ESTER 3
3
Ang Puhon ni Haman sa Paglaglag sang mga Judio
1Sa tapus sini nga mga butang gin-pauswag ni Hari Asuero si Haman nga lalaking anak ni Hamedata nga Agagnon, kag ginpasaka sia kag ginpahamtang ang iya lingkoran labaw sa tanan nga principe nga kaupud niya. 2Kag ang tanan nga alagad sang hari nga yara sa gawang sang hari nagduko kag nagtahud kay Haman; kay ang hari nagsogo sing subong nahanungud sa iya. Apang si Mardoqueo wala magduko ukon magtahud sa iya. 3Niyan ang mga alagad sang hari nga yara sa gawang sang hari nagsiling kay Mardoqueo, “Ngaa bala nga nagalapas ka sa sogo sang hari?” 4Karon sang nagpamolong sila sa iya sa adlawadlaw kag wala sia magpamati sa ila, nagsugid sila kay Haman, sa pagtan-aw kon ang mga polong ni Mardoqueo magpadayon; kay nagsugid sia sa ila nga sia Judio. 5Kag sang nakita ni Haman nga si Mardoqueo wala magduko ukon magtahud sa iya, si Haman napuno sing kasingkal. 6Apang ginpakakubus niya ang pagpatay kay Mardoqueo lamang. Gani, subong nga ginpakilala nila sa iya ang katawohan ni Mardoqueo, si Haman nagtinguha sa paglaglag sang tanan nga Judio, ang katawohan ni Mardoqueo, nga yara sa bug-os nga ginharian ni Asuero.
7Sa nahauna nga bulan, nga amo ang bulan nga Nisan, sa ikapulo kag duha nga tuig ni Hari Asuero, ginholog ang Pur, nga amo ang pagpapalad, sa atubangan ni Haman adlawadlaw; kag ginholog ini bulanbulan tubtub sa ikapulog duha nga bulan, nga amo ang bulan nga Adar. 8Niyan si Haman nagsiling kay Hari Asuero, “May katawohan nga nag-aplaag kag naglapta sa mga katawohan sa tanan nga puud sa imo ginharian; ang ila mga kasogoan tuhay sang sa tagsa ka katawohan, kag wala sila nagabantay sang mga kasogoan sang hari, busa indi kapuslanan sa hari nga pabay-an sila. 9Kon mahamut-an sang hari, isulat nga laglagon sila, kag magabayad ako sing napulo ka libo ka talanton nga pilak sa mga kamut sang mga magatatap sang hilikuton sang hari, sa pagdala sini sa mga bahandian sang hari.” 10Gani ginhukas sang hari ang iya singsing gikan sa iya kamut kag ginhatag ini kay Haman nga lalaking anak ni Hamedata nga Agagnon, nga kaaway sang mga Judio. 11Kag ang hari nagsiling kay Haman, “Ang pilak ginhatag sa imo, ang katawohan man, sa paghimo sa ila sono sa ginapakamaayo mo.”
12Niyan gintawag ang mga escriba sang hari sa nahauna nga bulan sa ikapulo kag tatlo nga adlaw sini, kag ginsulat, sono sa tanan nga ginsogo ni Haman sa mga satrapa sang hari kag sa mga pangolo-puud nga nagdumala sa tagsa ka puud kag sa mga principe sang tagsa ka katawohan, sa tagsa ka puud sono sa iya sulat kag sa tagsa ka katawohan sono sa ila hambal; ginsulat ini sa ngalan ni Hari Asuero kag ginpat-inan sang singsing sang hari. 13Ginpadala ang mga sulat paagi sa mga manugdalagan sa tanan nga puud sang hari, sa paglaglag, sa pagpatay, kag sa pagpapas, sang tanan nga Judio, pamatan-on kag tigulang, mga kabataan kag mga kababayin-an, sa isa ka adlaw, sa ikapulo kag tatlo nga adlaw sang ikapulo kag duha nga bulan, nga amo ang bulan nga Adar, kag sa pag-ati sa ila subong nga inagaw. 14Ang huwad sang sinulat ipanagtag nga mando sa tagsa ka puud paagi sa pagbantala sa tanan nga mga katawohan nga maghanda sila sa sadto nga adlaw. 15Ang mga manugdalagan naggowa sing dalidali tungud sa sogo sang hari, kag ang mando ginpagowa sa Susan nga palacio. Kag ang hari kag si Haman naglingkod sa pag-inum; apang ang banwa sang Susan nalisang.
Currently Selected:
ESTER 3: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
