ESDRAS 3

Ang Pagpahauli sang Panimbahon

1Sang pag-abut sang ikapito nga bulan, kag ang mga lalaking anak sang Israel yara na sa mga banwa, ang katawohan nagtipon sila sing tingub sa Jerusalem subong sang isa ka tawo. 2Niyan nagtindug si Jesua nga lalaking anak ni Josadac, kag ang iya mga utud nga mga sacerdote, kag si Zorobabel nga lalaking anak ni Sealtiel kag ang iya mga himata, kag nagpatindug sila sang halaran sang Dios sang Israel, sa pagdolot sa ibabaw sini sing mga halad-nga-sinonog, sono sa nasulat sa kasogoan ni Moises nga tawo sang Dios.#Ex. 27:1. 3Ginpahamtang nila ang halaran sa iya tulungtungan, kay ang kahadluk yara sa ila bangud sang katawohan sang mga duta, kag nagdolot sila sa Ginoo sa ibabaw sini sing mga halad-nga-sinonog, mga halad-nga-sinonog sa aga kag sa hapon.#Num. 28:1-8. 4Kag naghiwat sila sang piesta sang mga kayangkayang, sono sa nasulat, kag nagdolot sang inadlaw nga mga halad-nga-sinonog sa kadamuon sono sa pagsolondan, sono sa katungdanan nga ginkinahanglan sa tagsa ka adlaw,#Num. 29:12-38. 5kag ugaling ang dalayon nga halad-nga-sinonog, ang mga dolot sang mga lati kag sang tanan nga pinat-ud nga piesta sang Ginoo#Num. 28:11–29:39. nga ginpakabalaan, kag sang tagsatagsa nga sa kinabubut-on naghalad sing halad-nga-kinabubut-on sa Ginoo. 6Kutub sa nahaunang adlaw sang ikapitong bulan nagsugud sila sa pagdolot sing mga halad-nga-sinonog sa Ginoo. Apang ang sadsaran sang templo sang Ginoo wala pa mapasad. 7Naghatag man sila sing cuarta sa mga cantero kag sa mga panday, kag kalan-on, ilimnon, kag lana sa mga Sidoniahanon, kag sa mga Tirohanon, sa pagdala sing mga kahoy nga cedro gikan sa Libano pakadto sa dagat, pa Jope, sono sa pahanugut sa ila ni Ciro nga hari sang Persia.

Ang Pagtukud Liwat sang Templo Ginsugdan

8Karon sa ikaduhang tuig sang ila pag-abut sa balay sang Dios sa Jerusalem, sa ikaduhang bulan, nagsugud si Zorobabel nga lalaking anak ni Sealtiel, kag si Jesua nga lalaking anak ni Josadac, kag ang iban sang ila mga utud nga mga sacerdote kag mga Levinhon kag ang tanan nga nagbalik sa Jerusalem gikan sa kabihagan. Nagtangdo sila sang mga Levinhon, kutub sa duha ka pulo ka tuig kag paibabaw, sa pagtatap sang buluhaton sang balay sang Ginoo. 9Niyan nagtindug sing tingub si Jesua pati ang iya mga lalaking anak kag ang iya mga himata, si Cadmiel kag ang iya mga lalaking anak, ang mga anak sang Juda, sa pagtatap sang mga manugpangabudlay sa balay sang Dios, kag ang mga lalaking anak ni Henadad, pati ang ila mga lalaking anak kag ang ila mga himata nga mga Levinhon.

10Kag sang napasad sang mga manugpatindug ang sadsaran sang templo sang Ginoo, ginpatindug nila angmga sacerdote nga napanaptan nga may mga budyong, kag ang mga Levinhon nga mga lalaking anak ni Asaf nga may mga apiping, sa pagdayaw sa Ginoo, sono sa sogo ni David nga hari sang Israel;#1 Cron. 25:1. 11kag nag-ambahanay sila, sa pagdayaw kag pagpasalamat sa Ginoo,

“Kay maayo sia,

kay ang iya malig-on nga paghigugma nagapadayon sa gihapon sa Israel.”#1 Cron. 16:34; 2 Cron. 5:13; 7:3; Sal. 100:5; 106:1; 107:1; 118:1; 136:1; Jer. 33:11.

Kag ang bug-os nga katawohan nagsinggit sing mabaskug, sang nagdayaw sila sa Ginoo, bangud nga ginpasad ang sadsaran sang balay sang Ginoo. 12Apang madamu sang mga sacerdote kag sang mga Levinhon kag sang mga pangolo sang mga kabaranggayan, ang katigulangan nga nakakita sang nahaunang balay, naghibi sing mabaskug sang ginpasad ang sadsaran sining balay sa atubangan sang ila mga mata, bisan madamu ang nagsinggit sing mabaskug sa kalipay; 13sa bagay nga ang katawohan indi makakilala sang kagahud sang hinugyaw sa kalipay gikan sa kagahud sang hinibi sang katawohan, kay ang katawohan nagsinggit sing mabaskug, kag ang kagahud nabatian sa malayo.

Currently Selected:

ESDRAS 3: ABHIL82

Highlight

Copy