EZEQUIEL 36

Ang Pagpahauli sang Israel

1“Kag ikaw, anak sang tawo, tagna sa mga bukid sang Israel, kag isiling, Kamo nga mga bukid sang Israel, pamatii ang polong sang Ginoo. 2Amo ini ang ginasiling sang Ginoong Dios: Bangud nga ang kaaway nagsiling batok sa inyo, ‘Aha!’ kag, ‘Ang dumaan nga mataas nga mga duug amon kaugalingon,’ 3busa tagna, kag isiling, Amo ini ang ginasiling sang Ginoong Dios: Bangud nga, bangud gid nga ginpamingaw nila kamo, kag ginlamon kamo sa tagsa ka luyo, agud nga manginkaugalingon kamo sa salin sang mga pungsud, kag nanginhalambalon kamo sa mga bibig sang mga palahambal, kag malaut nga sugid sang katawohan; 4busa, kamo nga mga bukid sang Israel, pamatii ang polong sang Ginoong Dios: Amo ini ang ginasiling sang Ginoong Dios sa mga bukid kag sa kabakoloran, sa mga iligan sang tubig kag sa mga nalupyakan, sa mga nawagwag nga mamingaw kag sa kabanwaanan nga binayaan, nga nangin-inagaw kag ululigyaton sa salin sang mga pungsud nga yara sa palibut; 5busa amo ini ang ginasiling sang Ginoong Dios: Sa pagkamatuud sa kalayo sang akon kaimon nakapamolong ako batok sa salin sang mga pungsud, kag batok sa bug-os nga Edom, nga nagpat-ud sang akon duta nga kaugalingon nila nga may kalipay sang bug-os nga tagiposoon nila kag may pagtamay sa kalag, sa pagsobol sining inagaw. 6Busa tagna nahanungud sa duta sang Israel, kag isiling sa mga bukid kag sa mga bakolod, sa mga iligan kag sa mga nalupyakan, Amo ini ang ginasiling sang Ginoong Dios: Yari karon, nakapamolong ako sa akon kaimon kag sa akon kasingkal, bangud nga gin-atus ninyo ang pagpakahuya sang mga pungsud; 7busa amo ini ang ginasiling sang Ginoong Dios: Nakasumpa ako nga ang mga pungsud nga yara sa palibut ninyo magaantus sila sang ila kahuluy-an.

8“Apang kamo, O mga bukid sang Israel, magapatubo kamo sang inyo mga sanga, kag magapamunga kamo sa akon katawohan nga Israel; kay malapit na ang pagpauli nila. 9Kay yari karon, sa inyo ako, kag magabalik ako sa inyo, kag pangumahon kamo kag sab-ugan; 10kag pabuaron ko ang mga tawo sa inyo, ang bug-os nga panimalay sang Israel, ang bug-os sini; ang kabanwaanan pagapuy-an kag ang naguba nga mga duug patindugon; 11kag pabuaron ko sa inyo ang tawo kag sapat; kag magadamu sila kag magamabungahon; kag papuy-an ko kamo sono sa una ninyo nga kahimtangan, kag magahimo sing maayo pa sa inyo sang sa inyo mga pagpamuno. Niyan makilala ninyo nga ako amo ang Ginoo. 12Hoo, patapakan ko kamo sang mga tawo, ang akon katawohan gid nga Israel; kag panag-iyahan kamo nila, kag manginpanublion kamo nila, kag kutub niyan indi na ninyo sila makuhaan sang mga anak. 13Amo ini ang ginasiling sang Ginoong Dios: Bangud nga nagasiling sila sa imo, ‘Ikaw nga duta manughalunhon sang mga tawo, kag manugpapas sang imo pungsud,’ 14busa indi ka na gid makahalunhon sing mga tawo ukon makapapas pa sang imo pungsud, nagasiling ang Ginoong Dios; 15kag indi ko na gid ikaw pagpabation sang pagpakahuya sang mga pungsud, kag indi ka na gid mag-antus sang pasipala sang mga katawohan kag indi ka na gid magpasandad sang imo pungsud, nagasiling ang Ginoong Dios.”

16Ang polong sang Ginoo nag-abut sa akon: 17“Anak sang tawo, sang nagapuyo ang panimalay sang Israel sa ila kaugalingon nga duta, gindagtaan nila ini sang ila mga dalanon kag sang ila mga hinimoan; sa atubangan nakon ang ila dalanon subong sang pagkahigko sang babayi sa iya pagkadimatinlo. 18Busa gin-ula ko ang akon kasingkal sa ila tungud sa dugo nga gin-ula nila sa duta, kag bangud nga gindagtaan nila ini sang ila mga diosdios. 19Ginpaaplaag ko sila sa tunga sang mga pungsud, kag naglapta sila sa kadutaan; sono sa ila dalanon kag sono sa ila mga hinimoan ginhukman ko sila. 20Apang sang nag-abut sila sa mga pungsud, nga ginkadtoan nila, ginpasipalahan nila ang akon balaan nga ngalan, sa bagay nga ang mga tawo nagsiling nahanungud sa ila, ‘Ini sila katawohan sang Ginoo, kag walay sapayan kinahanglan sila maggowa sa iya duta.’ 21Apang may kabalaka ako sa akon balaan nga ngalan, nga ginpasipalahan sang panimalay sang Israel sa tunga sang mga pungsud nga ginkadtoan nila.

22“Busa isiling sa panimalay sang Israel, Amo ini ang ginasiling sang Ginoong Dios: Wala ko ginahimo ini tungud sa inyo, O panimalay sang Israel, kondi tungud sa akon balaan nga ngalan, nga ginpasipalahan ninyo sa tunga sang mga pungsud nga ginkadtoan ninyo. 23Kag pakabalaanon ko ang akon dakung ngalan, nga ginpasipalahan sa tunga sang mga pungsud, nga ginpasipalahan ninyo sa tunga nila; kag makakilala ang mga pungsud nga Ako amo ang Ginoo, nagasiling ang Ginoong Dios, kon pagpakabalaanon ako sa inyo sa atubangan sang inyo mga mata. 24Kay kuhaon ko kamo gikan sa mga pungsud, kag tiponon kamo gikan sa tanan nga duta, kag dalhon kamo sa inyo kaugalingon nga duta. 25Iwisik ko sa ibabaw ninyo ang tubig nga matinlo, kag manginmatinlo kamo gikan sa tanan ninyong kahigkoan, kag gikan sa tanan ninyong diosdios tinloan ko kamo. 26Hatagan ko kamo sing bag-ong tagiposoon, kag ibutang ko ang espiritu nga bag-o sa sulud ninyo; kag kuhaon ko ang tagiposoon nga batobatohon gikan sa inyo unud kag hatagan ko kamo sing tagiposoon nga unud. 27Kag ibutang ko sa sulud ninyo ang akon Espiritu, kag palakton ko kamo sa akon mga palatukuran kag magabantay kamo sang akon mga pagsolondan kag magahimo sa ila. 28Magapuyo kamo sa duta nga ginhatag ko sa inyo mga ginikanan; kag kamo mangin-akon katawohan, kag ako mangin-inyo Dios.#Ezeq. 11:19-20. 29Kag luwason ko kamo sa tanan ninyong pagkadimatinlo; kag tawgon ko ang uyas kag padamuon ini kag indi magbutang sing tiggulutum sa inyo. 30Padamuon ko ang bunga sang kahoy kag ang patubas sang latagon, agud nga indi na kamo magbaton sang kahuluy-an sang tiggulutum sa tunga sang mga pungsud. 31Niyan madumduman ninyo ang inyo malaut nga mga dalanon, kag ang inyo mga hinimoan nga indi maayo; kag magakangil-ad kamo sa inyo kaugalingon sa inyo itololok tungud sang inyo mga kalautan kag tungud sang inyo mga kangil-aran. 32Wala ko ginahimo ini tungud sa inyo, nagasiling ang Ginoong Dios; makilal-an ini ninyo. Magkahuya kag magpalibog tungud sang inyo mga dalanon, O panimalay sang Israel.

33“Amo ini ang ginasiling sang Ginoong Dios: Sa adlaw nga tinloan ko kamo gikan sa inyo tanan nga kalautan, papuy-an ko ang kabanwaanan, kag patindugon ang nawagwag nga mga duug. 34Kag ang duta nga mamingaw pangumahon, sa baylo nga mamingaw anay ini sa itololok sang tanan nga nag-agi. 35Kag sila magasiling, ‘Ining duta nga mamingaw anay nanginkaangay sang katamnan sang Eden; kag ang nawagwag kag mamingaw kag nalaglag nga kabanwaanan ginapamakuran kag ginapuy-an.’ 36Niyan ang mga pungsud nga nabilin sa inyo palibut magakilala nga ako, ang Ginoo, nagpatindug sang mga duug nga nalaglag, kag nagtanum sang mamingaw anay; ako, ang Ginoo, nagpamolong sini, kag himoon ko ini.

37“Amo ini ang ginasiling sang Ginoong Dios: Sa sini kinahanglanon ako sang panimalay sang Israel sa paghimo sini tungud sa ila: padamuan ko sila sing mga tawo kaangay sang panong. 38Subong sang panong nga sa halad, subong sang panong sang Jerusalem sa iya tinangdo nga mga piesta, sa amo ang kabanwaanan nga nawagwag matugub sang mga panong sang mga tawo. Niyan makilala nila nga Ako amo ang Ginoo.”

Currently Selected:

EZEQUIEL 36: ABHIL82

Highlight

Copy