ESTER 8

Ang mga Judio Gintugutan sa Pagbato

1Sa amo nga adlaw si Hari Asuero naghatag sang balay ni Haman nga kaaway sang mga Judio kay Hara Ester. Kag si Mardoqueo nagkadto sa atubangan sang hari, kay si Ester nagsugid kon ano niya sia; 2kag ang hari naghukas sang iya singsing, nga iya ginkuha kay Haman, kag ginhatag ini kay Mardoqueo. Kag ginpagahum ni Ester si Mardoqueo sa balay ni Haman.

3Niyan si Ester nagpamolong pa liwat sa atubangan sang hari; naghapa sia sa iya tiilan kag nagpakilooy sa iya nga may mga luha sa pagkuha sang kalainan ni Haman nga Agagnon kag sang iya padugi nga ginpadugi niya batok sa mga Judio. 4Niyan ang hari nag-untay kay Ester sang cetro nga bulawan, kag si Ester nagbangon kag nagtindug sa atubangan sang hari. 5Kag nagsiling sia, “Kon nahamut-an sang hari, kag kon nakapahamuut ako sa iya itololok, kag ang butang matarung sa atubangan sang hari, kag nahamut-an ako sa iya mga mata, isulat sa pagbaylo sang mga sulat nga ginpadugi ni Haman nga Agagnon, lalaking anak ni Amadata, nga ginsulat niya sa paglaglag sang mga Judio nga yara sa tanan nga puud sang hari. 6Kay paano bala ang pagkabatas ko sa pagtan-aw sang malaut nga magaabut sa akon katawohan? Ukon paano bala ang pagkabatas ko sa pagtan-aw sang kalaglagan sang akon mga himata?” 7Niyan si Hari Asuero nagsiling kay Hara Ester kag kay Mardoqueo nga Judio, “Yari karon, nahatag ko kay Ester ang balay ni Haman, kag ginbitay nila sia sa bitayan, bangud nga nag-untay sia sang iya kamut batok sa mga Judio. 8Isulat man ninyo sa mga Judio sono sa luyag ninyo, sa ngalan sang hari, kag pat-inan ini sang singsing sang hari; kay ang sinulat nga ginsulat sa ngalan sang hari kag ginpat-inan sang singsing sang hari indi mabaylohan sang tawo.”

9Sa sadtong tion gintawag ang mga escriba sang hari, sa ikatlo nga bulan, nga amo ang Sivan, sa ikaduha ka pulog tatlo nga adlaw sini; kag ginsulat sono sa tanan nga ginsogo ni Mardoqueo sa mga Judio kag sa mga satrapa kag sa mga pangolo-puud kag sa mga principe sang mga puud kutub sa India tubtub sa Etiopia, isa ka gatus kag duha ka pulo kag pito ka puud, sa tagsa ka puud sono sa iya pagsulat kag sa tagsa ka katawohan sono sa ila hambal, kag sa mga Judio sono sa ila pagsulat kag sono sa ila hambal. 10Nagsulat sia sa ngalan ni Hari Asuero kag ginpat-inan ini sang singsing sang hari, kag ginpadala ang mga sulat paagi sa mga manugdalagan nga nagakabayo nga nagasakay sa madasig nga mga kabayo nga gingamit sa pag-alagdan sang hari, kaliwat sang harianon nga kabayo. 11Sa sini ang hari nagtugut sa mga Judio nga yara sa tagsa ka banwa sa pagtipon sa ila kaugalingon sing tingub kag sa pag-apin sang ila kabuhi, sa paglaglag, sa pagpatay, kag sa pagpapas sang tanan nga gahum sang katawohan kag sang puud nga maggubat sa ila, sang ila mga magamay kag kababayin-an, kag sa pag-ati sa ila subong nga inagaw, 12sa isa ka adlaw sa tanan nga mga puud ni Hari Asuero, sa ikapulo kag tatlo nga adlaw sang bulan nga ikapulo kag duha, nga amo ang bulan nga Adar. 13Ang hinuwad sang sinulat ipanagtag nga mando sa tagsa ka puud, kag ibantala sa tanan nga mga katawohan, kag ang mga Judio maghanda batok sadto nga adlaw sa pagtimalus sa ila mga kaaway. 14Gani ang mga manugdalagan, nga nagsakay sa madasig nga mga kabayo nga gingamit sa pag-alagdan sang hari, naglakat nga nagadalidali, nga gintulud sang sogo sang hari; kag ang mando ginpagowa sa Susan nga palacio.

15Niyan si Mardoqueo naggowa gikan sa atubangan sang hari sa panapton nga harianon nga asul kag puti, nga may daku nga purungpurung nga bulawan kag may kunup nga lino nga manipis kag purpura, kag ang banwa nga Susan nagsinggit kag nagkasadya. 16Ang mga Judio may kapawa kag kasadya kag kalipay kag kadungganan. 17Kag sa tagsa ka puud kag sa tagsa ka banwa, bisan diin nag-abut ang sogo sang hari kag ang iya mando, ang mga Judio may kasadya kag kalipay, may piesta kag maayo nga adlaw. Kag madamu sa mga katawohan sang duta nangin-Judio, kay ang kahadluk sa mga Judio naholog sa ila.

Currently Selected:

ESTER 8: ABHIL82

Highlight

Copy