EXODO 10

Ang Kalalat-an nga mga Apan

1Niyan ang Ginoo nagsiling kay Moises, “Kadtoi sa sulud si Faraon; kay ginpatig-a ko ang iya tagiposoon kag ang tagiposoon sang iya mga alagad, agud nga mapakita ko ining akon mga tanda sa tunga nila, 2kag agud nga masugid mo sa idulungug sang imo anak kag sa anak sang imo anak kon ano nga mga butang ang ginhimo ko sa mga Egiptohanon kag ano nga mga tanda ang nahimo ko sa tunga nila; agud nga kamo makahibalo nga Ako ang Ginoo.”

3Gani si Moises kag si Aaron nagkadto sa sulud kay Faraon, kag nagsiling sa iya, “Amo ini ang ginasiling sang Ginoo, ang Dios sang mga Hebreo, ‘Daw ano pa bala kadugay nga magdumili ka sa pagpaubus sang imo kaugalingon sa atubangan nakon? Tuguti sa paglakat ang akon katawohan, agud nga alagdon nila ako. 4Kay kon ikaw magdumili sa pagpalakat sang akon katawohan, yari karon, buwas pakarion ko ang mga apan sa sulud sang imo duta, 5kag tabonan nila ang kadaygan sang duta, sa bagay nga indi makita ang duta; kag kaonon nila ang nabilin sa inyo sa tapus ang ulan nga daw bato nga hielo, kag kaonon nila ang tagsa ka kahoy nga inyo nga nagatubo sa latagon, 6kag pun-on nila ang imo mga balay, kag ang mga balay sang tanan mo nga alagad kag sang tanan sang Egiptohanon; subong sang wala makita nga mas-a sang inyo mga ginikanan ukon sang mga ginikanan sang inyo mga ginikanan, kutub sa adlaw nga diri sila sa duta tubtub sining adlaw.’” Niyan nagtalikod sia kag naghalin kay Faraon.

7Kag ang mga alagad ni Faraon nagsiling sa iya, “Tubtub pa bala san-o nga ining tawo manginsiod sa aton? Tuguti sa paglakat ang mga tawo, agud nga mag-alagad sila sa Ginoo nga ila sa Dios; wala ka pa bala makahangup nga ang Egipto nalaglag?” 8Gani si Moises kag si Aaron ginpabalik kay Faraon; kag sia nagsiling sa ila, “Lakat kamo, alagda ninyo ang Ginoo nga inyo Dios; apang sin-o bala ang magalakat?” 9Kag si Moises nagsiling, “Magalakat kami upud ang amon kabataan kag ang amon mga tigulang; upud ang amon mga anak nga lalaki kag mga anak nga babayi kag upud ang amon mga panong kag kabakahan magalakat kami, kay dapat kami maghiwat sing piesta sa Ginoo.” 10Kag nagsiling sia sa ila, “Ang Ginoo mag-upud sa inyo, kon abi palakton ko kamo kag ang inyo mga magamay! Tan-awa, may malaut kamo nga katuyoan sa painoino. 11Indi! Lakat, ang mga lalaki sa inyo, kag alagdon ang Ginoo, kay amo ina ang handum ninyo.” Kag gintabog sila gikan sa atubangan ni Faraon.

12Niyan ang Ginoo nagsiling kay Moises, “Untaya ang imo kamut sa ibabaw sang duta sang Egipto tungud sa mga apan, agud nga magsaka sila sa duta sang Egipto, kag magkaon sang tagsa ka tanum sang duta, sang tanan nga ginbilin sang ulan nga daw bato nga hielo.” 13Gani gin-untay ni Moises ang iya sungkud sa ibabaw sang duta sang Egipto, kag ang Ginoo nagpahuyup sing salatan sa duta sa bug-os sadtong adlaw kag sa bug-os nga gab-i; kag sang pagkaaga ang salatan nagdala sang mga apan. 14Kag naglupad ang mga apan sa ibabaw sang bug-os nga duta sang Egipto, kag naghugpa sa bug-os nga duta sang Egipto, tama kadamu nga mga apan nga wala pa gid sing subong bisan sang una, ukon may subong pa sa olihi. 15Kay gintabonan nila ang kadaygan sang bug-os nga duta, sa bagay nga ang duta nadulman,#Bug. 9:2-3. kag ginkaon nila ang tanan nga tanum sang duta kag ang tanan nga bunga sang kakahoyan nga nabilin sang ulan nga daw bato nga hielo; kag wala gid sing nabilin nga hilaw nga butang, bisan kahoy ukon tanum sang latagon, sa bug-os nga duta sang Egipto. 16Niyan ginpatawag sing dalidali ni Faraon si Moises kag si Aaron, kag nagsiling, “Nakasala ako batok sa Ginoo nga inyo Dios, kag batok sa inyo. 17Busa karon, ginaampo ko sa inyo, patawara ang akon sala sini na lamang nga makaisa, kag pakilooyi ang Ginoo nga inyo Dios nga kuhaon lamang niya sa akon ining kamatayon.” 18Gani naghalin sia kay Faraon, kag nagpakilooy sa Ginoo. 19Kag ginpakari sang Ginoo ang mabaskug nga kanaway, nga nagpalid sang mga apan kag nagtabog sa ila pakadto sa Dagat nga Mapula; wala gid sing nabilin bisan isa ka apan sa bug-os nga duta sang Egipto. 20Apang ginpatig-a sang Ginoo ang tagiposoon ni Faraon, kag wala niya pagtuguti sa paglakat ang mga anak sang Israel.

Ang Kalalat-an nga Kadudulman

21Niyan ang Ginoo nagsiling kay Moises, “Untaya ang imo kamut nayon sa langit agud nga may kadudulman#Bug. 16:10. sa ibabaw sang duta sang Egipto, isa ka pitipit nga kadudulman.” 22Gani gin-untay ni Moises ang iya kamut nayon sa langit, kag may pitipit nga kadudulman sa bug-os nga duta sang Egipto sing tatlo ka adlaw; 23indi sila makakita sa isa kag isa, kag wala sing nagtindug sa iya duug sa tatlo ka adlaw; apang ang tanan nga katawohan sang Israel may kapawa sa ila mga puluy-an. 24Niyan si Faraon nagtawag kay Moises, kag nagsiling, “Lakat kamo, alagda ang Ginoo; ibilin lamang ang inyo mga panong kag ang inyo kabakahan; ang inyo mga magamay man paupda ninyo.” 25Apang si Moises nagsiling, “Dapat man ikaw maghatag sa amon sing mga halad kag mga halad-nga-sinonog, agud nga mahalad namon sa Ginoo nga amon Dios. 26Ang amon kahayupan man dapat magaupud sa amon; wala sing mabilin bisan isa ka koko, kay sa ila dapat magkuha kami sa pag-alagad sa Ginoo nga amon Dios, kag wala kami makahibalo kon ano ang dapat i-alagad namon sa Ginoo tubtub mag-abut kami didto.” 27Apang ginpatig-a sang Ginoo ang tagiposoon ni Faraon, kag sia indi magtugut sa pagpalakat sa ila. 28Niyan si Faraon nagsiling sa iya, “Halin ka sa akon; andami ang imo kaugalingon; dili ka na magtan-aw sang akon nawung; kay sa adlaw nga makita mo ang akon nawung mapatay ka.” 29Si Moises nagsiling, “Sono sa ginasiling mo! Indi na ako magtan-aw liwat sang imo nawung.”

Currently Selected:

EXODO 10: ABHIL82

Highlight

Copy