EXODO 8

1Niyan ang Ginoo nagsiling kay Moises, “Kadtoi sa sulud si Faraon kag isiling sa iya, ‘Amo ini ang ginasiling sang Ginoo, “Tuguti sa paglakat ang akon katawohan, agud nga alagdon nila ako. 2Apang kon ikaw magdumili sa pagtugut sa pagpalakat sa ila, yari karon, halitan ko ang bug-os mong duta sing mga paka; 3ang Nilo magapadagaya sing mga paka nga magasaka kag magasulud sa imo balay, kag sa imo hulut nga tolologan kag sa imo higdaan, kag sa mga balay sang imo mga alagad kag sang imo katawohan, kag sa imo mga horno kag sa imo mga lamasan; 4ang mga paka magasaka sa imo kag sa imo katawohan kag sa tanan mong alagad”.’” 5Kag ang Ginoo nagsiling kay Moises, “Isiling kay Aaron, ‘Untaya ang imo kamut nga may sungkud sa ibabaw sang mga suba, sa ibabaw sang mga pailigan, kag sa ibabaw sang mga punong, kag pasakaa ang mga paka sa duta sang Egipto!’” 6Gani gin-untay ni Aaron ang iya kamut sa ibabaw sang mga tubig sang Egipto; kag nagsaka ang mga paka kag naghil-ob sang duta sang Egipto. 7Apang ang mga salamangkero naghimo sa amo nga bagay paagi sa ila mga padihot, kag nagpasaka sing mga paka sa duta sang Egipto.

8Niyan ginpatawag ni Faraon si Moises kag si Aaron, kag nagsiling, “Pakilooyi ang Ginoo nga kuhaon niya ang mga paka sa akon kag sa akon katawohan; kag ako magapalakat sang katawohan agud nga makahalad sa Ginoo.” 9Si Moises nagsiling kay Faraon, “Mahamuut ka sa pagsogo sa akon kon san-o magpakilooy ako, tungud sa imo kag tungud sa imo mga alagad kag tungud sa imo katawohan, agud nga ang mga paka malaglag gikan sa imo kag sa imo mga balay kag mabilin sa Nilo lamang?” 10Kag nagsiling sia, “Buwas.” Nagsiling si Moises, “Manginsono sa imo polong, agud nga makilala mo nga wala gid sing iban nga kaangay sa Ginoo nga amon Dios. 11Ang mga paka magapalayo sa imo kag sa imo mga balay kag sa imo mga alagad kag sa imo katawohan; mabilin sila sa Nilo lamang.” 12Gani ni Moises kag si Aaron naggowa gikan kay Faraon; kag nagtuaw si Moises sa Ginoo nahanungud sang mga paka, sono sa ginkasugtan nila ni Faraon. 13Kag ginhimo sang Ginoo ang sono sa polong ni Moises; napatay ang mga paka gikan sa mga balay kag sa mga nakawaan kag sa mga latagon. 14Kag gintipon nila sila sa mga tinumpok, kag nagbaho ang duta. 15Apang sang nakita ni Faraon nga may pag-untat, ginpatig-a niya ang iya tagiposoon, kag wala magpamati sa ila; subong sang ginsiling sang Ginoo.

Ang Kalalat-an nga mga Kuto

16Niyan ang Ginoo nagsiling kay Moises, “Isiling kay Aaron, ‘Iuntay ang imo sungkud kag bunala ang yab-ok sang duta, agud nga manginkuto ini sa bug-os gid nga duta sang Egipto.’” 17Kag ginhimo nila ang subong; gin-untay ni Aaron ang iya kamut upud ang iya sungkud, kag ginbunal ang yab-ok sang duta, kag nag-abut ang mga kuto sa tawo kag sa sapat; ang bug-os nga yab-ok sang duta nanginkuto sa bug-os nga duta sang Egipto. 18Gintilawan sang mga salamangkero paagi sa ila mga padihot ang pagpagowa sing mga kuto, apang indi sila makasarang. Gani may mga kuto sa tawo kag sa sapat. 19Kag nagsiling ang mga salamangkero kay Faraon, “Tudlo sang Dios ini.” Apang nagtig-a ang tagiposoon ni Faraon, kag wala sia magpamati sa ila; sono sa ginsiling sang Ginoo.

Ang Kalalat-an nga mga Langaw

20Niyan ang Ginoo nagsiling kay Moises, “Bangon sing aga pa kag maghulat kay Faraon, sa nagagowa sia pakadto sa tubig, kag isiling sa iya, ‘Amo ini ang ginasiling sang Ginoo, “Tuguti sa paglakat ang akon katawohan, agud nga maalagad nila ako. 21Kon indi, kon ikaw indi magtugut sa pagpalakat sang akon katawohan, yari karon, magapadala ako sing dagaya nga mga langaw sa imo kag sa imo mga alagad kag sa imo katawohan, kag sa imo mga balay; kag mapuno ang mga balay sang mga Egiptohanon sang dagaya nga mga langaw, kag ang duta man nga diin sila. 22Apang sa sadtong adlaw painon ko ang duta sang Gosen, diin nagapuyo ang akon katawohan, agud nga didto wala sing dagaya nga mga langaw; agud nga mahibaloan mo nga Ako ang Ginoo sa tunga sang duta. 23Sa amo ako magabutang sing ulut sa tunga sang akon katawohan kag sang imo katawohan. Buwas amo ini ang tanda”.’” 24Kag ginhimo sang Ginoo ang subong; nag-abut ang makasiligni nga dagaya sang mga langaw sa balay ni Faraon kag sa mga balay sang iya mga alagad, kag sa bug-os nga duta sang Egipto ang duta nalaglag bangud sang dagaya nga mga langaw.

25Niyan ginpatawag ni Faraon si Moises kag si Aaron, kag nagsiling, “Lakat, halad kamo sa inyo Dios sa duta.” 26Apang si Moises nagsiling, “Indi nagakaigo ang paghimo sing subong; kay ihalad namon sa Ginoo nga amon Dios ang kangil-aran sa mga Egiptohanon. Kon ihalad namon ang kangil-aran sa mga Egiptohanon sa atubangan sang ila mga mata, indi bala nila kami pagbatohon? 27Magalakat kami sing tatlo ka adlaw nga lalakton sa kamingawan kag magahalad sa Ginoo nga amon Dios sono sa isogo niya sa amon.” 28Gani si Faraon nagsiling, “Tugutan ko kamo sa paglakat, sa paghalad sa Ginoo nga inyo Dios sa kamingawan; lamang dili kamo maglakat sing tama kalayo. Pakilooy ka tungud sa akon.” 29Niyan si Moises nagsiling, “Yari karon, nagahalin ako gikan sa imo kag magapakilooy ako sa Ginoo nga ang dagaya nga langaw maghalin kay Faraon, sa iya mga alagad, kag sa iya katawohan, buwas; lamang nga indi si Faraon maglimbong liwat nga indi magtugut sa pagpalakat sang katawohan sa paghalad sa Ginoo.” 30Gani si Moises naggowa gikan kay Faraon kag nagpakilooy sa Ginoo. 31Kag ginhimo sang Ginoo ang sono sa ginpangabay ni Moises, kag ginkuha niya ang dagaya nga langaw gikan kay Faraon, sa iya mga alagad, kag sa iya katawohan; wala sing nabilin bisan isa. 32Apang si Faraon nagpatig-a sang iya tagiposoon sining tion man, kag wala niya pagtuguti nga maglakat ang katawohan.

Currently Selected:

EXODO 8: ABHIL82

Highlight

Copy