AMOS 3
3
Ang Pagngurub sang Leon
1Pamatii ining polong nga ginpamolong sang Ginoo batok sa inyo, O katawohan sang Israel, batok sa bug-os nga panimalay nga ginpataklad ko gikan sa duta sang Egipto:
2“Kamo lamang ang ginkilala ko
sa tanan nga panimalay sang duta;
busa silotan ko kamo
tungud sang tanan ninyong kalautan.
3“Magalakat bala ang duha sing tingub,
kon wala sila magkasugut?
4Magangurub bala ang leon sa talon,
kon wala sing tulukbon?
Magangurub bala ang totoy nga leon sa gowa sang iya lungib,
kon wala sia sing nadakup?
5Masiod bala ang pispis sa duta,
kon wala sing tiglapak sa iya?
Magapisik bala sa duta ang siod,
kon wala gid sing nakuha?
6Patonggon bala ang budyong sa banwa,
kag indi mahadlukan ang mga tawo?
Mahanabu bala ang malaut sa banwa,
kon wala paghimoa ini sang Ginoo?
7Sa pagkamatuud ang Ginoong Dios indi maghimo sing bisan ano nga butang
kon indi niya anay mapahayag ang iya tinago
sa iya mga alagad nga mga manalagna.
8Ang leon nagngurub;
sin-o bala ang indi mahadluk?
Ang Ginoong Dios nagpamolong;
sin-o bala ang indi makapanagna?
Ang Kalaglagan sang Samaria
9Ibantala ninyo sa mga pamakud sa Asdod,
kag sa mga pamakud sa duta sang Egipto,
kag isiling, “Tilipon kamo sa mga bukid sang Samaria,
kag tan-awa kon daw ano kadaku nga kagubut ang yara sa iya,
kag kon ano nga mga pagpigus sa tunga niya.”
10“Kay indi sila makahibalo maghimo sang matarung,” nagasiling ang Ginoo,
“nga nagasuput sing panglugus kag pangawat sa ila mga pamakud.”
11Busa amo ini ang ginasiling sang Ginoong Dios:
“May dira ang kasumpung sa palibut sang duta,
kag lusluson niya sa imo ang imo kusug,
kag atihon ang imo mga pamakud.”
12Amo ini ang ginasiling sang Ginoo: “Subong nga ang manugpahalab nagaagaw sa baba sang leon sang duha ka paa, ukon sang bahin sang dulunggan, sa amo agawon ang katawohan sang Israel nga nagalingkod sa Samaria, sa pamusud sang hiligdaan kag sa sukla nga mga hamil sang higdaan.”
13“Pamati kamo, kag magpamatuud batok sa panimalay ni Jacob,”
nagasiling ang Ginoo, ang Dios sang mga kasoldadosan,
14“kay sa adlaw nga silotan ko ang mga paglalis sang Israel,
silotan ko man ang mga halaran sang Bet-el,#2 Hari 23:15.
kag utdon ang mga sungay sang halaran
kag maholog sa duta.
15Samaron ko ang balay sa tigtulugnaw pati ang balay sa tingadlaw;
kag ang mga balay nga tiposo mawala,
kag ang dalagkung mga balay may katapusan,”
nagasiling ang Ginoo.
Currently Selected:
AMOS 3: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
