ESTER 7

Si Haman Ginbitay

1Gani ang hari kag si Haman nagkadto sa sinalosalo upud kay Hara Ester. 2Kag ang hari nagsiling liwat kay Ester sa ikaduha nga adlaw sang nagainum sila sang alak, “Ano bala ang imo pakilooy, Hara Ester? Itugut ini sa imo. Kag ano bala ang imo pangabay? Bisan sa katunga sang ginharian himoon ini.” 3Niyan si Hara Ester nagsabat, “Kon nakapahamuut ako sa imo itololok, O hari, kag kon nahamut-an ini sang hari, ihatag sa akon ang akon kabuhi sa akon pakilooy, kag ang akon katawohan sa akon pangabay. 4Kay ginbaligya kami, ako kag ang akon katawohan, nga laglagon, patyon, kag walaon. Kon nabaligya kami nga ulipon nga mga lalaki kag ulipon nga mga babayi, naghipus ako kuntani; kay ang amon kapipit-an indi mapaanggid sa kasamaran sang hari.” 5Niyan nagpamolong si Hari Asuero kay Hara Ester, “Sin-o bala sia, kag diin bala sia, nga nagapangahas sa iya tagiposoon sa paghimo sing subong?” 6Kag si Ester nagsiling, “Ang kasumpung kag ang kaaway! Ini nga malaut nga Haman!” Niyan si Haman hinadlukan sa atubangan sang hari kag sang hara. 7Kag ang hari nagtindug sa iya kasingkal gikan sa sinalosalo kag nagkadto sa katamnan sang palacio; apang nagtindug si Haman sa pagpangabay tungud sang iya kabuhi kay Hara Ester, kay nakita niya nga may gintapat nga malaut batok sa iya ang hari. 8Niyan ang hari nagbalik gikan sa katamnan sang palacio pakadto sa duug diin nagainum sila sing alak, sang si Haman napukan sa salaliayan diin yara si Ester; kag nagsiling ang hari, “Buut bala niya luguson pa ang hara sa akon atubangan, sa akon kaugalingon nga balay?” Sa paggowa sang polong sa baba sang hari, gintabunan nila ang nawung ni Haman. 9Niyan nagsiling si Harbona, nga isa sang mga eunuco nga yara sa atubangan sang hari, “Yari karon man, nagatindug sa balay ni Haman ang bitayan nga kalim-an ka maniko kataas, nga ginpahimo ni Haman tungud kay Mardoqueo, nga nagpamolong sing maayo tungud sa hari.” Kag ang hari nagsiling, “Bitaya sia dira.” 10Gani ginbitay nila si Haman sa bitayan nga gin-aman niya kay Mardoqueo. Niyan nalugpayan ang hari sa iya kasingkal.

Currently Selected:

ESTER 7: ABHIL82

Highlight

Copy