EZEQUIEL 23

Ang Duha ka Mag-utud nga Babayi

1Nag-abut liwat sa akon ang polong sang Ginoo: 2“Anak sang tawo, may duha ka babayi, ang mga anak sang isa ka iloy; 3nagmakihilawason sila sa Egipto; nagmakihilawason sila sa ila pagkapamatan-on; didto ginpisga ang ila mga soso kag didto ginkaptan ang dughan sang ila pagkaulay. 4Ang ila mga ngalan si Ohola#23:4 Kon sayoron Ang iya layanglayang. ang magulang kag si Oholiba#23:4 Kon sayoron Ang akon layanglayang yara sa iya. nga iya utud. Sila nangin-akon, kag nag-anak sila sing mga lalaki kag mga babayi. Nahanungud sang ila mga ngalan, ang Samaria amo si Ohola, kag ang Jerusalem amo si Oholiba.

5“Si Ohola nagmakihilawason sang sia akon; kag naila sia sa iya mga hinigugma nga mga Asiriahanon nga iya mga kaingud, 6nga napanaptan sing asul, nga mga pangolo-puud kag mga manuggahum, sila tanan kalaluyagan nga pamatan-on nga mga lalaki, mga manugkabayo nga nagasakay sa mga kabayo. 7Ginhatag niya sa ila ang iya mga pagkamakihilawason, tanan sila pinili gid nga mga tawo sang Asiria; kag sa bisan kay sin-o nga nailaan niya gindagtaan niya ang iya kaugalingon sang tanan nga diosdios nila. 8Wala sia magbiya sang iya pagkamakihilawason kutub sang mga adlaw sang Egipto; kay sa iya pagkapamatan-on naghulid sila sa iya kag ginkaptan nila ang dughan sang iya pagkaulay kag gin-ula nila sa iya ang ila pagkamakihilawason. 9Busa gintugyan ko sia sa kamut sang iya mga hinigugma, sa kamut sang mga Asiriahanon, nga iya nailaan. 10Ini sila nagbukas sang iya pagkahubo; ginkuha nila ang iya mga anak nga lalaki kag ang iya mga anak nga babayi; kag ginpatay nila sia sang espada; kag sia nangin-ululigaon sa tunga sang mga babayi, kay ginhukman nila sia.

11“Ang iya utud nga si Oholiba nakakita sini, apang dunut pa sia sa iya pagkaila sang sa iya, kag sa iya mga pagkamakihilawason nga labi pa sa mga pagkamakihilawason sang iya utud. 12Naila sia sa mga Siriahanon nga iya mga kaingud, nga mga pangolo-puud kag mga manuggahum, nga napanaptan sing matahum gid, mga manugkabayo nga nagasakay sa mga kabayo, sila tanan kalaluyagan nga pamatan-on nga lalaki. 13Kag nakita ko nga nadagtaan sia; sila nga duha nag-agi sa isa ka dalanon. 14Apang gindugangan niya ang iya mga pagkamakihilawason; kay nakita niya ang mga lalaki nga napinta sa dingding, ang mga larawan sang mga Caldeanhon nga napinta sing mapula, 15nga nawagkusan sang mga wagkus sa ila mga hawak, nga may mga turbante nga nagakaway sa ila mga olo, tanan sila principe nga tolokon, sono sa kaangay sang mga Babiloniahanon sa Caldea nga duta nga ila natawohan. 16Sang pagkakita niya sa ila naila sia sa ila, kag nagpadala sing mga manugbalita sa ila sa Caldea. 17Kag ang mga Babiloniahanon nagkadto sa iya sa higdaan sang paghigugma, kag gindagtaan nila sia sang ila pagkamakihilawason; kag sa tapus nadagtaan sia sa ila, ang iya kalag nagbulag sa ila. 18Gani ginbuksan niya ang iya mga pagkamakihilawason kag ginbuksan ang iya pagkahubo, niyan ang akon kalag nagbulag sa iya, kaangay nga ang akon kalag nagbulag sa iya utud nga babayi. 19Apang ginpadamu niya ang iya mga pagkamakihilawason, nga nagadumdum sang mga adlaw sang iya pagkapamatan-on, diin nagmakihilawason sia sa duta sang Egipto 20kag nagkaila sia sa ila mga lalaki, nga ang ila unud subong sang unud sang mga asno, kag ang ila binhi kaangay sang binhi sang mga kabayo. 21Sa sini gindumdum mo ang kaulag sang imo pagkapamatan-on, sang pagkaput sang mga Egiptohanon sang imo dughan tungud sa mga soso sang imo pagkapamatan-on.”

22Busa, O Oholiba, amo ini ang ginasiling sang Ginoong Dios: “Yari karon, patindugon ko ang imo mga hinigugma batok sa imo nga sa ila nagbulag ang imo kalag, kag dalhon ko sila batok sa imo sa tagsa ka luyo: 23ang mga Babiloniahanon kag ang tanan nga Caldeanhon, si Pecod kag si Soa kag si Coa, kag ang tanan nga Asiriahanon upud sa ila, mga pamatan-on nga lalaki nga tilinguhaon, mga pangolo-puud kag mga manugdumala tanan sila, mga principe kag mga tawo nga bantug, tanan sila nagasakay sa mga kabayo. 24Kag magakari sila batok sa imo nga may mga hinganiban kag mga kangga kag mga caro kag isa ka kabon sang mga katawohan; magapahamtang sila batok sa imo nga may kalasag, taming, kag pandong sa palibut, kag itugyan ko ang paghukom sa ila, kag hukman ka nila sono sa ila mga paghukom. 25Kag ipahamtang ko ang akon kaimon batok sa imo, agud nga magahisayo sila sa imo sa kasingkal. Kuhaon nila ang imo ilong kag ang imo mga dulunggan, kag ang mabilin sa imo mapukan sa espada. Dalhon nila ang imo mga anak nga lalaki kag ang imo mga anak nga babayi, kag ang imo nabilin halunhonon sang kalayo. 26Hublasan ka man nila sang imo mga panapton kag kuhaon ang imo matahum nga mga huluyason. 27Sa sini pauntaton ko sa imo ang imo kaulag kag ang imo pagkamakihilawason nga gindala gikan sa duta sang Egipto; agud nga indi ka magbayaw sang imo mga mata sa ila ukon magdumdum pa sa Egipto. 28Kay amo ini ang ginasiling sang Ginoong Dios: Yari karon, itugyan ko ikaw sa kamut sang mga ginadumtan mo, sa kamut sang mga ginbulagan sang imo kalag; 29kag magadumut sila sa imo, kag magakuha sang bug-os mo nga kinabudlayan, kag bayaan ka nga hubo kag hublas, kag ang pagkahubo sa imo mga pagkamakihilawason mabuksan. Ang imo pagkaulag kag ang imo mga pagkamakihilawason 30nagdala sini sa imo, kay nagmakihilawason ka sa pagsonod sa mga pungsud, kag bangud nga nadagtaan ka sang ila mga diosdios. 31Naglakat ka sa dalanon sang imo utud nga babayi; busa ihatag ko ang iya tagayan sa imo kamut. 32Amo ini ang ginasiling sang Ginoong Dios:

“Magainum ka sa tagayan sang imo utud

nga madalum kag daku;

kadlawan ka kag yubitan,

kay madamu ini sing unud;

33mapuno ka sing kahologbon kag kasubo.

Sa tagayan sang kabulong kag kamingaw,

sa tagayan sang imo utud nga Samaria;

34imnun mo gid ini kag tition,

kag kitkiton mo ang iya mga bika,

kag kusniton mo ang imo mga soso;

kay ako ang nagpamolong sini, nagasiling ang Ginoong Dios. 35Busa amo ini ang ginasiling sang Ginoong Dios: Bangud nga nalimot ka sa akon kag ginsikway mo ako palikod, busa antusa man ang imo pagkaulag kag ang imo mga pagkamakihilawason.”

36Nagasiling sa akon ang Ginoo: “Anak sang tawo, hukman mo bala si Ohola kag si Oholiba? Niyan ipahayag sa ila ang ila mga kangil-aran. 37Kay nagpanglahi sila, kag ang dugo yara sa ila mga kamut; nagpanglahi sila sa ila mga diosdios; kag ang ila mga anak man nga gin-anak nila sa akon ginpaagi nila sa kalayo nga paghalunhonon. 38Labut pa ginhimo nila ini sa akon: gindagtaan nila ang akon santuario sa amo nga adlaw kag ginpasipalahan ang akon mga inugpahuway. 39Kay sang ginpatay nila ang ila mga anak sa ila mga diosdios, niyan sa amo nga adlaw nagsulud sila sa akon santuario sa pagpasipala sini. Kag yari karon, amo ini ang ginhimo nila sa tunga sang akon balay. 40Dugang pa nagpakuha kamo sing tawo gikan sa malayo, nga sa ila ginpadala ang manugbalita, kag yari karon, nag-abut sila. Tungud sa ila nagpaninlo ka, nagpinta sang imo mga mata, kag nagpamuni ka sing mga puni; 41naglingkod sa malahalon nga higdaan, nga may latok nga naaman sa atubangan sini nga sa ibabaw sini ginbutang mo ang akon incienso kag ang akon lana. 42Ang tingug sang kadam-an nga nagalandolando upud sa iya; kag ang mga tawo nga timawa gindala nga mga hobog gikan sa kamingawan; kag ginbutangan nila sang mga pulseras ang ila duha ka kamut, kag matahum nga mga purungpurung sa ila mga olo.

43“Niyan nagsiling ako, wala bala karon nagapanglahi ang mga tawo kon magmakihilawason sila sa iya? 44Kay nagsulud sila sa iya, subong sang nagasulud sila sa makihilawason nga babayi. Gani nagsulud sila sa kay Ohola kag kay Oholiba nga maulag nga mga babayi. 45Apang ang matarung nga mga tawo hukman nila sila sa paghukom sang makilahion nga mga babayi, kag sa paghukom sang mga babayi nga nagpaagay sing dugo; bangud nga mga makilahion sila, kag ang dugo yara sa ila mga kamut.”

46Kay amo ini ang ginasiling sang Ginoong Dios: “Magapataklad ako sing kabon batok sa ila, kag ihatag sila nga itumbotumbo pakadto-pakari kag kawatan. 47Kag ang kabon magabato sa ila sing mga bato kag magautas sa ila sa ila mga espada; pamatyon nila ang ila mga anak nga lalaki kag ang ila mga anak nga babayi, kag sonogon ang ila mga balay sa kalayo. 48Sa sini pauntaton ko ang ila kaulag sa duta, agud nga ang tanan nga mga babayi matudloan nga indi maghimo sono sa inyo pagkaulag. 49Kag itumbas nila sa inyo ang pagkaulag ninyo, kag magaantus kamo sang mga sala sang inyo mga diosdios; kag makilala ninyo nga Ako amo ang Ginoong Dios.

Currently Selected:

EZEQUIEL 23: ABHIL82

Highlight

Copy