ESTER 2

Si Ester Ginhimo nga Hara

1Sa tapus sini nga mga butang, sang naglugpay ang kasingkal ni Hari Asuero, nakadumdum sia kay Vasti kag sang iya nahimo kag sang mando batok sa iya. 2Niyan nagsiling ang mga alagad sang hari nga nagaalagad sa iya, “Magpangita sing linghud nga mga ulay nga matahum nga sa hari. 3Kag ang hari magtangdo sing mga manugdumala sa tanan nga puud sang iya ginharian agud nga matipon nila sing tingub ang tanan nga linghud nga ulay nga matahum sa Susan nga palacio, sa balay sang mga babayi sa pag-atipan ni Hegai nga eunuco sang hari nga manugbantay sang mga babayi; ihatag sa ila ang ila mga butang sa pagpaninlo. 4Kag ang dalaga nga nagapahamuut sa hari manginhara sa tal-us ni Vasti.” Ang butang nagpahamuut sa hari, kag ginhimo niya ang subong sini.

5Karon may isa ka Judio sa Susan nga palacio nga ginhingalanan si Mardoqueo, lalaking anak ni Jair, lalaking anak ni Simei, lalaking anak ni Cis, nga Benjaminhon, 6nga nadala gikan sa Jerusalem upud sa mga bihag nga gindala upud kay Jeconias nga hari sang Juda, nga gindala ni Nabucodonosor nga hari sang Babilonia.#2 Hari 24:10-16; 2 Cron. 36:10. 7Ginbatiti niya si Hadasa, nga amo si Ester, babaying anak sang iya tiyo, kay wala na sia sing amay ukon iloy; ang dalaga matahum kag maayoayo, kag sang napatay ang iya amay kag iloy, ginkuha sia ni Mardoqueo subong nga iya kaugalingon nga anak. 8Gani sang nabatian ang sogo kag mando sang hari, kag sang natipon sing tingub ang madamu nga mga dalaga sa Susan nga palacio sa pagtatap ni Hegai, si Ester man gindala sa balay sang hari sa pagtatap ni Hegai nga manugbantay sang mga babayi. 9Kag ang dalaga nagpahamuut sa iya kag nakaagum sia sang pagkalolo niya; kag sa gilayon ginhatag niya sa iya ang iya mga butang sa pagpaninlo pati sang iya mga bahin, kag ang pito ka dalaga nga angay ihatag sa iya gikan sa balay sang hari, kag ginhalin niya sia kag ang iya mga dalaga sa maayo gid nga duug sang balay sang mga babayi. 10Si Ester wala magpakilala sang iya katawohan ukon sang iya himata, kay si Mardoqueo nagtugon sa iya nga indi niya pag-ipakilala ini. 11Kag si Mardoqueo nagadayandayan adlawadlaw sa atubangan sang luwang sang balay sang mga babayi, sa paghibalo kon paano si Ester kag kon ano ang himoon sa iya.

12Karon sang pag-abut sang tion sang tagsa ka dalaga sa pagsulud kay Hari Asuero, sa tapus nga nahimo sa iya ang sono sa kasogoan tungud sa mga babayi sa napulo kag duha ka bulan, kay amo ini ang mga adlaw sa pagtuman sang ila mga pagpaninlo, nga anum ka bulan sa lana sang mirra kag anum ka bulan sa mga pahumut kag sa mga butang nga sa mga pagpaninlo sang mga babayi— 13kon sa sini nga bagay nagkadto ang dalaga sa hari ang bisan ano nga naluyagan niya ginhatag sa iya sa pag-upud sa iya gikan sa balay sang mga babayi pakadto sa balay sang hari. 14Nagkadto sia sa gab-i, kag sa aga nagbalik sia sa ikaduha nga balay sang mga babayi sa pagtatap ni Saasgas nga eunuco sang hari nga bantay sang mga babayi; indi na sia magsulud sa hari, luwas ang hari mahamuut sa iya kag tawgon sia sa ngalan.

15Sang nag-abut ang tion ni Ester nga babaying anak ni Abihail nga tiyo ni Mardoqueo, nga nagkuha sa iya nga iya anak, sa pagkadto sa pagsulud sa hari, wala sia magkinahanglan sing bisan ano kondi ang gintangdo ni Hegai nga eunuco sang hari, ang manugbantay sang mga babayi. Karon si Ester nakaagum sing kahamuut sa itololok sang tanan nga nakakita sa iya. 16Gani sang gindala si Ester kay Hari Asuero sa iya balay nga harianon sa ikapulo nga bulan, nga amo ang bulan nga Tebet, sa ikapito nga tuig sang iya paghari, 17ginhigugma sang hari si Ester labaw sa tanan nga babayi, kag nakaagum sia sing kahamuut kag kalolo sa itololok niya labi pa sa tanan nga ulay, sa bagay nga ginpahamtang niya ang purungpurung nga harianon sa iya olo kag ginhimo sia nga hara sa tal-us ni Vasti. 18Niyan ang hari naghimo sing daku nga piesta sa tanan niya nga principe kag sa iya mga alagad; ang piesta kay Ester. Naghimo man sia sing pahuway sa mga puud, kag naghatag sing mga dolot sono sa kaalwan sang hari.

Si Mardoqueo Nagapahayag sang Paghimbon batok sa Hari

19Sang nagtipon sing tingub ang mga ulay sa ikahuda nga tion, si Mardoqueo nagalingkod sa gawang sang hari. 20Karon si Ester wala pa makapakilala sang iya himata ukon sang iya katawohan, sono sa gintugon sa iya ni Mardoqueo; kay gintuman ni Ester ang ginsogo ni Mardoqueo kaangay sadto sang pagbatiti niya sa iya. 21Sa sadto nga mga adlaw, sang si Mardoqueo nagalingkod sa gawang sang hari, duha sang mga eunuco sang hari, si Bigtan kag si Teres, gikan sa mga nagbantay sang atangan, nasingkal kag nagtinguha sa pagpatay kay Hari Asuero. 22Kag ang butang nahibaloan ni Mardoqueo, nga nagpahayag sini kay Hara Ester, kag si Ester nagsugid sini sa hari sa ngalan ni Mardoqueo. 23Sang pag-usisa sang butang kag nasapwan nga matuud, ginbitay sila nga duha sa kahoy. Kag ginsulat ini sa Tolon-an sang mga Maragtas sa atubangan sang hari.

Currently Selected:

ESTER 2: ABHIL82

Highlight

Copy