2 SAMUEL 1
1
Si David Nakahibalo sang Pagkapatay ni Saul
1Sang patay na si Saul, sang si David nakabalik na gikan sa pagpatay sa mga Amalecnon, si David nakapabilin sing duha ka adlaw sa Ziklag; 2kag sa ikatlo nga adlaw, yari karon, ang isa ka tawo naggowa sa dologan gikan kay Saul, nga gisi ang iya mga panapton kag may yab-ok sa iya olo. Kag sang nag-abut sia kay David, naghapa sia sa duta kag nagyaub. 3Si David nagsiling sa iya, “Diin ka maghalin?” Kag sia nagsiling sa iya, “Nagpalagyo ako gikan sa dologan sang Israel.” 4Kag si David nagsiling sa iya, “Paano bala ang kahimtangan? Sugiri ako.” Kag sia nagsabat, “Ang katawohan nagpalagyo gikan sa inaway, kag madamu sang katawohan man ang napukan kag napatay; kag si Saul kag si Jonatan nga iya anak napatay man.” 5Niyan si David nagsiling sa pamatan-on nga lalaki nga nagsugid sa iya, “Paano bala ang pagkahibalo mo nga si Saul kag si Jonatan nga iya anak napatay?” 6Kag ang pamatan-on nga nagsugid sa iya nagsiling, “Sang natabuan ako sa Bukid nga Gilboa; si Saul nagasandiay sa iya bangkaw; kag yari karon, ang mga kangga kag ang mga manugkabayo nagdusdus sa iya. 7Kag sang nagbalikid sia, nakita niya ako, kag nagtawag sa akon. Kag nagsabat ako, ‘Yari ako.’ 8Kag nagsiling sia sa akon, ‘Sin-o ka?’ Ako nagsabat sa iya, ‘Amalecnon ako.’ 9Kag nagsiling sia sa akon, ‘Tindug sa luyo nakon kag patya ako; kay ang kangitngit nagdakup sa akon, bangud nga ang akon kabuhi bug-os pa sa akon.’ 10Gani nagtindug ako sa luyo niya, kag ginpatay sia, bangud nga nagsalig ako nga indi na sia mabuhi sa tapus nga napukan sia; kag ginkuha ko ang purungpurung nga yara sa iya olo kag ang pulsera nga yara sa iya butkon kag gindala sila diri sa akon ginoo.”#1 Sam. 31:1-6; 1 Cron. 10:1-6.
11Niyan si David nag-uyat sang iya mga panapton, kag gingisi sila; kag subong man ang tanan nga lalaki nga upud sa iya; 12kag naglalaw sila kag naghibi kag nagpuasa tubtub sa kahaponon tungud kay Saul kag tungud kay Jonatan nga iya anak kag tungud sang katawohan sang Ginoo kag tungud sang panimalay sang Israel, bangud nga napukan sila sa espada. 13Kag si David nagsiling sa pamatan-on nga nagsugid sa iya, “Tagadiin ka bala?” Kag sia nagsabat, “Anak ako sang manlulugayaw, isa ka Amalecnon.” 14Si David nagsiling sa iya, “Paano bala nga wala ka nahadluk sa pag-untay sang imo kamut sa paglaglag sang hinaplas sang Ginoo?” 15Niyan gintawag ni David ang isa sang mga pamatan-on kag nagsiling sa iya, “Palapit, kag damhagi sia.” Kag ginlabo sia niya sa bagay nga napatay sia. 16Kag si David nagsiling sa iya, “Ang imo dugo manginsa ibabaw sang imo olo; kay ang imo baba nagpamatuud batok sa imo, nga nagasiling, ‘Ginpatay ko ang hinaplas sang Ginoo.’”
Si David Nagapanalabiton tungud kay Saul kag kay Jonatan
17Kag nagpanalabiton si David tungud kay Saul kag kay Jonatan nga iya anak sini nga panalabiton, 18kag ginsogo niya sila nga tudloan ang mga anak sang Juda sang ambahanon sang pana; yari karon, nasulat ini sa tolon-an ni Jasar.#1:18 Ukon Ang matarung #Jos. 10:13. Nagsiling sia:
19“Ang imo himaya, O Israel, ginpatay sa imo mga kataasan!
Daw ano nga pagkapukan sang mga gamhanan!
20Dili pag-isugid ini sa Gat,
dili pag-ibantala ini sa mga dalan sang Ascalon;
basi nga ang babayi nga mga anak sang mga Filistinhon magkasadya,
basi nga ang babayi nga mga anak sang mga dicircuncidado maghinugyaw.
21“Kamo nga mga bukid sang Gilboa, magwala sing ton-og ukon ulan sa inyo, ukon mga latagon sang mga halad!
Kay didto ang taming sang gamhanan ginhaboy nga nadagtaan,
ang taming ni Saul, nga wala mahaplas sing lana.
22“Gikan sa dugo sang mga pinatay,
gikan sa tambok sang mga gamhanan,
ang pana ni Jonatan wala mag-isul,
kag ang espada ni Saul wala magbalik nga wala sing dala.
23“Si Saul kag si Jonatan, hiligugmaon kag manayanaya!
Sa ila kabuhi kag sa ila kamatayon wala sila magbulag;
madasig pa sila sa mga aguila,
makusug pa sila sa mga leon.
24“Kamo nga babayi nga mga anak sang Israel, hilibi kay Saul,
nga nagpasaput sa inyo sing escarlata nga may katahum,
nga nagbutang sa inyo mga panapton sing mga puni nga bulawan.
25“Daw ano nga pagkapukan sang mga gamhanan
sa tunga sang inaway!
“Si Jonatan ginpatay sa imo kataasan.
26Nagakalisud ako tungud sa imo, utud ko nga Jonatan;
manayanaya ka gid sa akon;
ang imo gugma sa akon makatilingala,
nagalabaw sa gugma sang mga babayi.
27“Daw ano nga pagkapukan sang mga gamhanan,
kag ang mga hinganiban sa inaway mawala!”
Currently Selected:
2 SAMUEL 1: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
