EZEQUIEL 34

Tagna batok sa mga Manugpahalab sang Israel

1Ang polong sang Ginoo nag-abut sa akon: 2“Anak sang tawo, tagna batok sa mga manugpahalab sang Israel, tagna, kag isiling sa ila, bisan sa mga manugpahalab. Amo ini ang ginasiling sang Ginoong Dios: Kailo ang mga manugpahalab, Amo ini ang ginasiling sang Ginoong Dios: Kailo ang mga manugpahalab sang Israel nga nagapahalab sang ila kaugalingon! Indi bala ang mga manugpahalab magpahalab sang mga carnero? 3Nagakaon kamo sang tambok, nagapanaput kamo nga sa inyo sing bulbul, nagaihaw kamo sang mga pinatambok; apang wala ninyo pagpahalba ang mga carnero. 4Ang mga balatianon wala ninyo pagpabakura, ang masakiton wala ninyo pag-ayoha, ang mga bali wala ninyo pagbugkusi, ang mga tinabog wala ninyo pagpabalika, ang mga nadula wala ninyo pagpangitaa, kondi sa pakusug kag sa kapintas naggahum kamo sa ila. 5Gani ginpaaplaag sila, bangud nga wala sing manugpahalab:#Mat. 9:36; Mar. 6:34. kag nanginkalan-on sila sa tanan nga kasapatan sang latagon kag ginpaaplaag. 6Ang akon mga carnero nagdalangdalang sa tanan nga mga bukid kag sa tagsa ka bakolod nga mataas; ang akon mga carnero nag-aplaag sa bug-os nga kadaygan sang duta, kag wala gid sing nag-usisa ukon nagpangita sa ila.

7“Busa, kamo nga mga manugpahalab, pamatii ang polong sang Ginoo: 8Sa nagakabuhi ako, nagasiling ang Ginoong Dios, sa pagkamatuud sanglit nga ang akon mga carnero nangintulukbon, kag ang akon mga carnero nanginkalan-on sa tanan nga sapat sang latagon, bangud nga wala sing manugpahalab; kag bangud nga ang akon mga manugpahalab wala magpangita sang akon mga carnero, kondi ang mga manugpahalab nagpakaon sang ila kaugalingon, kag wala magpahalab sang akon mga carnero; 9busa, kamo nga mga manugpahalab, pamatii ang polong sang Ginoo: 10Amo ini ang ginasiling sang Ginoong Dios, Yari karon, ako batok sa mga manugpahalab; kag kinahanglanon ko ang akon mga carnero sa ila kamut, kag pauntaton ko sila sa pagpahalab sang carnero; indi na ang mga manugpahalab magpakaon sang ila kaugalingon. Luwason ko ang akon mga carnero sa ila baba, agud nga indi na sila manginkalan-on sa ila.

11“Kay amo ini ang ginasiling sang Ginoong Dios: Yari karon, ako, ako gid magausisa tungud sa akon mga carnero, kag magapangita sa ila. 12Subong sang manugpahalab nga nagapangita sang iya panong sa adlaw nga yara sia sa tunga sang iya mga carnero nga nagaaplaag sa malayo, sa amo pangitaon ko ang akon mga carnero; kag luwason ko sila sa tanan nga duug diin nag-aplaag sila sa magal-um kag madulum nga adlaw. 13Kag pagowaon ko sila gikan sa mga katawohan, kag tiponon sila gikan sa mga duta, kag dalhon sila sa ila kaugalingon nga duta; kag pahalbon ko sila sa kabukiran sang Israel, sa luyo sang mga iligan sang tubig, kag sa tanan nga napuy-an nga duug sang duta. 14Pahalbon ko sila sa maayo nga halalban, kag sa mga bukid sang kataasan sang Israel mangintoril nila; didto magaluko sila sa maayo nga toril, kag sa malambo nga halalban magahalab sila sa kabukiran sang Israel. 15Ako gid manginmanugpahalab sang akon mga carnero, kag palukohon ko sila, nagasiling ang Ginoong Dios. 16Pangitaon ko ang nadula, kag pabalikon ko ang gintabog sa malayo, kag bugkosan ang nabali, kag pabakuron ang masakiton, apang laglagon ko ang matambok kag ang mabakud; pahalbon ko sila sa katarungan.

17“Nahanungud sa inyo, O akon panong, amo ini ang ginasiling sang Ginoong Dios: Yari karon, ako nagahukom sa tunga sang carnero kag carnero, sang mga carnero nga lalaki kag sang mga kanding nga lalaki. 18Diotay bala nga butang sa inyo nga maghalab sa maayo nga halalban, apang dapat ninyo nga tapakan sang inyo mga tiil ang salin sang inyo halalban; kag nga mag-inum sa matin-aw nga mga tubig, apang dapat nga inyo palang-ogon sang inyo mga tiil ang salin? 19Kag dapat bala ang akon mga carnero magkaon sang gintapak sang inyo mga tiil, kag mag-inum sang ginpalang-og sang inyo mga tiil?

20“Busa, amo ini ang ginasiling sa ila sang Ginoong Dios: Yari karon, ako, ako gid magahukom sa tunga sang carnero nga matambok kag sang carnero nga maniwang. 21Bangud nga gindis-og ninyo sang kilid kag sang abaga, kag gindusdus sang inyo mga sungay ang tanan nga balatianon, tubtub nga napaaplaag ninyo sila sa unhan, 22busa luwason ko ang akon panong, kag indi na sila mangintulukbon; kag magahukom ako sa tunga sang carnero kag carnero. 23Kag magabutang ako sing isa ka manugpahalab sa ila,#Bug. 7:17. ang akon alagad nga si David, kag pahalbon niya sila: sia magapahalab sa ila kag manginmanugpalahab sia nila. 24Kag ako, ang Ginoo, mangin-ila Dios, kag ang akon alagad nga si David principe sa tunga nila,#Ezeq. 37:24. ako, ang Ginoo, nagapamolong sini.

25“Magahimo ako sing katipan sang paghidait sa ila kag papason ko sa duta ang kasapatan nga malaut, kag magapuyo sila sing malig-on sa kamingawan kag magatolog sa kakahoyan. 26Kag himoon ko nga pagpakamaayo sila kag ang mga duug sa palibut sang akon bakolod; kag patup-on ko ang ulan sa iya panag-on; may mga ulan sang pagpakamaayo. 27Kag ang kahoy sang latagon magapamunga, kag ang duta magapatubas, kag manginmalig-on sila sa ila duta; kag makilala nila nga Ako amo ang Ginoo, kon mabali ko ang mga balabag sang ila gota, kag maluwas sila sa mga nag-ulipon sa ila. 28Indi na sila mangin-inagaw sa mga pungsud, kag ang mga sapat sang duta indi na maghalunhon sa ila; kondi magapuyo sila sing malig-on, kag wala gid sing magpahadluk sa ila. 29Kag magapatubo ako sa ila sing katamnan nga sa kabantugan kag indi na sila pagpapason sing tiggulutum sa duta, ukon mag-antus sang kahuluy-an sang mga pungsud. 30Kag makilala nila nga ako, ang Ginoo nga ila Dios, nagaupud sa ila, kag nga sila, ang panimalay sang Israel, akon katawohan, nagasiling ang Ginoong Dios. 31Kag kamo mga carnero nakon, ang mga carnero sang akon halalban, mga tawo, kag Ako amo ang inyo Dios, nagasiling ang Ginoong Dios.”

Currently Selected:

EZEQUIEL 34: ABHIL82

Highlight

Copy