DEUTERONOMIO 29

Ang Katipan sang Ginoo kay Israel sa Moab

1Ini sila amo ang mga polong sang katipan nga ginsogo sang Ginoo kay Moises nga himoon upud sa katawohan sang Israel sa duta sang Moab, luwas sang katipan nga ginhimo niya upud sa ila sa Horeb.

2Kag gintawag ni Moises ang bug-os nga Israel kag nagsiling sa ila: “Kamo nakakita sang tanan nga ginhimo sang Ginoo sa atubangan sang inyo mga mata sa duta sang Egipto, kay Faraon kag sa tanan niya nga alagad kag sa bug-os niya nga duta, 3ang dalagku nga mga pagtilaw nga nakita sang imo mga mata, ang mga tanda, kag yadto nga dalagku nga mga katingalahan; 4apang tubtub sini nga adlaw wala kamo paghatagi sang Ginoo sing tagiposoon sa paghibalo, ukon mga mata sa pagtan-aw, ukon mga dulunggan sa pagpamati. 5Ako nagtuytuy sa inyo sa kamingawan sing kap-atan ka tuig; wala magdaan ang inyo mga panapton sa inyo, kag ang imo sapin wala magdaan sa imo mga tiil; 6wala kamo makakaon sing tinapay, ukon nakainum sing alak ukon ilimnon nga masingkal; agud nga mahibaloan ninyo nga ako ang Ginoo nga inyo Dios. 7Kag sang pag-abut ninyo sa sini nga duug, nagsugata sa aton sa pagpakig-away si Sihon nga hari sang Hesbon#Num. 21:21-30. kag si Og nga hari sang Basan,#Num. 21:31-35. kag gindaug naton sila; 8gin-agaw naton ang ila duta, kag ginhatag ini nga panublion sa mga Rubenhon, sa mga Gadhanon, kag sa katunga nga kabikahan sang mga Manasenhon.#Num. 32:33. 9Busa bantayi ang mga polong sini nga katipan kag himoon sila, agud nga mag-uswag kamo sa tanan nga ginahimo ninyo.

10“Nagatindug kamo tanan sini nga adlaw sa atubangan sang Ginoo nga inyo Dios; ang inyo mga pangolo, ang inyo mga kabikahan, ang inyo mga tigulang, kag ang inyo mga manugdumala, bisan ang tanan nga tawo sang Israel, 11ang inyo mga magamay, ang inyo mga asawa, kag ang manlulugayaw nga yara sa tunga sang imo mga dologan, kutub sa manugpulud sang imo kahoy tubtub sa imo manugsag-ub, 12agud nga magpakigkatipan ka sa Ginoo nga imo Dios, kag sa iya sumpa nga ginahimo upud sa imo sang Ginoo nga imo Dios sini nga adlaw; 13agud nga mapalig-on ka niya sini nga adlaw nga iya kaugalingon nga isa ka katawohan, kag nga sia mangin-imo Dios, sono sa ginpamolong niya sa imo, kag sono sa ginsumpa niya sa imo mga ginikanan, kay Abraham, kay Isaac, kag kay Jacob. 14Kag indi lamang upud sa inyo ginahimo ko ini nga katipan kag ini nga sumpa, 15kondi upud sa iya nga nagatindug diri upud sa aton sini nga adlaw sa atubangan sang Ginoo nga aton Dios kag upud sa iya man nga wala diri upud sa aton sini nga adlaw.

16“Kamo nakahibalo kon paano nga pagpuyo naton sa duta sang Egipto, kag kon paano nga pag-agi naton sa tunga sang mga pungsud nga gin-agihan ninyo; 17kag nakita ninyo ang mga kalangil-aran nila, kag ang ila mga larawan, kahoy kag bato, pilak kag bulawan, nga yara sa tunga nila. 18Basi nga may yara sa tunga ninyo nga lalaki ukon babayi ukon panimalay ukon kabikahan, nga ang iya tagiposoon nagatalikod sa Ginoo nga aton Dios sining adlaw sa pagkadto sa pag-alagad sa mga dios sadtong mga pungsud; basi nga may yara sa tunga ninyo nga gamut nga nagadala sing hilo kag ajenjo,#Heb. 12:15. 19nga, sa pagkabati niya sang mga polong sining pagpakamalaut, magpakamaayo sia sa iya tagiposoon, nga nagasiling, ‘May paghidait ako, bisan nagalakat ako sa pagkabatinggilan sang akon tagiposoon.’ Ini magalaglag sang humog upud sang mamala. 20Ang Ginoo indi magpatawad sa iya, kondi niyan ang kaakig sang Ginoo kag ang iya kaimon magaaso batok sinang tawo, kag ang tanan nga pagpakamalaut nga nasulat sa sining tolon-an magatapik sa iya, kag panason sang Ginoo ang iya ngalan sa idalum sang langit. 21Kag ang Ginoo magapain sa iya nga sa malaut gikan sa tunga sang tanan nga kabikahan sang Israel, sono sa tanan nga pagpakamalaut sang katipan nga nasulat sa sining tolon-an sang kasogoan. 22Kag ang kaliwatan nga magaabut, ang inyo mga anak nga magatindug sa olihi ninyo, kag ang dumuloong nga magaabut gikan sa malayong duta, magasiling, kon makita nila ang kalalat-an sadtong duta kag ang mga balatian nga ginpamasakit sa iya sang Ginoo— 23ang bug-os nga duta sa iya azufre kag asin, kag pagkasonog, nga wala masab-ugi, kag wala matuboi, walay bisan anong hilamon nga nagtubo sa iya, kaangay sang pagkalaglag sang Sodoma kag Gomorra,#Gen. 19:24-25. sang Adma kag sang Zeboim, nga ginlaglag sang Ginoo sa iya kaakig kag sa iya kasingkal— 24bisan ang tanan nga pungsud magasiling, ‘Ngaa bala nga ginhimo sang Ginoo ang subong sini sa sining duta? Ano bala ang kahologan sang kasingkal sining daku nga kaakig?’ 25Niyan magasiling ang mga tawo, ‘Bangud nga ginbayaan nila ang katipan sang Ginoo, ang Dios sang ila mga ginikanan, nga ginhimo niya upud sa ila sang ginpagowa niya sila gikan sa duta sang Egipto, 26kag naglakat kag nag-alagad sa iban nga mga dios kag nagsimba sa ila, mga dios nga wala nila makilal-i kag nga wala niya mahatag sa ila; 27busa nagdabdab ang kaakig sang Ginoo batok sa sining duta, sa pagdala sa ibabaw niya sang bug-os nga pagpakamalaut nga nasulat sa sining tolon-an; 28kag sa kaakig kag sa kasingkal kag sa dakung kaalipungut gingabut sila sang Ginoo sa ila duta, kag ginhaboy sila sa iban nga duta, subong sang sa sining adlaw.’

29“Ang mga butang nga tinago iya sang Ginoo nga aton Dios; apang ang mga butang nga napahayag aton kag sa aton mga anak sa gihapon, agud nga himoon naton ang tanan nga polong sining kasogoan.

Currently Selected:

DEUTERONOMIO 29: ABHIL82

Highlight

Copy