DANIEL 5

Ang Sulat sa Dingding

1Si Hari Belsasar naghimo sing dakung piesta sa isa ka libo sang iya mga ginoo, kag nag-inum sing alak sa atubangan sang isa ka libo.

2Si Belsasar, samtang nagtilaw sia sang alak, nagsogo nga dalhon ang mga suludlan nga bulawan kag pilak nga ginkuha ni Nabucodonosor nga iya amay gikan sa templo nga yara sa Jerusalem, agud nga ang hari kag ang iya mga ginoo, ang iya mga asawa, kag ang iya mga babayi mag-inum gikan sa ila sini. 3Niyan gindala nila ang mga suludlan nga bulawan nga ginkuha gikan sa templo sang balay sang Dios nga yara sa Jerusalem; kag nag-inum gikan sa ila ang hari kag ang iya mga ginoo, ang iya mga asawa kag ang iya mga babayi. 4Nag-inum sila sing alak, kag nagdayaw sa mga dios nga bulawan kag pilak, saway, salsalon, kahoy, kag bato.

5Sa among takna naggowa ang mga tudlo sang kamut sang tawo, kag nagsulat sa atubangan sang candelero, sa napintahan nga dingding sang palacio sang hari; kag nakita sang hari ang bahin sang kamut nga nagsulat. 6Niyan nagbalhin ang dagway sang hari, kag ang iya mga hunahuna nagtublag sa iya; naghutalhutal ang mga lutalutahan sa iya hawak, kag ang iya mga tuhod nagsininto-ay. 7Ang hari nagsinggit sing mabaskug sa pagpasulud sang mga manugbabaylan, sang mga Caldeanhon, kag sang mga manugpakot. Ang hari nagsiling sa mangin-alamon nga mga tawo sang Babilonia, “Ang bisan sin-o nga makabasa sining sulat, kag makapahayag sa akon sang iya kasaysayan, panaptan sing purpura, kag may kolintas nga bulawan sa iya liog, kag mangin-ikatlo nga manugdumala sa ginharian.” 8Niyan nagsulud ang tanan nga mangin-alamon nga tawo sang hari, apang sila indi makabasa sang sinulat ukon makapakilala sa hari sang kasaysayan. 9Niyan si Hari Belsasar natublag sing daku, kag ang iya nawung nagbalhin; kag naligban ang iya mga ginoo.

10Ang hara, bangud sang mga polong sang hari kag sang iya mga ginoo, nagsulud sa balay sang sinalosalo; kag ang hara nagsiling, “O Hari, magkabuhi ka sa gihapon! Dili magtublag sa imo ang imo mga hunahuna, ukon magbalhin ang imo nawung. 11Sa imo ginharian may lalaki nga yara sa iya ang espiritu sang mga dios nga balaan. Sa mga adlaw sang imo amay nakita sa iya ang kapawa kag paghangup kag kaalam, kaangay sang kaalam sang mga dios, kag si Hari Nabucodonosor, nga imo amay, ang hari, ginasiling ko, ang imo amay, naghimo sa iya nga agalon sang mga salamangkero, mga manugbabaylan, mga Caldeanhon, kag mga manugpakot, 12sanglit kay ang labaw nga espiritu, ihibalo, kag paghangup sa pagsaysay sang mga damgo, pagpahayag sang mga madulum nga paktakon, kag pagdula sang mga pangduhaduha nakita sa amo man nga Daniel, nga ginhingalanan sang hari Beltesasar. Karon ipatawag si Daniel, kag ipahayag niya ang kasaysayan.”

13Niyan si Daniel ginpasulud sa atubangan sang hari. Ang hari nagsiling kay Daniel, “Ikaw yadto nga Daniel, nga gikan sa mga anak sang kabihagan sang Juda, nga gindala sang hari nga akon amay gikan sa Juda. 14Ako nakabati nahanungud sa imo nga ang espiritu sang mga dios yara sa imo, kag nga ang kapawa kag ang paghangup kag ang labaw nga kaalam nakita sa imo. 15Karon ang mangin-alamon nga mga tawo, ang mga manugbabaylan, gindala sa atubangan ko agud nga basahon nila ini nga sinulat kag ipakilala sa akon ang iya kasaysayan; apang indi sila makapahayag sa akon sang kasaysayan sang butang. 16Apang ako nakabati sa imo nga sarang ka makahatag sing mga kasaysayan kag makadula sang mga pangduhaduha. Karon kon ikaw makabasa sang sinulat kag makapakilala sa akon sang iya kasaysayan, panaptan ka sing purpura, kag may kolintas nga bulawan sa imo liog, kag mangin-ikatlo nga manugdumala sa ginharian.”

17Niyan si Daniel nagsabat sa hari, “Mangin-imo ang imo mga dolot, kag ihatag sa iban ang imo mga balus; wala sing sapayan basahon ko ang sinulat sa hari kag ipakilala sa iya ang kasaysayan. 18O ikaw nga hari, ang Labing Mataas nga Dios naghatag kay Nabucodonosor nga imo amay sang ginharian kag sang pagkadaku kag sang himaya kag sang pagkahalangdon; 19kag bangud sang pagkadaku nga ginhatag niya sa iya, ang tanan nga mga katawohan, mga pungsud, kag mga hambal nagkurug kag nagkahadluk sa atubangan niya; kon sin-o ang buut niya ginpatay niya, kag kon sin-o ang buut niya ginbuhi niya; kon sin-o ang buut niya ginbayaw niya, kag kon sin-o ang buut niya ginpapaubus niya. 20Apang sang nabayaw ang iya tagiposoon kag nagtig-a ang iya espiritu sa bagay nga nagpabugal sia, ginpahalin sia sa iya trono, kag ginkuha nila sa iya ang iya himaya; 21gintabog sia gikan sa mga anak sang mga tawo, kag ang iya tagiposoon nanginkaangay sang ila sang mga sapat, kag ang iya puluy-an upud sa mga asno nga talonon; ginpahalab sia sing hilamon kaangay sa mga baka, kag ang iya lawas nabasa sang ton-og sang langit, tubtub nga nakilala niya nga ang Dios nga Labing Mataas nagadumala sa ginharian sang mga tawo, kag nga sia nagapalingkod sa ibabaw sini sang bisan sin-o nga buut niya. 22Kag ikaw, O Belsasar, nga iya anak, wala magpaubus sang imo tagiposoon, bisan nga nakahibalo ka sini tanan, 23kondi nga nagpakataas ka sang imo kaugalingon batok sa Ginoo sang langit; kag ginpadala nila sa atubangan mo ang mga gamit sang iya balay, kag ikaw kag ang imo mga ginoo, ang imo mga asawa, kag ang imo mga babayi nag-inum sing alak sa ila; kag gindayaw mo ang mga dios nga pilak kag bulawan, nga saway, salsalon, kahoy, kag bato, nga indi makakita ukon makabati, ukon makakilala, kag ang Dios nga sa iya kamut yara ang imo ginhawa, kag nga iya ang tanan mo nga dalanon, wala mo paghimayaa.

24“Niyan ang bahin sang kamut ginpadala gikan sa atubangan niya, kag ini nga sinulat ginpagkit. 25Kag ini amo ang sinulat nga ginpagkit: MENE, MENE, TEKEL, UPARSIN. 26Amo ini ang kasaysayan sang butang: MENE, ang Dios nag-isip sang imo ginharian kag gintapus ini; 27TEKEL, ikaw natimbang sa timbangan kag nasapwan ka nga mamag-an; 28PERES, ang imo ginharian ginabahinbahin kag ginhatag sa mga Mediahanon kag sa mga Persiahanon.”

29Niyan nagsogo si Belsasar, kag ginpanaptan nila si Daniel sing purpura, ginbutangan sing talikala nga bulawan sa iya liog, kag ginbantala nahanungud sa iya, nga sia mangin-ikatlo nga manugdumala sa ginharian.

30Sa sadto nga gab-i ginpatay si Belsasar nga Caldeanhon nga hari. 31Kag si Dario nga Mediahanon nagbaton sang ginharian, sa panuigon nga kan-uman kag duha.

Currently Selected:

DANIEL 5: ABHIL82

Highlight

Copy