MGA BINUHATAN 14

Si Pablo kag si Bernabe sa Iconio

1Karon sa Iconio nagsulud sila sing tingub sa sinagoga sang mga Judio, kag nagpamolong sa bagay nga nagtoo ang dakung kadam-an sang mga Judio kag sang mga Griego. 2Apang ang mga Judio nga nagdumili sa pagtoo nagsugyot sang mga hunahuna sang mga Gentil kag ginpapait sila batok sa mga kauturan. 3Gani nagpabilin sila sing malawig nga tion didto, nga nagapamolong sing masidla nga sa Ginoo, nga nagsaksi sa polong sang iya bugay, nga nagatugut nga himoon sang ila mga kamut ang mga tanda kag kalatingalahan. 4Apang ang katawohan sang banwa napihak; ang isa ka bahin nag-ugyon sa mga Judio, kag ang isa sa mga pinadala. 5Sang naghilimbon ang mga Gentil kag ang mga Judio, pati ang ila mga manugdumala, sa pagpakahuya kag sa pagbato sa ila, 6nasat-uman nila ini kag nagpalagyo sila sa mga banwa sang Lacaonia, sa Listra kag Derbe, kag sa ginsakpan sa palibut; 7kag didto ginwali nila ang maayong balita.

Si Pablo Ginabato sa Listra

8Karon sa Listra may tawo nga nagalingkod, nga masakiton sa iya mga tiil; nga lupog gikan sa tiyan sang iya iloy, nga wala gid makalakat. 9Sia nakabati kay Pablo nga nagahambal; kag sang nagapaungut sang iya mata sa iya kag sa nakita niya nga sia may pagtoo nga pag-ayohon, 10si Pablo nagsiling sa mabaskug nga tingug, “Tindug ka sing tadlong sa imo mga tiil.” Kag nagtumbo sia kag naglakat. 11Kag sang nakita sang kadam-an ang nahimo ni Pablo, gintib-ong nila ang ila tingug, nga nagasiling sa hambal nga Licaoniahanon, “Ang mga dios nagkunsad sa aton sa kaanggid sang mga tawo!” 12Gintawag nila si Bernabe nga Jupiter, kag si Pablo nga Mercurio, bangud nga amo sia ang pangolo nga manughambal. 13Kag ang sacerdote ni Jupiter, nga ang iya templo didto sa atubang sang banwa, nagdala sang mga baka nga lalaki kag mga purungpurung sa mga gawang kag buut kuntani maghalad kaupud sang katawohan. 14Apang sang nabatian ini sang mga pinadala nga si Bernabe kag si Pablo, ginkusnit nila ang ila mga panapton kag nagpatunga sing madagmit sa kadam-an nga nagasinggit, 15“Mga tawo, ngaa bala nagahimo kamo sini? Mga tawo man kami, nga kaangay sing kinaugali sa inyo, kag nagadala sa inyo sang maayong balita, nga magliso kamo gikan sa sining walay pulus nga mga butang pa Dios nga buhi nga naghimo sang langit kag duta kag dagat kag sang tanan nga yara sa ila. 16Sa mga nagligad nga mga kaliwatan nagtugut sia sa tanan nga kapungsuran sa paglakat sa ila kaugalingon nga mga dalanon; 17walay sapayan wala sia magpabaya sa iya kaugalingon nga walay saksi, kay naghimo sia sing maayo kag naghatag sa inyo sing ulan sa langit kag mga panag-on nga mapatubason, nga nagapuno sang inyo mga tagiposoon sing pagkaon kag kasadya.” 18Sa sining mga polong halus sila makapugung sang katawohan sa pagdolot sing paghalad sa ila.

19Apang nag-abut didto ang mga Judio gikan sa Antioquia kag sa Iconio; kag sang nabuyuk nila ang katawohan ginbato nila si Pablo kag ginguyud sia sa gowa sang banwa, nga nagahunahuna sila nga patay sia. 20Apang sang nagtipon sa palibut niya ang mga gintoton-an, nagtindug sia kag nagsulud sa banwa; kag sa madason nga adlaw naglakat sia kaupud ni Bernabe pa Derbe. 21Sang nakawali sila sang maayong balita sa sadtong banwa kag nakahimo sing madamung gintoton-an, nagbalik sila sa Listra kag sa Iconio kag sa Antioquia, 22nga nagapalig-on sang mga kalag sang mga gintoton-an, nga nagalaygay sa ila sa pagpadayon sa pagtoo, kag nagasiling nga paagi sa madamung kangitngitan kita magsulud sa ginharian sang Dios. 23Kag sang nakatangdo sila sa ila sing mga tigulang sa tagsa ka iglesia, nga may pangamuyo kag pagpuasa, gintugyan nila sila sa Ginoo nga ila gintoohan.

Ang Pagbalik sa Antioquia sa Siria

24Niyan ginlatas nila ang Pisidia, kag nag-abut sila sa Panfilia. 25Kag sang nahambal nila ang polong sa Perga, nagdolhog sila sa Atalia; 26kag gikan didto nagsakay sila pa Antioquia, diin natugyan sila sa bugay sang Dios nga sa buluhaton nga ila natuman. 27Kag sang pag-abut nila, gintipon nila ang iglesia sing tingub kag ginsugid ang tanan nga nahimo sang Dios upud sa ila, kag kon paano ang pagbukas niya sang ganhaan sang pagtoo sa mga Gentil. 28Kag nagpabilin sila didto sing didiotay nga tion kaupud sang mga gintoton-an.

Currently Selected:

MGA BINUHATAN 14: ABHIL82

Highlight

Copy