga hari, kag nga ang pagribuk kag pagluib nahimo sa sulud niya. 20Kag may gamhanan nga mga hari sa Jerusalem, nga naghari sa bug-os nga duta sa Tabok sang Suba, nga ginbayaran sila sing buhis, alcabala, kag balayran. 21Karon himo kamo sing mando sa pagpauntat sining mga tawo, kag nga ining banwa dili pagpatindugon, tubtub nga magmando ako. 22Kag mag-andam kamo nga dili magpatumbaya sini; ngaa bala nga magdugang ang kasamaran sa kadautan sang mga hari?”

23Niyan, sang ginbasa ang huwad sang sulat ni Hari Artajerjes sa atubangan ni Rehum kag ni Simsai nga escriba kag sa ila mga kaupdanan, nagkadto sila sing dalidali sa Jerusalem sa mga Judio kag ginpauntat sila paagi sa kusug kag gahum. 24Niyan nag-untat ang buluhaton sa balay sang Dios nga yara sa Jerusalem; kag nag-untat ini tubtub sa ikaduhang tuig sang paghari ni Dario nga hari sang Persia.

Currently Selected:

ESDRAS 4: ABHIL82

Highlight

Copy