DANIEL 3

Ang Pagluwas gikan sa Horno nga Nagadabadaba

1Si Hari Nabucodonosor naghimo sing larawan nga bulawan, nga ang iya kataason kan-uman ka maniko kag ang iya kasangkaron anum ka maniko. Ginpatindug niya ini sa kapatagon sang Dura, sa puud sang Babilonia. 2Niyan ginpatipon ni Hari Nabucodonosor ang mga satrapa, ang mga tinugyanan, kag ang mga pangolo-puud, ang mga hukom, ang mga manugtipig sang bahandi, ang mga manuglaygay, ang mga mananabang, kag ang tanan nga manugdumala sang mga puud sa pagkari sa paghalad sang larawan nga ginpatindug ni Hari Nabucodonosor. 3Niyan nagtipon sing tingub ang mga satrapa, ang mga tinugyanan, ang mga pangolo-puud, ang mga hukom, ang mga manugtipig sang bahandi, ang mga manuglaygay, ang mga mananabang, kag ang tanan nga manugdumala sang mga puud, sa paghalad sang larawan nga ginpatindug ni Hari Nabucodonosor; kag nagtindug sila sa atubangan sang larawan nga napatindug ni Nabucodonosor. 4Niyan ang manugbantala nagsinggit sing mabaskug, “Ginasogo sa inyo, O mga katawohan, mga pungsud, kag mga hambal, 5nga sa tion nga mabatian ninyo ang tonog sang corneta, sang lantoy, sang arpa, sang sambuko, sang salterio, sang gayta, kag sang tanan nga sari sang lanton, maghapa kamo kag magsimba sang larawan nga bulawan nga ginpatindug ni Hari Nabucodonosor; 6kag ang bisan sin-o nga wala nagahapa kag nagasimba sa amo nga takna idap-ung sa tunga sang nagadabdab nga horno sang kalayo.” 7Busa sa sadto nga tion, sang pagkabati sang tanan nga mga katawohan sang tonog sang corneta, sang lantoy, sang arpa, sang sambuko, sang salterio, kag sang tanan nga sari sang lanton, ang tanan nga mga katawohan, mga pungsud, kag mga hambal naghapa kag nagsimba sa larawan nga bulawan nga napatindug ni Hari Nabucodonosor.

8Busa sa sadto nga tion ang pila ka mga Caldeanhon nagpalapit kag nagsumbung batok sa mga Judio. 9Nagsiling sila kay Hari Nabucodonosor, “O hari, magkabuhi sa gihapon! 10Ikaw, O hari, naghimo sing mando, nga ang tagsa ka tawo nga makabati sang tonog sang corneta, sang lantoy, sang arpa, sang sambuko, sang salterio, kag sang gayta, kag sang tanan nga sari sang lanton, maghapa kag magsimba sa larawan nga bulawan; 11kag ang bisan sin-o nga wala maghapa kag magsimba idap-ung sa tunga sang nagadabdab nga horno sang kalayo. 12May pila ka Judio nga gintangdo mo sa mga buluhaton sang puud sang Babilonia: si Sadrac, si Mesac, kag si Abednego. Ini nga mga lalaki, O hari, wala magsapak sa imo; wala sila mag-alagad sa imo mga dios, ukon magsimba sang larawan nga bulawan nga imo napatindug.”

13Niyan si Nabucodonosor sa kaalipungut kag sa kasingkal nagsogo nga dalhon si Sadrac, si Mesac, kag si Abednego. Niyan gindala nila ini nga mga lalaki sa atubangan sang hari. 14Si Nabucodonosor nagsiling sa ila, “Sa katuyoan bala ini, O Sadrac, Mesac, kag Abednego, nga wala kamo mag-alagad sa akon dios, ukon magsimba sang larawan nga bulawan nga napatindug ko? 15Karon kon handa kamo nga sa bisan ano nga tion mabatian ninyo ang tonog sang corneta, sang lantoy, sang arpa, sang sambuko, sang salterio, kag sang gayta, kag sang tanan nga sari sang lanton, maghapa kamo kag magsimba sa larawan nga nahimo ko, maayo; apang kon indi kamo magsimba, sa amo nga takna idap-ung kamo sa tunga sang nagadabdab nga horno sang kalayo; kag sin-o bala ina nga dios nga makaluwas sa inyo sa akon mga kamut?”

16Si Sadrac, si Mesac, kag si Abednego nagsabat sa hari, “O Nabucodonosor, wala kami sing kinahanglan nga magsabat sa imo sa sini nga butang. 17Kon amo ini, ang amon Dios nga ginaalagad namon makasarang magluwas sa amon sa nagadabdab nga horno sang kalayo; kag sia magaluwas sa amon sa imo kamut, O hari. 18Apang kon indi, makilala mo, O hari, nga indi kami mag-alagad sa imo dios ukon magsimba sang larawan nga bulawan nga imo napatindug.”

19Niyan si Nabucodonosor napuno sing kasingkal, kag nagbalhin ang dagway sang iya nawung batok kay Sadrac, kay Mesac, kag kay Abednego. Busa nagpamolong sia kag nagsogo nga initon nila ang horno sing makapito pa sang kinaugali nga pag-init sini. 20Kag nagsogo sia sing pila ka tawo nga gamhanan nga yara sa iya hangaway nga gapuson si Sadrac, si Mesac, kag si Abednego, kag idap-ung sila sa nagadabdab nga horno sang kalayo. 21Niyan ini nga mga lalaki gingapus sa ila bayo, sa ila mga pulos, sa ila mga kunup, kag sa iban nila nga mga panapton, kag gindap-ung sa tunga sang nagadabdab nga horno sang kalayo. 22Busa bangud nga ang sogo sang hari masako kag nga ang horno lakas gid kainit, ang dabdab sang kalayo nagpatay sadtong mga tawo nga naghakwat kay Sadrac, kay Mesac, kag kay Abednego. 23Kag ining tatlo ka lalaki, sanday Sadrac, Mesac, kag Abednego, ginholog nga gapus sa tunga sang nagadabdab nga horno sang kalayo.

24Niyan si Hari Nabucodonosor natingala kag nagtindug sing dalidali. Nagsiling sia sa iya mga manuglaygay, “Wala bala naton idap-ung ang tatlo ka lalaki nga gapus sa tunga sang kalayo?” Sila nagsabat sa hari, “Matuud, O hari.” 25Sia nagsabat, “Apang nakita ko ang apat ka lalaki nga nahubaran, nga nagadayandayan sa tunga sang kalayo, kag wala sila maano; kag ang dagway sang ikap-at kaangay sa anak sang mga dios.”

26Niyan si Nabucodonosor nagpalapit sa ganhaan sang nagadabdab nga horno sang kalayo kag nagsiling, “Sadrac, Mesac, kag Abednego, kamo nga mga alagad sang Dios nga Labing Mataas, gowa, kag magpalapit!” Niyan sanday Sadrac, Mesac, kag Abednego naggowa gikan sa tunga sang kalayo. 27Kag ang mga satrapa, ang mga tinugyanan, ang mga pangolo-puud kag ang mga manuglaygay sang hari nga nagtilipon sing tingub nakakita sining mga lalaki nga ang kalayo walay gahum sa ila mga lawas; ang bohok sang ila mga olo wala masirab, ukon nagbalhin ang ila mga bayo, ukon nag-agi sa ila ang baho sang kalayo. 28Si Nabucodonosor nagsiling, “Pakamaayohon ang Dios nanday Sadrac, Mesac, kag Abednego, nga nagpadala sang iya manugtunda kag nagluwas sang iya mga alagad, nga nagasalig sa iya, kag nagbalhin sang polong sang hari, kag nagtugyan sang ila mga lawas agud nga sila indi makaalagad ukon makasimba sa bisan anong dios luwas sa ila kaugalingon nga Dios. 29Busa nagahimo ako sing mando: Ang tagsa ka katawohan, pungsud, kag hambal nga magpamolong sing bisan anong butang nga sayup batok sa Dios nanday Sadrac, Mesac, kag Abednego hiwahiwaon, kag ang iya balay himoon nga tinumpok nga higko; bangud nga walay iban nga dios nga sarang makaluwas sono sa sining bagay.” 30Niyan ginpauswag sang hari sanday Sadrac, Mesac, kag Abednego sa puud sang Babilonia.

Currently Selected:

DANIEL 3: ABHIL82

Highlight

Copy