DEUTERONOMIO 30

1“Kag kon mag-abut sa imo ini tanan nga butang, ang pagpakamaayo kag ang pagpakamalaut, nga ginbutang ko sa imo atubangan, kag papahanumdumon mo sila sa tunga sang tanan nga pungsud diin ginsobol ka sang Ginoo nga imo Dios, 2kag magbalik ka sa Ginoo nga imo Dios, kag magtuman sang iya tingug sono sa tanan nga ginasogo ko sining adlaw sa imo, ikaw kag ang imo mga anak, sa bug-os mong tagiposoon kag sa bug-os mong kalag; 3niyan ang Ginoo nga imo Dios magapapahauli sang imo kabihagan, kag magakalooy sa imo, kag magapabalik kag magatipon sa imo gikan sa tanan nga mga katawohan diin ginpaaplaag ka sang Ginoo nga imo Dios. 4Kon ang imo mga sinobol didto pa sa mga ukbung sang langit, gikan didto tiponon ka sang Ginoo nga imo Dios, kag gikan didto kuhaon ka niya; 5kag dalhon ka sang Ginoo nga imo Dios sa duta nga gintag-iyahan sang imo mga ginikanan, kag ikaw magatag-iya sini; kag himoan ka niya sing kaayohan kag pabuaron ka niya labaw pa sa imo mga ginikanan. 6Kag circuncidahon sang Ginoo nga imo Dios ang imo tagiposoon kag ang tagiposoon sang imo kaliwat, sa paghigugma sa Ginoo nga imo Dios sa bug-os mong tagiposoon kag sa bug-os mong kalag, agud nga magkabuhi ka. 7Kag ibutang sang Ginoo nga imo Dios ini tanan nga mga pagpakamalaut sa imo mga kaaway kag sa mga nagadumut sa imo nga naghingabut sa imo. 8Kag magbalik ka kag magtuman sang tingug sang Ginoo, kag maghimo sang tanan niyang sogo nga ginasogo ko sa imo sining adlaw. 9Ang Ginoo nga imo Dios magapabugana sa imo sa tanan nga binuhatan sang imo kamut, sa bunga sang imo lawas, kag sa bunga sang imo kahayupan, kag sa bunga sang imo duta; kay magakalipay liwat ang Ginoo sa imo sa kaayohan, subong nga nagkalipay sia sa imo mga ginikanan, 10kon tumanon mo ang tingug sang Ginoo nga imo Dios, sa pagbantay sang iya mga sogo kag sang iya mga palatukuran nga nasulat sa sining tolon-an sang kasogoan, kon magliso ka sa Ginoo nga imo Dios sa bug-os mong tagiposoon kag sa bug-os mong kalag.

11“Kay ining sogo nga ginasogo ko sa imo sining adlaw indi tama kabudlay sa imo, ukon malayo. 12Wala ini sa langit, nga magsiling ka, ‘Sin-o bala ang magasaka tungud sa aton sa langit, kag magadala sini sa aton, kag magapapamati sa aton sini agud nga mahimo naton ini?’ 13Wala ini sa tabok sang dagat, nga magsiling ka, ‘Sin-o bala ang magatabok sang dagat tungud sa aton, kag magadala sini sa aton, kag magapapamati sini sa aton agud nga himoon naton ini?’ 14Apang ang polong tama kalapit sa imo; sa imo baba kag sa imo tagiposoon, agud nga mahimo mo ini.#Roma 10:6-8.

15“Tan-awa, ginbutang ko sining adlaw sa atubangan nimo ang kabuhi kag ang kaayohan, ang kamatayon kag ang kalaut. 16Sa sina nagasogo ako sa imo sining adlaw sa paghigugma sa Ginoo nga imo Dios, sa paglakat sa iya mga dalanon, kag sa pagbantay sang iya mga sogo kag sang iya mga palatukuran kag sang iya mga pagsolondan, agud nga magkabuhi ka kag magbuad, kag nga ang Ginoo nga imo Dios magpakamaayo sa imo sa duta diin nagasulud ka sa pagtag-iya sini. 17Apang kon ang imo tagiposoon maglipas, kag indi ka magpamati, kondi magpahilayo kag magsimba sa iban nga mga dios kag mag-alagad sa ila, 18ginapahibalo ko sining adlaw sa imo, nga mawala kamo; indi kamo makapalawig sang inyo mga adlaw sa duta diin nagatabok ka sang Jordan sa pagtag-iya sini. 19Ginatawag ko sa sining adlaw sa pagsaksi batok sa inyo ang langit kag ang duta, nga nabutang ko sa atubangan mo ang kabuhi kag ang kamatayon, ang pagpakamaayo kag ang pagpakamalaut; busa pili-a ang kabuhi, agud nga magkabuhi ka, ikaw kag ang imo mga kaliwatan, 20sa paghigugma sa Ginoo nga imo Dios, sa pagtuman sang iya tingug, kag sa pagtapik sa iya; kay sia imo kabuhi kag kalawigon sang imo mga adlaw, agud nga magpuyo ka sa duta nga ginsumpa sang Ginoo sa imo mga ginikanan, kay Abraham,#Gen. 12:7. kay Isaac,#Gen. 26:3. kag kay Jacob,#Gen. 28:13. nga ihatag sa ila.”

Currently Selected:

DEUTERONOMIO 30: ABHIL82

Highlight

Copy