EXODO 7
7
1Kag ang Ginoo nagsiling kay Moises, “Tan-awa, ginahimo ko ikaw nga Dios kay Faraon; kag si Aaron nga imo utud mangin-imo manalagna. 2Ipamolong mo ang tanan nga ginasogo ko sa imo; kag si Aaron nga imo utud magapamolong kay Faraon nga tugutan niya nga maggowa gikan sa iya duta ang katawohan sang Israel. 3Apang patig-ahon ko ang tagiposoon ni Faraon, kag bisan pabuaron ko ang akon mga tanda kag mga katingalahan sa duta sang Egipto,#Binu. 7:36. 4si Faraon indi magpamati sa inyo; niyan ibutang ko ang akon kamut sa Egipto kag pagowaon ko ang akon mga kasoldadosan, ang akon katawohan nga mga anak sang Israel, gikan sa duta sang Egipto paagi sa dalagku nga paghukom. 5Kag kilalahon sang mga Egiptohanon nga Ako ang Ginoo, kon mag-untay ako sang akon kamut sa Egipto kag magpagowa sang katawohan sang Israel gikan sa tunga nila.” 6Kag ginhimo ini ni Moises kag ni Aaron; sono sa ginsogo sang Ginoo sa ila ginhimo nila. 7Karon si Moises kawaloan ka tuig, kag si Aaron kawaloan kag tatlo ka tuig, sang nagpamolong sila kay Faraon.
Ang Sungkud ni Aaron
8Kag ang Ginoo nagsiling kay Moises kag kay Aaron, 9“Kon magsiling sa inyo si Faraon, ‘Pakita kamo sing katingalahan nga sa inyo,’ niyan magasiling ka kay Aaron, ‘Kuhaa ang imo sungkud kag ipilak ini sa atubangan ni Faraon, agud nga mahimo ini nga man-ug.’” 10Gani si Moises kag si Aaron nagkadto kay Faraon kag ginhimo nila sono sang ginsogo sang Ginoo; si Aaron nagpilak sang iya sungkud sa atubangan ni Faraon kag sang iya mga alagad, kag nahimo ini nga man-ug. 11Niyan gintawag ni Faraon ang mga mangin-alamon kag mga manugbabaylan; kag sila man, ang mga salamangkero sang Egipto, naghimo sang amo nga bagay paagi sa ila mga padihot. 12Kay ginpilak sang tagsa ka tawo ang iya sungkud, kag nanginman-ug sila. Apang ang sungkud ni Aaron naghalunhon sang mga sungkud nila. 13Sa gihapon nagtig-a ang tagiposoon ni Faraon, kag wala sia magpamati sa ila; sono sa ginsiling sang Ginoo.
Ang Kalalat-an nga Dugo
14Niyan ang Ginoo nagsiling kay Moises, “Ang tagiposoon ni Faraon nagbatinggilan, nagadumili sia sa pagpalakat sang katawohan. 15Kadto ka sa kaagahon kay Faraon, sa nagagowa sia pakadto sa tubig; hulata sia sa pangpang sang suba, kag uyatan mo sa imo kamut ang sungkud nga nanginman-ug. 16Kag magsiling ka sa iya, ‘Ang Ginoo, ang Dios sang mga Hebreo, nagpadala sa akon sa imo, nga nagasiling, “Tuguti sa paglakat ang akon katawohan, agud nga sila mag-alagad sa akon sa kamingawan; kag yari karon, ikaw wala pa magtuman.” 17Amo ini ang ginasiling sang Ginoo, “Sa sini pagkilalahon mo nga Ako ang Ginoo: yari karon, sa sungkud nga yari sa akon kamut hampakon ko ang tubig nga yara sa Nilo, kag mangindugo ini,#Bug. 16:4. 18kag ang isda sa Nilo mapatay, kag magabaho ang Nilo, kag ang mga Egiptohanon magakangil-ad sa pag-inum sang tubig gikan sa Nilo.” ’” 19Kag ang Ginoo nagsiling kay Moises, “Isiling kay Aaron, ‘Kuhaa ang imo sungkud kag untaya ang imo kamut sa ibabaw sang mga tubig sa Egipto, sa ibabaw sang ila mga suba, sang ila mga pailigan, kag sang ila mga punong, kag sang tanan nila nga mga danaw sang tubig, agud nga mangindugo sila; kag manginmay dugo sa bug-os nga duta sang Egipto, sa mga suludlan nga kahoy kag nga bato.’”
20Ginhimo ni Moises kag ni Aaron ang sono sa ginsogo sa ila sang Ginoo; kag ginbayaw niya ang sungkud kag ginbunal ang tubig nga yara sa Nilo, sa itololok ni Faraon kag sa itololok sang iya mga alagad, kag ang bug-os nga tubig sa Nilo nangindugo. 21Kag napatay ang isda sa Nilo; kag nagbaho ang Nilo, sa bagay nga indi makainum ang mga Egiptohanon sang tubig gikan sa Nilo; kag ang dugo yara sa bug-os nga duta sang Egipto. 22Apang ang mga salamangkero sang Egipto naghimo sa amo nga bagay paagi sa ila mga padihot; gani nagtig-a ang tagiposoon ni Faraon, kag wala sia magpamati sa ila; sono sa ginsiling sang Ginoo. 23Si Faraon nagtalikod kag nagpauli sa iya balay, kag wala gid niya pagsapaka ini sa iya tagiposoon. 24Kag ang tanan nga Egiptohanon nagkutkut sa palibut sang Nilo sa pagpangita sing tubig nga ilimnon, kay indi sila makainum sang tubgi sang Nilo.
Ang Kalalat-an nga mga Paka
25Natuman ang pito ka adlaw sa tapus nga ginbunal sang Ginoo ang Nilo.
Currently Selected:
EXODO 7: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
