2 SAMUEL 9
9
Ang Pagkalolo ni David kay Mefiboset
1Kag si David nagsiling, “May nabilin pa bala nga isa sa panimalay ni Saul, agud nga mapakitaan ko sia sing kalolo tungud kay Jonatan?”#1 Sam. 20:15-17. 2Karon may alagad gikan sa panimalay ni Saul nga ginahingalanan Siba, kag gintawag nila sia pakadto kay David; kag ang hari nagsiling sa iya, “Ikaw bala si Siba?” Kag nagsiling sia, “Ang imo alagad amo sia.” 3Kag ang hari nagsiling, “Wala na bala sing isa nga nabilin sa panimalay ni Saul, agud nga mapakita ko ang kalolo sang Dios sa iya?” Si Siba nagsiling sa hari, “Si Jonatan may anak pa nga lalaki; nga piang sa iya mga tiil.”#2 Sam. 4:4. 4Ang hari nagsiling sa iya, “Diin bala sia?” Kag si Siba nagsiling sa hari, “Yari sia sa balay ni Maquir nga anak ni Amiel, sa Lo-debar.” 5Niyan nagpadala si Hari David kag ginpakuha sia sa balay ni Maquir nga anak ni Amiel, gikan sa Lo-debar. 6Kag si Mefiboset nga anak ni Jonatan, ang anak ni Saul, nag-abut kay David, naghapa, kag nagyaub. Kag si David nagsiling, “Mefiboset!” Kag sia nagsabat, “Yari karon, ang imo alagad.” 7Kag si David nagsiling sa iya, “Dili ka mahadluk; kay ako sa pagkamatuud magapakita sa imo sing kalolo tungud kay Jonatan nga imo amay, kag magauli sa imo sang bug-os nga duta ni Saul nga imo amay; kag ikaw magakaon sa akon latok sing dalayon.” 8Kag nagyaub sia, kag nagsiling, “Ano bala ang imo alagad, nga magtamud ka sa amo nga ido nga patay subong sa akon?”
9Niyan gintawag sang hari si Siba, alagad ni Saul, kag nagsiling sa iya, “Ang tanan nga naigo kay Saul kag sa bug-os niya nga panimalay ginhatag ko sa anak sang imo agalon. 10Kag ikaw magapanguma sang duta tungud sa iya, ikaw kag ang imo mga anak nga lalaki kag ang imo mga alagad, kag tiponon mo ang mga patubas, agud nga ang anak sang imo agalon may kalan-on; apang si Mefiboset nga anak sang imo agalon magakaon sa akon latok sing dalayon.” Karon si Siba may napulo kag lima ka anak nga lalaki kag duha ka pulo ka alagad. 11Niyan si Siba nagsiling sa hari, “Sono sa tanan nga ginsogo sang akon ginoo nga hari sa iya alagad, amo ang himoon sang imo alagad.” Gani si Mefiboset nagkaon sa latok ni David, subong sang isa sang mga anak sang hari. 12Kag si Mefiboset may lanubo nga anak nga lalaki, nga ginhingalanan Mica. Kag ang tanan nga nagapuyo sa balay ni Siba mga alagad kay Mefiboset. 13Gani nagpuyo si Mefiboset sa Jerusalem; kay nagkaon sia sing dalayon sa latok sang hari. Karon sia piang sa duha niya ka tiil.
Currently Selected:
2 SAMUEL 9: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
