2 SAMUEL 10
10
Ang mga Amornon kag ang mga Sirianhon Gindaug
(1 Cron. 19:1-19)
1Sa tapus sini napatay ang hari sang mga anak ni Amon, kag naghari sa tal-us niya si Hanun nga iya anak. 2Kag si David nagsiling, “Ako magapakita sing kalolo kay Hanun nga anak ni Nahas, subong nga ang iya amay nagpakita sing kalolo sa akon.” Gani ginpadala ni David ang iya mga alagad sa paglipay sa iya nahanungud sang iya amay. Kag ang mga alagad ni David nagkadto sa duta sang mga anak ni Amon. 3Apang ang mga principe sang mga anak ni Amon nagsiling kay Hanun nga ila ginoo, “Nagahunahuna ka bala nga nagatahud sa imo amay si David, bangud nga nagpadala sia sing mga manuglipay sa imo? Wala bala magpadala si David sang iya mga alagad sa imo sa pag-usisa sang banwa, kag sa paglampitaw sini, kag sa paglaglag sini?” 4Gani gindakup ni Hanun ang mga alagad ni David, kag ginkiskis ang katunga sang ila mga bungut, kag gingutrab ang ila mga panapton sa tunga, bisan tubtub sa ila mga balikawang, kag ginpalakat sila. 5Sang ginsugid nila ini kay David, nagpadala sia sa pagsugata sa ila, kay ang mga tawo nahuya sing daku. Kag nagsiling ang hari, “Pabilin kamo sa Jerico tubtub nga magtubo ang inyo mga bungut, kag ugaling magpauli.”
6Sang nakita sang mga anak ni Amon nga nanginmangil-ad sila kay David, ang mga anak ni Amon nagpadala kag nagsohol sang mga Sirianhon sang Bet-rehob, kag sang mga Sirianhon sang Soba, duha ka pulo ka libo ka hangaway nga nagalakat, kag sang hari sang Maaca, nga may isa ka libo ka tawo, kag sang mga tawo sang Tob napulo kag duha ka libo ka tawo. 7Kag sang pagkabati ni David sini, ginpadala niya si Joab, kag ang bug-os nga kasoldadosan sang gamhanan nga mga tawo. 8Kag naggowa ang mga anak ni Amon kag nagpaagisud sa inaway sa salamputan sang gawang; kag ang mga Sirianhon sang Soba kag sang Rehob, kag ang mga tawo sang Tob kag sang Maaca nagpabilin sila ila sa latagon.
9Sang nakita ni Joab nga ang inaway napahamtang batok sa iya sa atubangan kag sa likod, nagpili sia sa tanan nga pinili nga tawo sang Israel, kag ginpahamtang sila sing paagisud batok sa mga Sirianhon; 10ang nabilin sang katawohan gintugyan niya sa kamut ni Abisai nga iya utud; kag ginpahamtang niya sila sing paagisud batok sa mga anak ni Amon. 11Kag nagsiling sia, “Kon ang mga Sirianhon tama kabakud sa akon, niyan buligan mo ako; apang kon ang mga anak ni Amon tama kabakud sa imo, niyan ako magakara kag magabulig sa imo. 12Magpakaisug ka, kag magpakalalaki kita tungud sa aton katawohan kag tungud sa mga banwa sang aton Dios; kag himoon sang Ginoo ang maayo sa iya.” 13Gani nagpalapit si Joab kag ang katawohan nga upud sa iya sa inaway batok sa mga Sirianhon; kag sila nagpalagyo gikan sa atubang niya. 14Kag sang nakita sang mga anak ni Amon nga ang mga Sirianhon nagpalagyo, nagpalagyo man sila sa atubang ni Abisai, kag nagsulud sa banwa. Niyan si Joab nagbalik gikan sa mga anak ni Amon, kag nagsulud sa Jerusalem.
15Apang sang nakita sang mga Sirianhon nga gintamaan sila sa atubang sang Israel, nagtilipon sila sing tingub. 16Kag nagpadala si Hadadezer, kag nagpagowa sang mga Sirianhon nga yara sa tabok sang Soba; kag nag-abut sila sa Elam, upud kay Sobac nga pangolo sang kasoldadosan ni Hadadezer nga nagdumala sa ila. 17Kag ginsugid ini kay David, kag gintipon niya ang bug-os nga Israel sing tingub, kag nagtabok sa Jordan, kag nag-abut sa Elam. Kag ang mga Sirianhon nagpahamtang sa ila kaugalingon sing paagisud batok kay David, kag nagpakig-away sa iya. 18Kag ang mga Sirianhon nagpalagyo gikan sa atubang sang Israel; kag ginpatay ni David sa mga Sirianhon ang mga tawo sang pito ka gatus ka kangga, kag kap-atan ka libo ka manugkabayo, kag ginpilas si Sobac nga pangolo sang ila kasoldadosan, sa bagay nga napatay sia didto. 19Kag sang nakita sang tanan nga hari nga mga alagad ni Hadadezer nga tinamaan sila sa atubang sang Israel, nagpakighidait sila sa Israel, kag nag-alagad sila sa iya. Gani ang mga Sirianhon nahadluk na gid sa pagbulig sang mga anak ni Amon.
Currently Selected:
2 SAMUEL 10: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
