AMOS 2
2
1Amo ini ang ginasiling sang Ginoo:
“Sa tatlo ka paglalis sang Moab,#Isa. 15:1–16:14; 25:10-12; Jer. 48:1-47; Ezeq. 25:8-11; Sof. 2:8-11.
kag sa apat, indi ko pag-ipaiway ang iya silot;
bangud nga ginsonog niya
ang mga tul-an sang hari sang Edom tubtub nga nag-apog.
2Gani magapadala ako sing kalayo sa Moab,
kag magalamon ini sang mga pamakud sang Keryot,
kag mapatay ang Moab sa kagubut,
sa sininggit kag sa tonog sang budyong;
3utdon ko ang hukom sa tunga niya,
kag patyon ko ang tanan niyang principe upud sa iya,”
nagasiling ang Ginoo.
4Amo ini ang ginasiling sang Ginoo:
“Sa tatlo ka paglalis sang Juda,
kag sa apat, indi ko pag-ipaiway ang iya silot;
bangud nga ginsikway nila ang kasogoan sang Ginoo,
kag wala magbantay sang iya mga palatukuran,
apang ang ila kabutigan nagpasayup sa ila, nga ginsonod sang ila mga ginikanan.
5Gani magapadala ako sing kalayo sa Juda,
kag magalamon ini sang mga pamakud sang Jerusalem.”
Ang Israel Ginhukman
6Amo ini ang ginasiling sang Ginoo:
“Sa tatlo ka paglalis sang Israel,
kag sa apat, indi ko pag-ipaiway ang iya silot;
bangud nga ginbaligya nila tungud sa pilak ang matarung,
kag ang may kinawad-on tungud sa isa ka paris nga sapin—
7sila nga nagalinas sang olo sang makalolooy sa yab-ok sang duta,
kag nagapatalang sang dalanon sang napiotan;
ang lalaki kag ang iya amay nagahiusa sa isa ka dalaga,
sa pagpasipala sang akon balaan nga ngalan;
8nagahuliray sila sa luyo sang tagsa ka halaran
sa mga panapton nga ginkuha nga inugpalig-on;
kag sa balay sang ila Dios nagainum sila
sang alak sang mga ginmultahan.
9“Bisan pa ginlaglag ko ang Amornon sa atubangan nila,#Deut. 3:8-11.
nga ang iya kataas subong sang kataas sang mga cedro,
kag mabakud subong sang mga roble;
apang ginlaglag ko ang iya bunga sa ibabaw,
kag ang iya mga gamut sa idalum.
10Ginpataklad ko man kamo gikan sa duta sang Egipto,
kag gintuytuyan kamo sing kap-atan ka tuig sa kamingawan,
sa pagtag-iya sang duta sang mga Amornon.
11Kag sa inyong anak nagbangon ako sing mga manalagna,
kag sa inyo mga pamatan-on nga lalaki sing mga Nasareo.#Num. 6:1-8.
Indi bala amo gid ini, O kamo nga katawohan sang Israel?”
nagasiling ang Ginoo.
12“Apang ginpainum ninyo sing alak ang mga Nasareo,
kag ginsogo ang mga manalagna,
nga nagasiling, ‘Dili magpanagna.’
13“Yari karon, ipiton ko kamo sa inyo duug,
subong sang pag-ipit sang karo nga puno sang mga linaylay.
14Ang pagpalagyo mawala sa mga madasig,
kag ang makusug indi magpabaskug sang iya kusug,
kag ang gamhanan indi makaluwas sang iya kaugalingon;
15ang nagagamit sang pana indi magbato,
kag ang madasig sa mga tiil indi makaluwas sang iya kaugalingon,
kag ang nagakabayo indi makaluwas sang iya kabuhi;
16kag ang isganan sa tunga sang mga gamhanan
magapalagyo nga hubo sadtong adlaw,”
nagasiling ang Ginoo.
Currently Selected:
AMOS 2: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
