ESTER 4
4
Si Ester Nagasaad sa Pagtabang sang Iya Katawohan
1Sang nahibaloan ni Mardoqueo ang tanan nga nahimo, si Mardoqueo nagkusnit sang iya mga panapton kag nagsuklub sing sako nga may abo, kag nagkadto sa tunga sang banwa, nga nagasinggit sa mabaskug kag mapait nga paghibi; 2nag-abut sia sa atubangan sang gawang sang hari, kay wala sing bisan sin-o nga makasulud sa gawang sang hari nga napanaptan sing panapton nga sako. 3Kag sa tagsa ka puud, bisan diin nag-abut ang sogo kag mando sang hari, may daku nga lalaw sa mga Judio, kag puasa kag hinibi kag hinaya; kag madamu ang nagahigda sa panapton nga sako kag abo.
4Sang nag-abut ang mga dalaga ni Ester kag ang iya mga eunuco kag nagsugid sini sa iya, ang hara nagkalisud sing lakas; nagpadala sia sing panapton sa pagsaput kay Mardoqueo, sa pagkuha sa iya sang iya panapton nga sako, apang wala sia magbaton sini. 5Niyan si Ester nagpatawag kay Hatac, isa sang mga eunuco sang hari, nga iya gintangdo sa pag-atipan kay Ester, kag gintugnan nga magkadto sia kay Mardoqueo, sa paghibalo kon ano ini kag ngaa amo ini. 6Gani si Hatac nagkadto kay Mardoqueo sa masangkad nga duug sang banwa nga yara sa atubangan sang gawang sang hari, 7kag si Mardoqueo nagsugid sa iya sang tanan nga nahanabu sa iya, kag sang pat-ud nga kadamuon sang cuarta nga nasaad ni Haman nga ibayad sa mga bahandian sang hari tungud sa mga Judio sa paglaglag sa ila. 8Ginhatag man niya ang huwad sang sinulat sang mando nga ginpagowa sa Susan sa paglaglag sa ila, sa pagpakita sini kay Ester kag sa pagsaysay sini sa iya kag sa pagtugon sa iya nga magsulud sia sa hari sa pagpakilooy sa iya kag sa pagpangabay sa atubangan niya tungud sa iya katawohan. 9Kag si Hatac nag-abut kag nagsugid kay Ester sang mga polong ni Mardoqueo. 10Niyan si Ester nagpamolong kay Hatac, kag naghatag sa iya sing balita kay Mardoqueo, nga nagasiling, 11“Ang tanan nga alagad sang hari kag ang katawohan sang mga puud sang hari nakahibalo nga ang bisan sin-o nga lalaki ukon babayi nga magkadto sa hari sa nasulud nga luwang nga wala pagtawga, may isa ka kasogoan sa iya; nga patyon sia, luwas sa ila nga untayan sang hari sang cetro nga bulawan nga magkabuhi sia. Apang wala ako pagtawga sa pagsulud sa hari sini nga katloan ka adlaw.” 12Kag ginsugid nila kay Mardoqueo ang mga polong ni Ester. 13Niyan si Mardoqueo nagsogo sa ila nga balikan sing sabat si Ester, “Indi ka maghunahuna nga makaluwas ka sa balay sang hari labi pa sa tanan nga mga Judio. 14Kay kon maghipus ka sing bug-os sini nga tion, magaabut ang pagtabang kag pagluwas sa mga Judio gikan sa iban nga duug, apang ikaw kag ang imo kabaranggayan mawala. Kag sin-o bala ang nakahibalo nga ayhan nag-abut ka sa ginharian sa tion nga subong sini?” 15Niyan si Ester nagsogo sa ila nga balikan sing sabat si Mardoqueo, 16“Lakat, tipona sing tingub ang tanan nga Judio nga yara sa Susan, kag puasa kamo tungud sa akon, kag indi magkaon ukon mag-inum sa tatlo ka adlaw, sa gab-i ukon sa adlaw. Ako man kag ang akon kadalagahan magapuasa sa amo nga bagay. Niyan magakadto ako sa pagsulud sa hari, bisan indi sono sa kasogoan; kag kon mawala ako, mawala ako.” 17Niyan si Mardoqueo naglakat kag naghimo sono sa tanan nga nasogo sa iya ni Ester.
Currently Selected:
ESTER 4: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
