MGA BINUHATAN 15

Ang Sinapul sa Jerusalem

1Apang may pila ka mga tawo nga nagdolhog gikan sa Judea kag nagpanudlo sa mga kauturan, “Kon indi kamo magpacircuncidar sono sa kinabatasan ni Moises,#Lev. 12:3. indi kamo maluwas.” 2Kag sang si Pablo kag si Bernabe may dakung pagbinanggianay kag pinuyasay sa ila, si Pablo kag si Bernabe kag pila pa sa ila gintangdoan nga magtaklad sa Jerusalem sa mga pinadala kag mga tigulang nahanungud sining kasuayon. 3Gani sila, sang gindol-ong sa ila dalanon sang iglesia, naglatas sang Fenicia kag Samaria, nga nagaasoy sang pagliso sang mga Gentil, kag ginlipay nila sing daku ang tanan nga mga kauturan. 4Sang pag-abut nila sa Jerusalem, ginbaton sila sang iglesia kag sang mga pinadala kag sang mga tigulang, kag ginsugid nila ang tanan nga nahimo sang Dios upud sa ila. 5Apang may nagtindug nga pila sa bunghay sang mga Fariseo nga nagtoo, nga nagasiling, “Kinahanglan nga circuncidahon sila, kag tugnan sila nga magbantay sang kasogoan ni Moises.”

6Nagtipon ang mga pinadala kag ang mga tigulang sa pagpatugsiling sining butang. 7Kag sang may dakung pagpinuyasay, nagtindug si Pedro kag nagsiling sa ila, “Mga kauturan, nakahibalo kamo nga sa nahaunang mga adlaw ang Dios nagpili sa tunga ninyo, nga paagi sa akon baba ang mga Gentil magpamati sang polong sang maayong balita kag magtoo.#Binu. 10:1-43. 8Kag ang Dios nga nakakilala sang tagiposoon nagsaksi sa ila, nga nagahatag sa ila sang Espiritu Santo#Binu. 10:44. subong sang ginhimo niya sa aton;#Binu. 2:4. 9kag wala sia sing ginpasulabi sa aton kag sa ila, kondi nagtinlo sang ila mga tagiposoon paagi sa pagtoo. 10Busa karon ngaa bala ginatilawan ninyo ang Dios sa bagay nga ginagotahan ninyo ang liog sang mga gintoton-an nga bisan ang aton mga ginikanan ukon kita wala makasarang sa pagdala? 11Apang nagatoo kita nga maluwas kita paagi sa bugay ni Ginoong Jesus, kaangay sa ila.”

12Kag ang bug-os nga kadam-an naghipus; kag nagpamati sila kay Bernabe kag kay Pablo nga nagasugid kon anong mga tanda kag kalatingalahan ang nahimo sang Dios sa tunga sang mga Gentil paagi sa ila. 13Sang naghipus sila, si Santiago nagsabat, “Mga kauturan, pamatii ako ninyo. 14Si Simeon nagsugid kon paano nga ang Dios nagduaw sing una sa mga Gentil, sa pagkuha sa ila sing katawohan sa iya ngalan. 15Kag sa sini nagsinanto ang mga polong sang mga manalagna, subong sang nasulat na,

16‘Sa tapus sini magabalik ako,

kag tukuron ko liwat ang puluy-an ni David, nga napukan;

tukuron ko liwat ang kalaglagan sini,

kag patindugon ko ini,

17agud nga ang iban nga mga tawo mangita sa Ginoo,

kag ang tanan nga Gentil nga ginatawag sa akon ngalan,

18nagasiling ang Ginoo, nga nagpakilala sining mga butang kutub sa dumaan.’#Amos 9:11-12.

19Busa ang akon kaisipan amo nga indi ta pagpagamohan ang mga Gentil nga nagaliso sa Dios, 20kondi nga sulatan ta sila nga maglihi sila sa mga kahigkoan sang mga diosdios#Ex. 34:15-17. kag sa pagkamakihilawason#Lev. 18:6-23. kag sa mga nakuga kag sa dugo.#Lev. 17:10-16. 21Kay si Moises kutub sa nahaunang kaliwatan may mga nagawali sa iya sa tagsa ka banwa, kay ginabasa sia sa mga sinagoga sa tagsa ka adlaw nga inugpahuway.”

22Niyan ginpakamaayo sang mga pinadala kag sang mga tigulang, pati sang bug-os nga iglesia, nga magpili sing mga tawo sa ila kaupdanan kag magpadala sa ila sa Antioquia upud kay Pablo kag kay Bernabe. Ginpadala nila si Judas nga gintawag si Barsabas, kag si Silas, pangolo nga mga tawo sa mga kauturan, 23upud ang sulat nga masonod: “Ang mga pinadala kag ang mga tigulang, ang mga kauturan, sa mga kauturan nga sa mga Gentil sa Antioquia kag Siria kag Cilicia, pag-abiabi. 24Sanglit amon nabatian nga ang iban nga nagikan sa amon naggamo sa inyo sa mga polong, nga nagapalibog sang inyo mga hunahuna, bisan sa ila wala kami magsogo, 25ginpakamaayo namon sing tingub ang pagpili sing mga tawo kag pagpadala sa ila sa inyo kaupud sang aton hinigugma nga si Bernabe kag si Pablo, 26mga tawo nga nagpakatalagman sang ila mga kabuhi tungud sa ngalan sang aton Ginoong Jesu-Cristo. 27Busa ginpadala namon si Judas kag si Silas, nga sila gid magasugid sa inyo sang amo nga mga butang sa polong sang baba. 28Kay ginpakamaayo sang Espiritu Santo kag namon nga indi na kamo paglulanan pa luwas sining mga butang nga kinahanglan: 29nga maglihi kamo sa mga butang nga ginhalad sa mga diosdios kag sa dugo kag sa nakuga kag sa pagkamakihilawason. Kon maglikaw kamo sa ila sini, manginmaayo sa inyo. Paalam sa inyo.”

30Gani sila, sang ginpalakat na sila, nagdolhog pa Antioquia; kag sang natipon nila ang katilingban, ginhatag nila ang sulat. 31Kag sang nabasa nila ini, nagkalipay sila tungud sang laygay. 32Kag si Judas kag si Silas, nga mga manalagna man, naglaygay sa mga kauturan sa madamung polong kag nagpalig-on sa ila. 33Kag sa tapus nga nakapabilin sila didto sing pila ka tion, ginpalakat sila sa paghidait sang mga kauturan pakadto sa mga nagpaladala sa ila. [34Apang ginpakamaayo ni Silas nga magpabilin didto.] 35Apang si Pablo kag si Bernabe nagpabilin sa Antioquia, nga nagapanudlo kag nagawali sang polong sang Ginoo, kaupud sang iban man nga madamu.

Si Pablo Nagasipak kay Bernabe kag Nagasugud sang Ikaduhang Panlakatan

36Kag sa tapus ang pila ka adlaw si Pablo nagsiling kay Bernabe, “Mabalik kita karon kag duawon ang mga kauturan sa tagsa ka banwa diin aton ginbantala ang polong sang Ginoo, kag tan-awon kon paano sila.” 37Kag si Bernabe buut nga paupdon sa ila si Juan man nga gintawag si Marcos. 38Apang wala pagpakamaayoha ni Pablo nga iupud nila sia nga nagbulag sa ila sa Panfilia,#Binu. 13:13. kag wala mag-upud sa ila sa buluhaton. 39Kag may isa ka matigdas nga pagbanggianay, sa bagay nga nagbulag ang isa sa isa; gin-upud ni Bernabe si Marcos kag nagsakay pa Cipre, 40apang si Pablo nagpili kay Silas kag naglakat, nga gintugyan sang mga kauturan sa bugay sang Ginoo. 41Kag ginlatas niya ang Siria kag Cilicia, nga nagapalig-on sang mga iglesia.

Currently Selected:

MGA BINUHATAN 15: ABHIL82

Highlight

Copy